Hər kəsə bəllidir ki, təcili tibbi yardıma ehtiyac olan zaman "103" mərkəzi dispetçer xidmətinə zəng vurmaq lazımdır. Təəssüflər olsun ki, ölkənin bütün rayonlarında fəaliyyət göstərsə də, Bakının, necə deyərlər, düz “qulağının dibində” yerləşən Abşeron rayonunda bu xidmət işləmir. Məsələn, Ağdaş rayonunda günün istənilən saatında “103” nömrəsinə yığıb, təcili tibbi yardım çağırmaq mümkündür. Ancaq Xırdalan şəhərindən “103”-ə zəng vurduqda, dispetçerlər bildirirlər ki, Xırdalan onların ərazisi olmadığına görə, (012) 342-28-11 nömrəsinə zəng edərək təcili tibbi yardım çağıra bilərlər.
Bu müəmmanı araşdırmaq üçün əvvəlcə Nəqliyyat, Rabitə və Yüksək Texnologiyalar Nazirliyi ilə əlaqə saxladıq. Nazilikdən AYNA-ya bildirildi ki, “103” qısa nömrəsi Səhiyyə Nazirliyi (SN) tərəfindən alındığına görə, bütün məsələlərə SN cavabdehdir.
SN Bakı Şəhər Təcili və Təxirəsalınmaz Tibbi Yardım Stansiyasından (BŞTTTYS) öyrəndiyimizə görə isə, “103” dispetçer xidməti ancaq Bakı və Bakıətrafı rayonlara xidmət göstərir: “Rayonlardan “103”-ə zəng edəndə, birbaşa həmin rayonun öz təcili tibbi yardımına düşmək mümkündür. “012103” nömrəsini yığdıqda isə Bakı şəhərindəki təcili tibbi yardımın mərkəzi dispetçer xidməti ilə əlaqə yaranacaq. Ancaq rayonlara təcili tibbi yardım göndərə bilmədiyimizə görə, həmin çağırışı elə həmin rayonun təcili tibbi yardımına yönləndiririk”.
“Abşeron rayonu və Sumqayıt şəhəri isə, ümumiyyətlə “103” xidmətinə aid olmadığına görə 7 rəqəmli nömrə ilə əlaqə saxlamaq lazımdır. Biz özümüz belə, lazım olanda həmin nömrə vasitəsilə əlaqə qururuq. Bunun hansı səbəbdən belə olmasını isə bilmirik”, - deyə BŞTTTYS rəsmisi qeyd etdi.
Sualımıza bu qurumdan da cavab almadığımıza görə, Səhiyyə Nazirliyinin Təcili və Təxirəsalınmaz Tibbi Yardım Stansiyası (TTTYS) ilə əlaqə saxladıq. Stansiyanın baş həkimi Mirələm Cəlalov dedi ki, nəinki Abşeron və Sumqayıt, heç Bakı şəhəri də TTTYS-yə tabe deyil: “Hazırda 12 məntəqəmiz var, onlar reanimasiya briqadalarından ibarətdir. Bizə, ancaq yol qəzalarında və xəstəxanalarda ixtisaslı mütəxəssis çatışmadıqda xəstəxana rəhbərliyi tərəfindən müraciət olunur, həkimlərimiz ancaq hadisələr baş verdikdə çağırışlara gedirlər. Bizdə dispetçer xidməti isə “103” yox, “113”-dür”.
“Abşeron və Sumqayıt məsələsinin isə hansı səbəbdən bu formada olması mənimçün də qaranlıqdır. Ola bilsin ki, burada texniki problem mövcuddur. Bir aralar Siyəzən rayonundan “103”-ə zəng vuranda, Şabran rayonunun təcili tibbi yardım mərkəzinə düşürdü. Bu problem də, düşünürəm ki, telefon xətti ilə əlaqəli ola bilər. Həmçinin, indi struktur da bir qədər qəribədir, rayonlarda “103” mərkəzi rayon xəstəxanalarına tabedir”, - deyə M.Cəlalov vurğuladı.
Abşeron rayonundan təcili tibbi yardım çağırmaq üçün verilən nömrə - (012) 342-28-11 ilə əlaqə saxladıqda isə bu cavabı aldıq: “Abşeron rayon ərazisindən “103”-ə zəng vuranda gah bizə düşür, gah da mərkəzi dispetçerə. Düşünürük ki, bu, ATS-lə bağlı olan problemdir”.
Təəssüflər olsun ki, aldığımız cavabların heç biri qanedici olmadı. Əksinə, problem yumaq kimi uzandı, kələfin ucunu isə tapa bilmədik. Ümid edirik ki, problemlə birbaşa bağlı olan səlahiyyətli qurumlar Abşeron və Sumqayıt şəhərində yaşayan sakinləri nəzərə alacaq, onların da “103” xidmətindən normal şəkildə istifadə etmələrinə şərait yaradacaq. //ayna.az//
