Bakı Apelyasiya Məhkəməsində sabiq nəqliyyat naziri Ziya Məmmədovun müşaviri Çingiz Baxşıyevin həbs etdirdiyi qohumu Rövşən Əhmədovun işi üzrə proses davam edir. Ötən sayımızda proses və ətrafında baş verən məsələrlə bağlı “Ziya Məmmədovun müşaviri böyük pulları kimə verib - qalmaqallı iddialar” http://musavat.com/news/ziya-memmedovun-musaviri-boyuk-pullari-kime-verib-qalmaqalli-iddialar_502529.html sərlövhəli yazı dərc etmişdik.
Bundan sonra redaksiyamızla əlaqə saxlayan Çingiz Baxşıyevin vəkili Ceyhun Yusifov bildirib ki, Rövşən Əhmədovun Çingiz Baxşıyev haqda fikriləri doğru deyil: “Rövşən Əhmədov bu günə qədər 3 dəfə məhkum olunub, narkotik vasitələrlə bağlı 2 gün əvvəl onun qaynı 5-ci dəfə məhkum olundu”.
C.Yusifov deyir ki, Rövşən Əhmədov 1 günün içində 700 min manat dəyərində 3 mənzili hansı hesabdan almasına aydınlıq gətirməlidir: “Desin görək respublikanın 5 regionunda qızıl-zinət əşyalarını necə satıb. Mətbuatda Çingiz Baxşıyevlə bağlı əsassız fikirlər səsləndirməklə nəyəsə nail olmayacaqlar. 700 minlik əmlakları necə almasını açıb deməlidir. Məhkəmədən yayınmasının səbəbini deməlidir. Çingiz Baxışovun yanına barışıq üçün adamlar göndərirlər. Bunu niyə edirlər?”
Vəkil deyib ki, R.Əhmədov suçlu deyilsə, məhkəmədə iştirakdan yayınmamalıdır. Onu xəstə olmasını da qəbul etmir.
Qeyd edək ki, R.Əhmədov keçmiş nəqliyyat naziri Ziya Məmmədovun sabiq müşaviri, Avtonəqliyyat Xidmətinin keçmiş rəisi Çingiz Baxşıyevin, onun qızları Fatimə İbrahimova ilə Sevil Baxşiyevanın qızıllarını mənimsəməkdə ittiham edilib. İttihama aktına əsasən, o, qohumu Ç.Baxşıyevə məxsus 800 min manat dəyərində qızıl-zinət əşyalarını ələ keçirib. 2016-cı il aprelin 18-də R.Əhmədova qarşı Cinayət Məcəlləsinin 178-ci (dələduzluq) maddəsi ilə ittiham irəli sürülüb. Barəsində Nərimanov Rayon Məhkəməsinin qərarı ilə 4 aylıq həbs qətimkan tədbiri seçilib. 17 sentyabr 2016-cı ildə ona CM-in 179.3.2-ci (mənimsəmə, külli miqdarda) maddəsi ilə yeni məzmunda ittiham elan edilib. Bakı Ağır Cinayətlər Məhkəməsinin hökmü ilə R.Əhmədovun barəsində bəraət hökmü çıxarılıb və o, məhkəmə zalından azadlığa buraxılıb. Daha sonra bu qərardan protest verilib. Hazırda iş üzrə araşdırmalar davam edir.
Onu da bildirək ki, R.Əhmədov yaşadığı evdə dərman içib. Ailə üzvləri onu 1 saylı Kliniki Tibbi Mərkəzə (Semaşko) çatdırıb. Onun həyatını xilas etmək mümkün olub. R.Əhmədovun cibindən məktub çıxıb. O, məktubda intihara cəhd etməsinin səbəblərini qeyd edib. Bildirib ki, intihar cəhdinə səbəb Çingiz Baxşıyevdir. Həmçinin ailəsinin təhlükədə olduğunu qeyd edib.
E.MƏMMƏDƏLİYEV
Musavat.com
