Sosial şəbəkələrdə sabiq deputat Hüseynbala Mirələmovun gənc xanıma qarşı biabırçı hərəkətlərinin əks olunduğu görüntülər yayılıb.
Nyus.Az yerli KİV-ə istinadən bildirir ki, sözügedən görüntülər qısa müddət ərzində sosial şəbəkələrdə geniş yayılıb və 75 yaşlı deputatın bu hərəkəti müzakirələrə səbəb olub. Ahıl yaşlı birisinin gənc xanıma qarşı bu cür davranışı birmənalı qarşılanmayıb.
Belə ki, 30-dan artıq bədii və publisistik kitabın müəllifi olan yazıcı və professor tənqid atəşinə tutulub. Bildirilib ki, onun bu davranışı müəllifi olduğu kitabların adı ilə eynidir - "Xəcalət", "Utanc", "Mənəviyyatın ekologiyası"...
Qeyd edək ki, H.Mirələmov 1992-ci ildən Yeni Azərbaycan Partiyasının (YAP) üzvü, 2008-ci ildən isə partiyanın Xətai rayon təşkilatının sədridir. O, 2005, 2010 və 2015-ci illərdə 33 saylı Xətai birinci seçki dairəsindən III, IV və V çağırış Milli Məclisin deputatı olub. YAP-ın son qurultayında isə sabiq deputat Veteranlar Şurasının üzvü seçilib.
Sözügedən görüntülərlə bağlı jurnalistlərin suallarına cavab verən Hüseynbala Mirələmov əvvəlcə görüntülərdən xəbəri olmadığını bildirib. O da maraqlıdır ki, telefona Hüseynbala Mirələmov kimi cavab verən şəxs, daha sonra deyib: “Bu mən deyiləm və bu nömrə də mənim deyil...”.
Nyus.Az
