Bayıldakı sürüşmə ərazisindəki mənzillərindən köçürülən vətəndaşların bəzisi kirayə haqqının az olmasından şikayətçidir.
Səbayel Rayon İcra Hakimiyyətinin İctimai-siyasi və humanitar məsələlər şöbəsinin müdir müavini İsrafil Kərimov modern.az-a iddialarla razılaşmadığını bildirib: “Orada yaşayan sakinlərin heç birinin qeydiyyatı olmayıb. Evlərin hamısı qeyri-qanuni tikilib. Dövlət onları kirayə haqqı ilə təmin edərək, təhlükəsiz əraziyə köçürülməsini təmin edib. Onların heç biri Səbayel rayonun sakini deyil. Müxtəlif rayon sakinləri və məcburi köçkünlərdir. Hətta aralarında başqa yerlərdə mənzilləri olanlar da var. Onu da bildirim ki, kirayə haqlarını rayon icra hakimiyyəti müəyyən etmir, normativlərə uyğun olaraq Nazirlər Kabineti müəyyən edir. Biz sadəcə icraçı qurumuq. Ailə tərkibi 1-5 olanlara 200 manat, 6-7 nəfər olanlara 250 manat, 8 və daha çox olanlara 300 manat məbləğində 11 aylıq kirayə haqqı müəyyən edilib”.
İ.Kərimov bildirib ki, Bayıl sürüşmə ərazisində kirayə haqqı 100-150 manatadır:
“Həm də məcburi deyil ki, hamı Bayılda kirayəyə ev tutsun. Bakının 12 rayonu var, hansı onlara uyğundursa, orada da qala bilərlər. Biz buna etiraz etmirik, edə də bilmərik”.
İcra hakimiyyəti rəsmisi bəzi vətəndaşların kirayə haqqını almaqdan imtina etməsi məsələsinə də aydınlıq gətirib:
“Axı kim verilən puldan imtina edər? İmtina ediblərsə, demək, qalmağa yerləri var. Heç kim də imtina etməyib”.
Nazirlər Kabineti tərəfindən bu ərazidə yaşayan 98 ailənin 11 aylıq kirayə haqları bu cür müəyyənləşdirilib: ailə tərkibi 1-5 nəfər arası olanlara 200 manat, 6-7 nəfər olana 250 manat, 8-dən çox olanda 300 manat veriləcək. Məlumata görə, bugünədək sənədlərini təqdim etmiş 67 ailə üçün “Beynəlxalq Bank”ın Səbayel filialında açılmış hesaba köçürülüb və artıq sakinlər pullarını almağa başlayıb. Tam uçmuş 4 evin sahiblərinə isə birdəfəlik kompensasiya ödəniləcək.
“Bayıl sürüşməsinə görə sakinlərə veriləcək kirayə haqqı ədalətli deyil”.
Bu sözləri Əmlak Ekspert Mərkəzinin direktoru Ramil Osmanlı “Yeni Müsavat”a açıqlamasında bildirib. Ekspertin fikrincə, icra hakimiyyəti bir qədər bu məsələdə xəsisliyə yol verib:
“Yəqin həmin ərazidə fərdi yaşayış evlərinin kirayə haqqını nəzərə alıblar. Lakin ailə tərkibi baxımından məsələyə yanaşsaq, bu, ədalətsizlikdir. Məsələn, 7-8 ailə üzvü ən azı 3 otaqlı mənzil tələb olunur. Halbuki Bayılda, hətta Qobustanda belə 3-4 otaqlı mənzillər üçün 270-280 manat vəsait azdır. Buna görə də mən hesab edirəm ki, deyilən rəqəmlər azdır. Bu rəqəmlərin üzərinə minimum olaraq 20-25 faiz artırmaq lazımdır.
Bakıda hazırda kirayə qiymətləri kifayət qədər yüksəkdir. Fərdi yaşayış evlərinin qiymətləri nisbətən aşağıdır".
Paytaxtdakı kirayə evlərin qiymətləri ilə bağlı maraqlandıq. Ev alqı-satqısı, kirayəsi ilə məşğul olan makler Tahir Cəbiyev “Yeni Müsavat”a danışarkən bildirdi ki, hazırda paytaxtda orta təmirli 1 otaqlı mənzillər 250 manatdan başlayır:
“Kirayə haqları əsasən şəraitdən, təmirdən asılıdır. Məsələn, elə evlər var ki, 2 otaqlıdır, hər cür şəraiti var, 700-800 manatadır. Eləsi də var ki, orta təmirli 3 otaqlıdır, qiyməti 500 manatdır. Şəhər mərkəzlərində qiymətlər daha bahadır. Lakin mərkəzdən kənarda orta təmirli mənzilləri 300-350 manata kirayələmək olur”.
Xalidə GƏRAY,
“Yeni Müsavat”
