Nyus.Az apasport.az-a istinadən xəbər verir ki, Latviya millisinə rəhbərlik edən Aleksandr Starkov yığmamızın çalışdırıcısı Qurban Qurbanovla dəfələrlə qarşılaşıb.
Bu, latviyalı mütəxəssisin Azərbaycanda çalışdığı dövrə təsadüf edib. 2011-ci ilin yanvarından 2012-ci ilin martınadək "Bakı"nı çalışdıran Starkov həmin vaxt da "Qarabağ"ın "sükanı arxası"nda olan Qurbanovla duellərə çıxıb.
Düzdü, onlar əvvəllər də görüşüb. Lakin 2011-ci ilə qədərki duellər zamanı Starkov məşqçi, Qurbanov futbolçu ampluasında olub. Hər iki mütəxəssisin baş məşqçi postundakı duelləri isə məhz "Bakı"yla "Qarabağ"ın matçlarında yaşanıb.
Belə qarşılaşmalar isə 4 dəfə qeydə alınıb. 2010/11 mövsümünün ikinci yarısında Premyer Liqaya təsadüf edən matçlarda qalib müəyyənləşməyib. "Bakı"nın meydanında qolsuz bərabərlik, "Qarabağ"ın ev oyununda isə 2:2 hesabı qeydə alınıb.
Premyer Liqanın 2011/12 mövsümünün I mərhələsindəki qarşılaşmalarda isə Qurbanov latviyalı qonağı üstələyib. Ağdamlılar evdə 2:1 hesabı ilə qalib gəlib, 2012-ci il fevralın 15-də isə səfərdə darmadağını gerçəkləşdirib - 3:0. Bu yenilgi də Starkovun kreslosunu əməlli-başlı laxladıb. Nəticədə 1 ay keçməmiş "Bakı" latviyalı ilə yollarını ayırıb. Əslində isə həmin mövsüm komandaları daha iki duel gözləyirdi. Kubokun yarımfinalı və çempionatın II mərhələsində Qurbanov Starkovsuz "Bakı"ya rəqib olub.
Bir sözlə, baş tutan 4 görüşdə 2 dəfə "Qarabağ" qalib gəlib, 2 dəfə heç-heçə yaşanıb. Starkov isə qələbəyə həsrət qalıb.
Qurbanov - Starkov duelləri (hər ikisi baş məşqçi)
16.04.2011. "Bakı" - "Qarabağ" - 0:0
01.05.2011. "Qarabağ" - "Bakı" - 2:2
28.10.2011. "Qarabağ" - "Bakı" - 2:1
15.02.2012. "Bakı" - "Qarabağ" - 0:3
