Qaradağ rayonunun Lökbatan qəsəbəsinin yaxınlığında, daha dəqiq desək Sədərək Ticarət Mərkəzinə yaxın ərazidə fəaliyyət göstərən “Meyvəli bazarı”, bu gün meyvə və tərəvəz məhsullarının topdan və pərakəndə satışının həyata keçirildiyi bir ünvandır. Bu bazar beynəlxalq avtomobil və dəmir yolu magistralının kəsişdiyi bir ərazidə yerləşir, həmçinin regionda ən böyük meyvə və tərəvəz bazası da hesab olunur. “Meyvəli Bazarı” MMC-nin 16 may 2008-ci ildə bir qrup iş adamı tərəfindən təsis olunduğu bildirlir və bu bazarın yaradılmasında əsas məqsəd, yerli fermerlərin kənd təsərrüfatı məhsullarını rahat şəkildə yerli bazara çıxara bilmələrinə lazımi şəraiti yaratmaqdır. Bazar Bakı şəhərinin giriş hissəsində yerləşdiyindən, ölkəmizin hər bir regionundan gətirilən kənd təsərrüfatı məhsulları bu bazara çıxarılır və rahat şəkildə satışı da həyata keçirilir. Təqribən ümumi sahəsinin 35 ha olduğu bildirilən “Meyvəli Bazarı” MMC 2008-ci ildə təsis olunsa da, əslində bu bazar 2009-ci ildən fəaliyyət göstərməyə başlayıb. Belə bir səbəblər üzündən də, 2009-cu ildən fəaliyyət göstərən bu bazara yerli fermerlər daha çox üz tuturlar. Yəni, sutka ərzində bu bazarda digər alış-veriş məkanlarına nisbətən daha çox əhali sıxlığına rast gəlmək mümkün olur. Bütün bunlar yaxşı hal olsa da, hal-hazırda “Meyvəli Bazarı” MMC-də yaşanan digər halların varlığı isə, sanki hər kəsi dəhşətə gətirməkdədir.
Hər kəsə bəllidir ki, bu ilin mart ayından başlayaraq ölkəmizin bütün ərazisində koronovirus (COVİD-19) infeksiyasının yayılmasının qarşısının alınması məqsədilə, hər cür qabaqlayıcı tədbirlərin görülməsinə başlanıldı. Aprel ayının 5-də isə, xüsusi karantin rejiminin tətbiq olunması haqda Nazirlər Kabineti yanında fəaliyyət göstərən Operativ Qərərgahın qərarı elan olundu. Belə bir səbəb üzündən də, ölkəmizin ərazisindəki ümumi vəziyyətin göstəriciləri gündəlik təhlil olundu və Bakıda, Gəncədə, Abşeronda, Sumqayıtda və Lənkəranda ictimai-iaşə obyektlərinin fəaliyyət göstərmələrinə 31 may 2020-ci il tarixə qədər bir daha məhdudiyyətlər tətbiq olundu. Ötən müddət ərzində karantin rejiminin tələblərinə hər bir şəxsin əməl etməsinin vacibliyini cənab Prezident İlham Əliyev dəfələrlə vurğuladı, hər kəsə tapşırıq və tövsiyyələrini çatdırdı, hətta Nazirlər Kabinetinin və digər dövlət
qurumlarının sözçüləri, ictimai-siyasi xadimlər, nüfuz sahibi olan şəxslər, tanınmış sənət adamları və s. bu yöndə təbliğatlarını apardılar. Bundan əlavə, cənab Vilayət Eyvazovun birbaşa nəzarəti altında daxili işlər orqanı əməkdaşlarının bu yöndə səfərbər olunmaları, onların hər kəsin xüsusi karantin rejiminin tələblərinə əməl etməsi yöndə lazımi addımlarını atmaları daha çox diqqəti cəlb edən məsələlərdən oldu. Onu da unutmaq olmaz ki, koronovirus (COVİD-19) infeksiyasının yayılmasının qarşısının alınması məqsədilə, ötən müddət ərzində büdcədən bu məqsədlə milyardlarla vəsaitlər xərcləndi.
