"Sınıq körpü” postunun rəisi Vüsal Nuriyevin maşını hazırda cərimə meydançasıdır

Martın 8-də axşam saatlarında Novxanı qəsəbəsində yol-qəza hadisəsi baş verib.

"90-AG-303” nömrə nişanlı, "Hundai Sonata” markalı, qara rəngli avtomobilin bir qadını vurduğu bildirilir.

Məlumatı verən mənbənin sözlərinə görə, vurulan şəxs hadisə yerində ölüb.

Əldə etdiyimiz məlumata görə, avtomobilin sürücüsü Dövlət Gömrük Komitəsinin "Sınıq Körpü” postunun rəisi Vüsal Nuriyevdir. Hadisə zamanı onun sərxoş vəziyyətdə olduğu bildirilir.

Gömrük rəsmisinin idarə etdiyi avtomobil də zədələnib.

Avtomobil hazırda Saray yolunda yerləşən "Cərimə meydançası"nda saxlanır.

"Cərimə meydançası"ının işçiləri də faktı təsdiqləyiblər.

Vüsal Nuriyevə yaxın mənbənin verdiyi məlumata görə, faktla bağlı öncə Abşeron Rayon Polis İdarəsində cinayət işi açılıb, sonra iş eyni rayonun prokurorluğuna yönləndirilib.

Polis İdarəsində işin müstəntiq Elçin Süleymanova tapşırıldığı bildirilsə də, o, deyilənləri təkzib edib. Lakin həmin polis idarəsinin adının açıqlanmasını istəməyən başqa bir mənbə deyilənləri təsdiqləyib.

"Vüsal Nuriyev Gömrük Komitəsinin sədri Səfər Mehdiyevin kadrıdır. Hətta deyilənə görə xalası oğludur. Ona görə də hadisəni ictimailəşdirmirlər”.

Abşeron Rayon Prokurorluğundan münasibət öyrənmək mümkün olmasa da, burada da işin Elçin adlı müstəntiqdə olduğu deyilib.

Hadisə yerində ölən qadının kimliyini hələlik dəqiqləşdirə bilməmişik.

Gömrük Komitəsi deyilənləri təkzib edib. "Sınıq körpü” postundan isə rəisin iş başında olduğu bildirilib.

"Biz də eşitmişik, amma doğru olub-olmadığını bilmirik. Rəis işə o maşında gəlmir”, - deyə adının açıqlanmasını istəməyən post yetkilisi deyib.

DİA.AZ xatırladır ki, bu haqda ilk olaraq məlumatı gununsesiaz.info saytı yaymışdı. Məlumatlara görə, Vüsal Nuriyev Səfər Mehdiyevin yaxın adamı olduğundan bu fakt ciddi-cəhdlə ört-basdırr edilir.