Faktdır ki, ölkə əhalisinin sosial əhəmiyyət kəsb edən məsələ və problemlərinin həlli hər zaman aktuallıq kəsb edib və belə bir səbəb üzündən də, dövlət qurumlarının bu yöndə səfərbər olunmaları, sakinlərə məxsus problemlərin aradan qaldırılması daim cənab Prezidentin diqqət mərkəzində saxladığı məsələlərdən biri olub. Yəni, o halın varlığını unutmaq olmaz ki, bu yöndə addımların atılması, yerli sakinlərə məxsus problemlərin həlli və s. istiqamətində hər zaman ən yüksək səviyyədə tapşırıqlar verilsə də, bu gün elə dövlət qurumları var ki, onlar sakinlərə məxsus problemləri həll etmək əvəzinə verilmiş tapşırıqları qulaqardına vurmaqla məşğul olurlar. Belə dövlət qurumlarından birinin də, məhz Binəqədi Rayon Elektrik Şəbəkəsinin olduğu bildirilir. Bu haqda Binəqədi rayonu, Xocasən kəndi, “Təkev” adı ilə tanınan ərazidə 25 ildən çox müddət ərzində yaşayan Həsənova Nazilə Şirməmməd qızı redaksiyamıza çatdırdığı məlumatlarda bildirir ki, “Hazırda ailədə 10 nəfər olsaq da, uzun illərdir ki, Bakı şəhəri, Binəqədi Rayon Elektrik Şəbəkəsi bizi işıq üzünə “həsrət qoyub”. Ailə üzvlərimizin çoxu məktəblidirlər və yaşadığımız evdə elektrik enerjisinin olmaması səbəbindən, bu gün onlar normal dərs oxuya bilmirlər. İki oğul övladım SHXÇDX Nizami rayon idarəsindən hərbi xidmətə yola düşüb Vətən qarşısında borclarını şərəflə yerinə yetiriblər. Övladlarımdan biri hərbi xidmətdə kəşfiyyatçı, digəri isə tankist olub. 44 günlük Vətən müharibəsi başlayarkən kiçik oğlum Rauf Həsənov könüllü hərbi xidmətə getmək haqda müraciət etsə də, onu hansısa səbəbdən hərbi xidmətə aparmadılar və gözləməsini məsləhət gördülər.
Özüm haqqında isə onu deyə bilərəm ki, hal-hazırda Bakı şəhəri, “Gənclik” metrostansiyasının yaxınlığındakı 5 saylı Şəhər Kliniki Xəstəxanasında əmək fəaliyyəti ilə məşğul oluram və bu gün xəstəxanadakı yaralı əsgərlərimizə, koronovirus xəstələrinə yüksək səviyyədə xidmət göstərməyə çalışıram. İndiyə kimi üz-üzə qaldığımız belə bir problemlə bağlı aidiyyatı dövlət qurumlarına bir neçə dəfə müraciətlər ünvanlasam da, bir kimsə problemin həlli istiqamətində bizə yardımçı olmayıb. Ona görə də bu gün olmazın çətinliklərlə üz-üzə qalmışıq. Biz heç cür başa düşə bilmirik ki, kimə, hansı vəzifə sahibinə müraciət edək ki, problemimizin həllinə nail ola bilək. Qeyd edim ki, yaşadığımız fərdi yaşayış evinə havadan peyk vasitəsilə çəkilmiş və Xocasən bələdiyyəsinin sədri N.Məmmədovanın imzası ilə təsdiq olunmuş X-40.391778; Y-49.773826 sənəd də verlib. Bütün bunların qarşılığında heç cür yaşadığımız fərdi yaşayış evinə elektrik xətti çəkdirib, enerji təminatımızı təmin edə bilmirik. Heç cür başa düşə bilmirik ki, məgər biz də bu ölkənin vətəndaşı deyilikmi? Səbəb nədir ki, bizə qarşı belə bir ögey münasibət bəslənilir?”
Düşünürük ki, bu məqalənin yayımlanmasından sonra Binəqədi Rayon Enerji Təchizatı və Satışı İdarəsinin əməkdaşları hərəkətə keçib, uzun illərdən bəri elektrik enerjisinə həsrət qalmış on nəfərlik ailənin üz-üzə qaldığı problemin həlli istiqamətində lazımi addımlarını atacaqlar.
Mövzunu diqqətdə saxlayacağıq.
Nyus.Az