Məsələnin təəccüb və təəssüf doğuran tərəfi odur ki, xüsusi karantin rejiminin qüvvədə olduğu bir vaxtda “Meyvəli Bazarı” MMC-nin fəaliyyət göstərdiyi ərazidə, bu gün üç ədəd yeməkxana gecə-gündüz fəaliyyət göstərməkdə davam edir. Yəni, yeməkxanalarda həyat adi qaydada davam edir. Bir kimsə maska taxmadan, qoruyucu vasitələrdən istifadə etmədən ictimai-iaşə obyektlərinə daxil olub həm yemək yeyə bilir, həm də çay, pivə, spirtli içki və s. içə bilir. Düşündürücü halın varlığı isə, hər kəsin xüsusi karantin rejiminin tələblərinə əməl etməsi üçün birbaşa məsuliyyət daşıyan polis əməkdaşlarının seyrçi mövqedə dayanmaları olur. Hələ, bu azmış kimi polis əməkdaşlarının fəaliyyət göstərən yeməkxanalara daxil olub müştərilər arasında oturmaları, yemək yeyib çay işmələri və s. onu sübut edir ki, polis əməkdaşları da ölkə rəhbəri cənab İlham Əliyevin çağırış və tövsiyyələrinə, digər dövlər qurumlarının qərarlarına heç bir əhəmiyyyət vermirlər. O halın varlığına diqqət yetirmək lazımdr ki, mart ayından indiyə kimi koronovirus (COVİD-19) infeksiyasının ölkəmizin ərazisində yayılmasının qarşısının almaq məqsədilə, cənab Prezident başda olmaqla Azərbaycan hakimiyyəti hər cür addımını atıb, bu yöndə külli miqdarda vəsaitlər xərclənib. O halda sual oluna bilər ki, görəsən Anar Novruzovun direktoru olduğu “Meyvəli Bazarı” MMC-nin ərazisində belə bir addımın atılması hansı məqsədə xidmət edir? Görəsən bu şəxs ölkə rəhbərinin çağırışına, Operativ Qərərgahın qərarlarına əməl etməməklə nəyə nail olmaq istəyir? Yəni, bu kimi hallar ortaya çoxsaylı sualların çıxmasına səbəb olur. Əslində baş verənləri təhlil edib belə bir qənaətə gəlmək olur ki, “Meyvəli Bazarı” MMC-nin ərazisində belə bir addımın atılması, birbaşa dövlətimizə və xalqımıza qarşı yönəlik qəsdir, böyük bir xəyanətdir. Çünki, bu bazara rəhbərlik edənlər hal-hazırda koronovirus (COVİD-19) infeksiyasının yayılma riskinin artmasına şərait yaradırlarsa, deməli onlar dövlətimizin, xalqımızın taleyini düşünmürlər və xəyanət yolunu da tuturlar.
P.S. Yaşanan belə bir ciddi problemlə bağlı Qaradağ RİH-nin başçısı cənab Süleyman Mikayılovun mobil telefonuna zəng edib məsələlərə münasibətlərini öyrənmək istədikdə, özünü icra başçısının köməkçisi kimi təqdim edən şəxs “niyə bizə zəng etmisiniz, bilmirsinizmi ki, “Meyvəli Bazarı” MMC özəl müəssisədir. RİH olaraq həmin müəssisənin işlərinə müdaxilə etmək səlahiyyətinə malik deyilik” deyə cavab verdi. Belə bir cavabın verilməsi olduqca düşündürücü cavab olduğundan, yaxın günlərdə bu yöndə müəyyən açıqlamalarla çıxış edəcəyik. Ona görə də bizi izləyin ki, yazdıqlarımızdan xəbərdar ola biləsiniz.
“Meyvəli Bazarı” MMC özəl müəssisəsinin direktoru Anar Novruzov ilə əlaqə saxladıq. O,özündən razı halda bildirdi ki,bu məsələ ilə bağlı məni narahat etməyin. Pandemiyanın və karantinin bizə heç bir aidiyyatı yoxdur
Mövzunu diqqətdə saxlayacağıq.
Nyus.Az
