Nyus.Az xəbər verir ki, bunu Trend-ə azərbaycanlı gimnast Marina Nekrasova deyib.
Gimnast qeyd edib ki, o, Bakıda keçiriləcək idman gimnastikası üzrə Dünya Kubokunda çətinləşdirilmiş proqramla çıxış edəcək: "Mən bu yarışda müxtəlif hündürlüklü qollarda və dayaqla tullanmada iştirak edəcəyəm. Hazırda proqramın çətinləşdirilməsi üzərində işləyirəm. Biz proqramı 0,4 xal çətinləşdiririk".
O, məşqləri davam etdirdiyini bildirib: "Hazırlıq tam sürətlə davam edir. Çalışacağam ki, hər şeyi plana uyğun yerinə yetirim. Hələ ki, hər şey yaxşı gedir".
Rəqibləri barədə danışan M.Nekrasova vurğulayıb ki, turnir kifayət qədər zəngin olacaq: "Əvvəlki Dünya kuboklarının yekunlarını təhlil etsək, Rumıniya, Avstraliya, Çin və Özbəkistan nümayəndələrini qeyd etmək olar. Mən mübarizə aparacağam və yaxşı nəticələr qazanacağıma ümid edirəm".
Qeyd edək ki, 15-18 mart tarixlərində Bakı idman gimnastikası üzrə 3-cü FIG Dünya Kubokunu qəbul edəcək. Turnirdə 27 ölkədən 163 gimnast iştirak edəcək.
