Ulviyyə Hacılı və Pərvanə Rəhimlinin sosial şəbəkələrdə paylaşdığı bir statusdan xəbər tutduq. Hər iki xanım yeni il ərəfəsi ucqar dağ kəndində yaşayan uşaqlar üçün maraqlı və sevindirici çağırış etməyə qərar veriblər. Sosial şəbəkələrdə '' Şəhərdən sovqat var'' adlı event yaradaraq özləri bu işə qoşulan ilk könüllülər kimi şəhərdə yaşayan uşaqlara və valideynlərə müraciət ediblər. Dekabr ayından etibarən silsilə olaraq başladıqları səyahətin ilk ünvanı İsmayıllı rayonunun ucqar dağ kəndi İstisu olacaq. Özləri ilə söhbət zamanı dedilər ki, ucqar dağ kəndində yaşayan uşaqları sevindirmək ideyası barədə çoxdan düşünüblər. Qeyd edək ki ''Şəhərdən sovqat var'' layihəsindən əldə olunan hədiyyələr ucqar kəndlərə bu iki xanımın təşəbbüsüylə yalnız xanımlardan ibarət olan komanda vasitəsilə çatdırılacaq. Yeni il ərəfəsində Azərbaycanın ucqar bölgələrində yaşayan balaca dostlarımızı sevindirmək üçün yola çıxırıq, bu həm də bizi çox həyəcanlandırır deyən Pərvanə və Ülviyyənin sizlərə sözü var :
Əziz balaca dostlar, atalar və analar! Bu layihəni sözsüz sizlərin vasitəsilə həyata keçirəcəyik. Hədiyyələri, şəkilli kitabları, oyuncaqları, puzzları balaca dostlarınıza göndərmək sizdən birbaşa ucqar kəndlərə aparmaq bizdən. Məqsədimiz ucqar kəndlərdə yaşayan balaca balaları yeni və sizin daha az istifadə etdiyiniz, istifadəyə yararlı şəkilli kitab, oyuncaq (kəsici, iti, olmayan ), rəsm albomu, çanta və karandaşlardan sovqat hazırlayıb sevindirməkdir. İlk hədəfimiz İsmayıllı rayonunun ucqar dağ kəndi İstisuya getmək və sizlərin hədiyyələrini Şaxta nənə və Qar qız ilə onlara çatdırmaqdır.
Bizə dəstək verəcəyinizə inanır və minnətdarıq. Lütfən yolumuzu gözləyən balaca dostlarımızın təbəssümünə siz də səbəb olun. Qeyd edək ki hədiyyələrin son toplanma tarixi dekabrın 23-nə qədərdir. Biz Ülviyyə və Pərvanə xanımın təqdirəlayiq çağırışına hər birinizin həvəslə dəstək cavabı verəcəyinizi gözləyirik.