Ötən gün Əmək və Əhalinin Sosial Müdafiəsi Nazirliyi tərəfindən işsiz kimi qeydiyyata alınan 20 min şəxs üçün birdəfəlik vəsaitin bank filiallarına və poçt şöbələrinə köçürülməsini təmin edilib. Beləliklə, aprelin 9-dan etibarən artıq 75 min işsiz üçün bu yardım göstərilib.
Bununla yanaşı, pandemiya ilə mübarizə çərçivəsində eyni gündə daha bir tədbir görülüb. Belə ki, Azərbaycan Respublikasının Nazirlər Kabineti sosial baxımdan həssas əhali qrupuna aid edilən ailələrin üzvü olan tələbələrin təhsil haqqı xərclərinin ödənilməsi barədə Qərar qəbul edib. Maraqlıdır, sosial durumu yaxşılaşdırmaq üçün atılan bu addımlar yetərlidirmi?
Nyus.Az xəbər verir ki, İqtisadçı-ekspert Ruslan Atakişiyev Yenisabah.az-a açıqlamasında bildirib ki,bütün görülən tədbirlərdən sonra effektivliyi öyrənmək üçün monitorinq aparılmalıdır: “Görülən tədbirlər əslində kompleks tədbirlərdir. Dövlət tərəfindən həyata keçirilən bu tədbirlər ona yönəlib ki, əhalinin həssas qrupu daha az əziyyət çəksin, onlar mövcud vəziyyətdən normal şəkildə çıxa bilsinlər. Tədbirlər çərçivəsində kiminin təhsil haqqının ödənilməsinə yardım göstərilir, kiminə ərzaq göndərilir, kiminə birdəfəlik 190 manat verilir və s. Hesab edirəm ki, bütün bu tədbirlərdən sonra monitorinq aparılmasına ehtiyac var. Çünki fərqli situasiyalar mövcuddur və sui-istifadə halları ola bilər. Məsələn, bəzi şəxslər var ki, müqaviləsi olmasa da, qeyri-rəsmi şəkildə işlərini davam etdirirlər, məhsul satırlar, ticarətlə məşğul olurlar. Bəziləri də var ki, onların gəlir yeri yoxdur. Bu yardımlardan məhz ikinci qeyd etdiklərim yararlanmalıdırlar. Qiymətləndirmə aparmalıdır. Ünvanlılıq müəyyənləşdirilməlidir, yəni yardımın ehtiyac sahiblərinə nə dərəcədə çatdırıldı və təsir göstərdi bilinməlidir. Üçüncü olaraq isə bu məsələdə yaranan boşluqlar ortaya çıxarılmalıdır”.
Ekspert qeyd edib ki, yardım göstərilərkən ailə vəziyyəti nəzərə alınmalıdır: “Bu məsələləri mənim və yaxud başqa bir nəfərin gördüyü işlərlə müəyyənləşdirmək çətindir. Bu gün muzdlu işçilərlə bağlı dəstək proqramı var. Amma elə müəssisələr var ki, onların işi həqiqətən dayanıb, lakin kodları pandemiyada zərərçəkən müəssisələrin kodu sırasına düşməyib. Bu faktlar hərtərəfli araşdırılmalıdır. Boşluqlar üzə çıxırarılmalı və o boşluqlara uyğun addım atılmalıdır.190 manatın yetərli və yetərsiz olduğunu müəyyənləşdirmək sorğularla mümkündür. Əgər bir ailədə 4 nəfər varsa və təkcə bir nəfər işləyirsə, 190 manat yetərsizdir. Amma ailə həm 190 manat alırsa, həm uşağının təhsil haqqından azad olursa, həmçinin üzvlərdən biri ictimai işə düzəlirsə , bu yardım onlar üçün normaldır, yəni vəziyyətdən asılıdır”.
Nyus.Az
