Azərbaycanda 2018-ci ildən etibarən hakimiyyət bir sıra struktur və kadr dəyişkliyi aparıb. JAMAZ.İNFO xəbər verir ki, indiyə qədər bir neçə komitə və nazirlik ləğv edilərək, digərləri ilə birləşdirilib. Bundan əlavə, uzun illərdir vəzifə başında olan xeyli sayda məmur da postlarını itiriblər. Əldə etdiyimiz məlumatlara görə, hakimiyyət prosesi bununla yekunlaşdırmaq fikrində deyil. Yeni ildən etibarən daha bir neçə struktur və kadr dəyişikliyinin baş verəcəyi gözləniləndir.
JAMAZ.İNFO-ya daxil olan məlumatlarda deyilir ki, yeni ilin ilk təyinatı Xarici İşlər Nazirliyində baş verəcək. Belə ki, Elmar Məmmədyarovun vəzifəsindən alınacağı nəzərə tutulub. Saytın yaydığı məlumatda AZAL-ın da rəhbəri Cahangir Əsgərovun işdən şıxarılacağı vurğulanır. Qeyd edilir ki, ölkənin aparıcı sahələrindən biri olan aviasiya sektoruna gənc rəhbər təyin ediləcək. Həmin şəxsin adı açıqlanmasa da, hal hazırda aparıcı şirkətlərdən birində marketinq sahəsinə rəhbərlik etdiyi deyilir.
Ölkənin ən həssas yeri olan seçki məsələsi günümüzün əsas mövzusudur. Qısa müddətdə iki seçki keçirməyi qərarlaşdıran hakimiyyət artıq bu sahəyə də əl gəzdirməyə hazırlaşır. JAMAZ.İNFO xəbər verir ki, fevralda keçiriləcək parlament seçkilərindən sonra MSK-nın rəhbəri Məzahir Pənahovun görəvindən alınacağı gözlənilir. Eyni zamanda, MSK-nın tərkibi də dəyişəcək. Məzahir Pənahovun hansı vəzifə alacağı bəlli olmasa da, onun yerinə kimin gətiriləcəyi artıq bəllidir. Məlumatlara görə, MSK-nın yeni sədri Rövzət Qasımov olacaq.
P.S. Onu da bildirək ki, bütün bunlar əldə olunmuş məlumatlardır və onların nə qədər dəqiq olacağını zaman göstərəcək.
Nyus.Az
