Hər kəsə bəllidir ki, Bakı şəhəri, Sabunçu rayonu, Zabrat dairəsində yerləşən “Louvre Plaza” şadlıq sarayında qol qoyulan qanunsuzluqlarla bağlı, indiyə kimi bəzi media qurumlarında silsilə tənqidi açıqlamalar yayımlanıb. Yayımlanan açıqlamalarda şadlıq sarayının rəhbərliyi ilə heç bir müqavilə sənədi bağlamadan işləyən ofisantların, aşbazların, soyuq yemək hazırlayanların əmək haqqlarının mənimsənilməsi və qol qoyulan digər qanunsuzluqların varlığı haqda məlumatlar geniş ictimaiyyətin diqqətinə də çatdırılıb. Əldə etdiyimiz müəyyən məlumatlara görə, “Louvre Plaza” şadlıq sarayı əslən Maştağa kəndindən olan Hacı Namiq və Hacı Faiq qardaşlarına məxsusdur və adı çəkilən hər iki qardaşın Bakı şəhərində “Təbrik”, “Mübarək”, “Badu-Kubə” və “Millenium” kimi şadlıq sarayları da var. Müəyyən çevrələrdə dolaşan söz-söhbətə görə, Hacı Namiq və Hacı Faiq qardaşlarına hansısa yüksək çinli vəzifə sahibi himayədarlıq etdiyindən, istər “Louvre Plaza” şadlıq sarayında, istərsə də digər şadlıq saraylarında qol qoyulan qanunsuzluqlara hər zaman göz yumulur. Bir sözlə, adlarını çəkdiyimiz bu şadlıq sarayları zaman-zaman hər kəsin diqqət və düşüncəsində problemlərin yaşandığı ünvan olaraq yaddaşlara həkk olunur.
Yəqin ki, 01 mart 2020-ci il tarixdə, saat 19:03 dəqiqədən saat 19:14 dəqiqəyə kimi “Louvre Plaza” şadlıq sarayında yaşanan biabırçılığın varlığı, bir daha bir kimsənin yaddaşından silinməyəcək. Çünki, yaxın tanışlarının birinin toy məclisində iştirak edən əməkdaşımızın da üz-üzə qaldığı birabırçılıq, düşünürük ki, hələ uzun müddət müzakirə mövzusu olacaq. Əməkdaşımızın verdiyi məlumata görə, toy məclisi başladıqdan təqribən bir saat sonra “Louvre Plaza” şadlıq sarayında işıqlar sönür. Həmin an süfrə arxasında əyləşən qonaqlar 11 dəqiqə ərzində zülmətə qərq olurlar və hər kəs məclis keçirilən zalın elektrik generatoru ilə işıqlandırılacağına ümid etsə də, ötən müddət ərzində onlar arzularını heç cür “çin edə” bilmirlər. O halda məclisdə iştirak edən qonaqlar arasında əməlli-başlıca çaşqınlıq, hay-həşir düşür, bəzi qonaqlar narazılıq edib zalı tərk edirlər ki, bu da “Louvre Plaza” şadlıq sarayı haqda hər kəsi düşünməyə sövq edir.
O halın varlığına diqqət yetirmək lazımdır ki, adı çəkilən bu şadlıq sarayının məclis keçirilən zalında təqribən 450-500 nəfər qonaq yerləşdirmək olur. Belə olan halda sual oluna bilər ki, görəsən şadlıq sarayının rəhbərliyi “ekstremal vəziyyət”lə bağlı niyə vaxtında qabaqlayıcı addımlarını atmır? Bəlkə, o, bunu özü üçün lüzum bilmir? Axı, bu gün 21-ci əsrdir və müasir üslubda inşa olunan hər bir şadlıq sarayı, o cümlədən “Louvre Plaza” şadlıq sarayı da hər an “ekstremal vəziyyət”ə hazır olmalıdır ki, əmələ gələn problemi zamanında aradan qaldırmaq mümkün olsun. Ona görə də, biz bu gün belə bir qənaətə gəlmişik ki, dünənki toy məclisində iştirak edən hər bir məclis iştirakçısı, məhz bu şadlıq sarayı ilə bağlı öz düşüncəsinə lazım olan yanaşmasını birdəfəlik həkk etdi. Yəni, “Louvre Plaza” şadlıq sarayındakı xidmətin göstəricisi, yeməklərin keyfiyyətsizliyi və s. onu sübut edir ki, bundan sonra müştərilər seçim edərkən bir daha yanılmayacaqlar. Çünki, ataların belə bir zərb məsəli var: “Eşşək palçığa bir dəfə batar”. Fakt odur ki, dünənki məclisdə iştirak edən hər kəs sanki bir təbliğatçıdır. Belə bir səbəb üzündən də, düşünürük ki, “Louvre Plaza” şadlıq sarayında yaşanan biabırçılıqlar, bundan sonra daha böyük çevrənin müzakirə etdiyi mövzulardan biri olacaq.
Onu da bildirək ki, “Louvre Plaza” şadlıq sarayını işlədən şəxslər xeyli müddətdir ki, daha çox müştəri toplamaq məqsədilə, ictimaiyyət arasında o qədər də nüfuz sahibi olmayan müğənnlilərdən də istifadə edirlər. Həmin müğənnilər açıq-aşkar formada olmasa da, dolayısı yollarla “karusel oyununun” iştirakçısı olurlar. Deyəsən belə bir halın varlığı, bu gün əks effekt verməkdədir. Bundan əlavə, bu şadlıq sarayının səlahiyətliləri yemək-içmək məsələsində də bir növ “karusel əməliyyatı” həyata keçirdikləri söylənilir. Yəni, həmin şəxslər sahiblik etdikləri şadlıq saraylarından hansında istifadə olunmamış və bişmiş vəziyyətdə olan toyuq ətləri və digər ərzaq məhsulları qalırsa, dərhal həmin ətləri və ərzaq məhsullarını məclis keçirilən şadlıq sarayına daşıyıb “müştərilərə sırıdıqları” söylənilir. Artıq belə bir halın varlığının əks effekt verməklə bərabər, çoxsaylı müştərilərin haqlı narazılığına da səbəb olmaqdadır.
P.S.Hörmətli oxucular! Onu da qeyd edək ki, adı çəkilən bu şadlıq sarayı “Azərbaycan Dəmir Yolları” QSC-nin sədri Cavid Qurbanova məxsus olsa da, adı çəkilən vəzifə sahibinin bu şadlıq sarayını əslən Maştağa kəndindən olan Hacı Namiq və Hacı Faiq qardaşlarına icarəyə verdiyi bildirilir.
