Bakı Ağır Cinayətlər Məhkəməsində qəsdən adam öldürməyə cəhddə ittiham olunan 41 yaşlı Mehdi Piriyevin cinayət işi üzrə məhkəmə prosesi keçirilib.
Virtualaz.org-un xəbərinə görə, məhkəmədə elan olunub ki, Mehdi Piriyevin bıçaqladığı Ülviyyə Məmmədova hələ də müalicə alır və səhhətindəki problemlərə görə məhkəmədə iştirak edə bilmir.
Prosesdə zərərçəkmişin anası Gülizar Məmmədova ifadə verib. G. Məmmədova deyib ki, qızı boşandıqdan sonra uzun müddət aliment ala bilməyib. Problem və mübahisələr də bu üzdən başlayıb. Hadisə baş verən gün həyətdən qışqırıq səsi gəldiyini eşidib, çölə qaçıb: "Qızım yerdə uzanmışdı. Qışqırırdım, köməyə adam çağırırdım, deyirdim balamı öldürüblər, kömək eləyin. Heç kim yox idi. Sonra Mehdinin qardaşları gəldi, qızımı maşına qoyub xəstəxanaya apardıq. Mehdinin böyük qardaşı maşında mənə dedi ki, bilmirdiniz ki, alimentə görə maşına həbs qoyduranda belə olacaq?"
Tərəflərin suallarını cavablandıran G.Məmmədova qızının müalicəsinə 30 min manat xərclədiyini deyib. Bildirib ki, Mehdi Piriyevin ailəsi müalicə üçün 3 min manat xəstəxana xərclərinə kömək edib.
G.Məmmədova əlavə edib ki, qızın keçmiş həyat yoldaşı ilə qonşudurlar.
Prosesdə şahid qimsində təqsirləndirilən şəxsin qardaşı Rövşən Piriyev də ifadə verib. O, hadisə vaxtı həyətdə olmadığını deyib: “Mən evdə idim. Oğlum çağırdı, dedi ki, ata, tez həyətə gəl. Tez həyətə düşdüm. Maşının yanında Ülviyyənin yerdə uzandığını gördük. Qardaşım da maşını gətirdi. Ülviyyəni qucağımda maşının arxasına qoydum, "Semaşko"ya apardıq".
R.Piriyev hadisə zamanı Mehdinin orada olmadığını, hadisə yerindən uzaqlaşdığını deyib: “Hadisənin hansı səbəbdən baş verməsi ilə bağlı Ülviyyənin anasına heç nə deməmişəm” .
Məhkəmə prosesi davam edir.
Qeyd edək ki, hadisə Abşeronda baş verib. Mehdi Piriyev boşandığı həyat yoldaşı, 1981-ci il təvəllüdlü Məmmədova Ülviyyə Elxan qızının yaşadığı evə gələrək, ona bıçaqla zərbələr endirib.
Yaralı xəstəxanaya çatdırılıb. Hadisəni törədən M.Piriyev könüllü olaraq polisə təslim olub. Boşanan cütlüyün iki övladı var.
M.Piriyevə qarşı Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə ittiham irəli sürülüb. (Virtualaz.org)
Nyus.Az
