Mən bir vətən itirmişəm...
Mən bir vətən itirmişəm
Bir gün gəzib tapam gərək.
Parça-parça birləşdirəm
Bütöv vətən yapam gərək.
Mən bir vətən itirmişəm
Adı Göyçə , Kərkük , Zəncan.
Mən bir vətən itirmişəm
Bütöv adı Azərbaycan
Qarış-qarış toparlayam
Bu qadadan , qandan sonra.
Qoruyam göz bəbəyi tək
Sahib çıxam bundan sonra.
Mən bir vətən itirmişəm
Axtarıram , sorağı yox.
Adı qalıb könüllərdə
Sərhəddi var , qırağı yox.
Güneyinə , Qüzeyinə
Barı indi durum yiyə.
İllərdi ki , əldə bayraq
Dolaşıram vətən deyə....
QATAR
Bir qatar fitinə qəribsəmişəm ,
Bir də ki vaqonda o səsə-küyə.
Neçə yol vağzala səhvən gəlmişəm ,
Gedim Naxçıvana qatarla deyə.
Gedirdi yolları fit verə -verə ,
Gedirdi uzanıb relslərin üstə.
Hərdən əylənirdi bir nəfəs dərə ,
Səbrsiz olurdu yol gedən kəs də.
Qəriblik hopurdu sərnişinlərə ,
Yorğunluq olurdu. Baxan duyurdu
Durub düşünürdü öz işin hərə ,
Adam da yollara baxıb doyurdu.
Vətən parçalandı , bağlandı yollar ,
Daha qatarların yolu kəsildi.
O vaxtı qatardan enib qalanlar,
Qatar gözləyirlər gör neçə ildi.
Mən də bu şəhərdə dönmüşəm yada ,
Dünyanın ən böyük dərdi mənimdi.
Gözlərim yer altda , adi Metroda ,
Durub o qatarı gözləyir indi.
Geri dönəmmirəm gəldiyim gündən ,
Bakı vağzalında qalmışam qardaş.
O qatar qurtarıb məni sürgündən ,
Bur gün Naxçıvana aparaydı kaş.
OLMASAYDIN
Yaxşı ki sən varsan neylərdim görən
Yanımda , başımda sən olmasaydın.
Mən kiməm , nəçiyəm bilərdim görən ?
Milli yaddaşımda sən olmasaydın.
Bu sivil dünyadan öncə də vardım,
Dağları əritdim , qayalar yardım,
İnan ki , büsbütün unudulardım,
Qobustan daşında sən olmasaydın.
Göy Tanrı adını göylərə sərdi,
Adın göy üzünə incə bir pərdi,
Bu canın içində ruh əriyərdi,
Qəlbimin başında sən olmasaydın.
Nyus.Az
