Bakı Apelyasiya Məhkəməsində Milli Təhlükəsizlik Nazirliyinin Antiterror Mərkəzinin rəisi, general-mayor Elçin Quliyev və mərkəzin əməkdaşı, polkovnik Azər Mehdiyevin barələrində olan hökmdən verilən apelyasiya şikayəti üzrə məhkəmə iclası davam edir. Hakim Sahibxan Mirzəyevin sədrliyi ilə keçirilən prosesdə Elçin Quliyevin vəkili Ziyad Abbaszadə vəsatətlə çıxış edib və iclasın qapalı keçirilməsini istəyib. Məhkəmə vəsatəti təmin etməyib.
Elçin Quliyev həbs ediləndən sonra Eldar Mahmudova qarşı çıxan yeganə MTN generalıdır. Digər həbsdəki MTN-çilər barəsində məhkəmə prosesi qapalı keçirilsə də, Elçin Quliyevin işi üzrə proses açıq keçirilir. Sonuncu prosesdə onun vəkili MTN-in 2013-cü ildə keçirdiyi “Şimal küləyi” və “Qərb qütbü” əməliyyatlarına ayrılan vəsaitlə bağlı Elçin Quliyevə ittiham verildiyini deyib.
Bildirib ki, pulların ayrılması ilə bağlı və həmin sənədlərin məhv edilməsi barədə nazir Eldar Mahmudovun və nazir müavini Hilal Əsədovun əmri olub: “Bu işlə bağlı heç bir araşdırma aparılmadan Elçin Quliyevə 7 milyon 736 min 58 manat ittiham verilib. Xahiş edirik ki, bu məsələnin araşdırılması ilə bağlı ekspertiza təyin olunsun”.
Elçin Quliyev isə bildirib ki, ondan heç kim hansı agentə nə qədər pul verdiyini soruşmayıb: “Bu pulların verilməsi ilə bağlı maliyyə idarəsinin heç bir məlumat olmayıb, ola da bilməz. Çünki mənim səlahiyyətimdə olan agentimi heç kim tanımayıb. Mən agentlərimi rəhbər şəxslərə deyə bilərəm. Maliyyə İdarəsinin arayışı əsasında bu məsələ araşdırılıb”.
Elçin Quliyev bildirib ki, mərhum müavini, polkovnik İlqar Əliyevin öz agenti olub:
“Mən də onun agentlərini tanımamışam. Nazirin də, nazir müavininin də öz agenti olub. Heç birimizin agentini tanımamışıq, bu iş məxfi saxlanılıb. Mən heç bir dövlətin pulunu mənimsəməmişəm. Əgər bu qədər pulu mənimsəsəydim, villalarım, obyektlərim olardı. Bu gün banka borcum var”.
Məhkəmə bu vəsatəti də baxılmamış saxlayıb. Elçin Quliyevin vəkili həmçinin MTN polkovniki Malik Mustafayevin intihar etməsi barədə düzgün araşdırma aparılmamasını deyib, bununla bağlı mütəxəssisin rəy verməsini istəyib. Hakim bu vəsatəti də təmin etməyib.
E.Quliyevə verilən ittihamlardan biri də MTN polkovniki Malik Mustafayevin intihar həddinə çatdırılması ilə bağlıdır.
E.Quliyevin vəkili deyir ki, bu ölüm hadisəsi ilə bağlı düzgün araşdırma aparılmayıb: “Biz yenidən ekspertiza keçirilməsini istəyirik”.
Yada salaq ki, Milli Təhlükəsizlik Nazirliyinin polkovnik rütbəli əməkdaşı Malik Mustafayev 2014-cü ildə intihar edib. Onun qardaşı Mətləb Mustafayev mətbuata açıqlamalarında bildirib ki, qardaşı o dövrdə ATM rəisi olan Elçin Quliyevlə söhbətdən sonra intihar edib.
Sitat: “Qardaşım, 31 il MTN-də işləmiş, bu orqanın fəxri əməkdaşı, Qarabağ müharibəsi veteranı, 2011-ci ildən polkovnik rütbəsi daşıyan Mustafayev Malik Nəriman oğlu nazir Eldar Mahmudovun qəbuluna girərək, mənə qarşı aparılan bu kampaniyaya son qoymağı xahiş edib. Eldar Mahmudov isə ona bildirib ki, ”sənin qardaşın Mövlan Şıxəliyevin, Elçin Quliyevin tələb etdiyi ifadələri verməsə, nəinki onu, sənin bütün qohum-əqrəbanı həbs etdirəcəyəm".
Bunun nəticəsi də o oldu ki, 17 oktyabr 2014-cü il tarixdə kiçik bacım Hümbətova İradə Nəriman qızının yaşadığı Binəqədi rayonu Rəsulzadə qəsəbəsindəki həyətə Elşən Murtuzovun rəhbərlik etdiyi 10 nəfərlik qara maskalı şəxslər daxil oldular. Onları avtomat gücünə həyətə çıxararaq, özləri ilə gətirdikləri narkotiki evə qoymaq istəsələr də, alınmadı. Evin altını üstünə çevirdilər və öz məqsədlərinə çata bilmədən çıxıb getdilər. Qardaşım bu hərəkətlərdən sonra özünə gələ bilmədi. Qardaşım 1 noyabr 2014-cü ildə Elçin Quliyevin qəbuluna getdi. Elçin Quliyev qardaşıma nə dedisə, 2 gün sonra öz yaşadığı həyətdə özünü asaraq intihar etdi".
Mətləb Mustafayev qardaşının ölümündə Elçin Quliyevi, keçmiş nazir Eldar Mahmudovu və digər adını çəkdiyi MTN əməkdaşlarını görür.
Qeyd edək ki, E.Quliyev apelyasiya şikayətində Bakı Hərbi Məhkəməsində çıxarılan hökmün ləğvini və ona bəraət verilməsini istəyib.
E.HÜSEYNOV,
“Yeni Müsavat”
