İsmayıllı: Yapon qonaqlar və 50 qəpiklik Zərnava körpüsü.



SSRİ dönəminin sonuna yaxın siyasətbaz yumoristlərin bir lətifəsi var idi: Demək, Yaponiyadan gələn qonaqlar Sovetlər İttifaqında bir çox idarə, müəssisə və təşkilatlarda olurlar. Səfərin axırında yaponlardan təəssüratlarını soruşurlar. Hər biri elə eyni sözü təkrarlayır: «Sizin möcüzə uşaqlarınız var». Ev sahiblərindən biri axır ki, dözməyib nəyə görə məhz uşaqları təriflədiklərini onlardan soruşur. Cavab verirlər: «Qalan nəyi ki əlinizlə yaradırsınız — pisdir». Azərbaycanın İsmayıllı, Yaponiyanın İto şəhərləri arasındakı qardaşlaşma sazişindən sonra artıq neçə ildir ki, işgüzar əlaqələr, müəllim və şagirdlərin qarşılıqlı səfər mübadilələri davam etməkdədir. Rayon rəhbərliyi xəbər yayır ki, yapon qonaqlar İsmayıllıda olduqlarI müddətdə rayonun gəzməli-görməli yerlərinə səyahət edib, tariximizi, mədəniyyət və məişətimizi öyrənmək üçün Lahıc və Basqal qəsəbələrində, İvanovkada və digər yaşayış məntəqələrində, ələlxüsus da məktəblərdə olublar. Yəqin ki, uşaqlarımızı bəyəniblər. Amma əminik ki, gündoğar ölkədən olan turistlərə bizim İsmayıllıda olarkən müşahidə etdiyimiz yerlərə aparsaydılar, həmin lətifədəki kimi rəy bildirərdilər. İsmayıllı rayonunun Lahıc kəndinə gedən yolun sağ tarəfində yerləşən körpü Azərbaycanın ən şıltaq çaylarından biri olan Girdmançayın üzərində 1969-cu ildə salınmışdır. Məlumata görə, məşhur «Yeddi oğul istərəm» bədii filminin bəzi epizodları bu körpüdə çəkilib.



Artıq 50 ildir ki, öz funksiyasını yerinə yetirən körpü bu yaxın zamana qədər yararsız vəziyyətə düşmüşdü. Hətta 1997-ci ildə körpü dağılmışdı. Amma iki il sonra o vaxtlar yeni yaranan Zərnava kənd bələdiyyəsi yerli əhalinin köməyi ilə körpünü təmir etdirib hazır vəziyyətə gətirmişdir. Körpünün uzunluğu 28 metrdir və Zərnəva kəndinə gedən ən vacib piyada yoludur. Kənd camaatı demək olar ki, hər gün bu yoldan istifadə edir. Hətta körpünün başında kənd uşaqları meşələrdən yığdıqları məhsulları (kəklikotu,qaratikan və s.) satırlar. Körpünün başına bir lövhə yazıb asıblar ki — Körpüyə 2 nəfərdən artıq şəxsin çıxmağı qadağandır. Adəti üzrə məhəl qoyan yoxdu. İyirmi — otuz nəfər birdən keçir ki, bu da körpünü dağılmaq riski altında qoyaraq insanların həyatı üçün təhlükə vəd edir. Lövhə olan yerdə yerli bələdiyyədə işləyən bir nəfər dayanıb adamın birini 50 qəpikdən buraxır. Qanunsuzdur, çünki, gün ərzində bu yolla orta hesabla yığılan 300-500 manat pul heç də körpünün möhkəmləndirilməsinə sərf olunmur, kimlərinsə cibinə axır. Körpünün həndəvərindəki yol da avtomobillər üçün narahatdır. Yoldan sürüşən maşın suyu çəkilmiş çayın düz dibinə — hündürlükdən uçuruma yuvarlanacaq. Belə qəzaya düçar olanın salamat qurtarmaq ehtimalı çox azdır. Zərnava bələdiyyəsinin sədri Afaq xanıma zəng açıb körpü ilə bağlı suallarımızı verdik. Dedi ki, bələdiyyə yalnız pul yığır, körpünün vəziyyətinə isə yol istismar idarəsi cavabdehdir. Suallarımızı dərinləşdirəndə isə Afaq xanım telefonun dəstəyini yanındakı kişi xeylağına — ərinə verdi. Kişi isə bizə dedi ki, narahat olmağa dəyməz, körpü uçan deyil. Ümumiyyətlə, müşahidə etdik ki, İsmayıllı rayonunun kəndiçi yollarının vəziyyəti qənaətbəxş deyil. İsmayıllı 9 saylı Yol İstismar İdarəsinin rəisi Rəşad Cəfərova da zəng açdıq. O isə öz növbəsində günahı Xüsusi Təyinatlı Yİİ-nin üstünə atdı. Ancaq İsmayıllıya girər girməz qara tüstüsi ilə rayonu ağuşuna alan və ekologiyanı korlayan asfalt zavodların müdirinin qara əməlləri göz çıxardır.



https://www.youtube.com/watch?v=NasBj_gOty8&feature=youtu.be