Şəki Azərbaycanın rayonları arasında gözəl təbiəti, qədim və nəfis memarlıq abidələri, adamlarının şirin ləhcəsi, yumor hissi və əlbəttə ki, ləziz mətbəxi ilə seçilir. Şəkiyə qonaq olan hər kəs yerli şirniyyat olan Şəki paxlavasından (Şəki halvası) dadmağı vacib bilir. Maraqlı resepti olan şirniyyat növünün xanlıq dövründə meydana gəldiyini deyənlər də var, onun daha əvvəllər icad edildiyini qeyd edənlər də.
Hazırda Şəkidə 60-dan çox halvaçı dükan və sexləri fəaliyyət göstərir. Paxlava bişirən ustaların əksəriyyətinə bu peşə ata və babalarından miras qalıb. Rəhmətlik Əliəhməd kişi hamıdan yaxşı bişirdiyi üçün onun adı daha çox məşhurlaşıb.
Şəki şəhərində Mirzə Fətəli Axundov küçəsi – 122 ünvanda yerləşən Əliəhməd Şirniyyat Evinin rəsmi saytında və bu şirniyyat evi haqqında reportaj hazırlamış KİV-də qeyd edilir ki, Şirniyyat evinin tarixi XX əsrin 50-ci illərindən başlayır. Belə ki həmin vaxtlarda Şəkidə Əliəhməd Əliəkbər oğlu Qaffarov Şəki halvası istehsal edən şirniyyat evini yaratmışdır. İlk illər kiçik olan həmin müəssisədə yalnız Əliəhməd kişi və ailə üzvləri çalışırdılar. Əliəhməd kişinin övladları böyüdükdən sonra bu işdə atalarına kömək ediblər. Əliəhməd kişinin 2004-cü ildə vəfatından sonra onun övladları atalarının şirniyyatla bağlı peşəsini davam etdirirməkdədirlər. Hazırda bu şirniyyat evində Əliəhməd kişinin övladları olan Məmmədsaleh Qaffarov və Xosrov Qaffarov qardaşları çalışır.
Bu müəssisədə usta halvaçılar tərəfindən 100% təbii inqrediyentlərlə, əl əməyi ilə dünyaca məşhur, dadı daima damaqda qalan, düyü unu, su, şəkər, qoz və ya fındıq ləpəsi istifadə olunaraq hazırlanan Şəki Halvasından əlavə, Qırmabadam, Peşvəng,Tel halva, Dum-dum halva, Çay dəstgahı, Toy noğulu, Nabat, Barama şirni, Düymə sirni, Bamiyə (klassik və mini), qoz və fındıq ləpəsindən hazırlanmış qovrulmuş, kakaolu və südlü mindallar və s. şirniyyat növləri hazırlanır.
Halvaçılıq olduqca çətin sənətdir. Mis tiyanda, ocaq üzərində bişmiş və şərbətlə möhtəşəm hala gətirilmiş Şəki halvasını hər adam bişirə bilməz, xüsusi şərait tələb edən halvanın evdə bişirilməsi mümkünsüzdür.
Bir sıra turizm şirkətlərinin təşkil etdikləri turlar çərçivəsində Əliəhməd Şirniyyat Evinə də ekskursiyalar təşkil olunur. 2015-ci ildə Beynəlxalq Şirniyyat Günü münasibətilə Şəki şəhərində keçirilmiş Beynəlxalq Ənənəvi Milli Şirniyyat Festivalında “Əliəhməd” şirniyyat sexi Şəki şəhərində fəaliyyət göstərən sexlər arasında 1-ci yeri tutmuşdur.
Əliəhməd kişinin sənət irsini layiqlə davam etdirən övladları nümunəvi vergi ödəyicisidirlər. Məşğulluqlarını təmin etdikləri işçilərini peşəkarlığına söz ola bilməz. İşçilər müqavilə əsasında çalışır, tibbi müayinədən keçirlər. İstehsalat geyimləri ilə təmin olunublar. Əməyin təhlükəsizliyi qaydalarına ciddi riayət olunur. Qaffarovlar rayon rəhbərliyi ilə etibarlı tərəf müqabilidirlər, Şəkidə gedən abadlıq-quruculuq işlərində Rayon İcra Hakimiyyətinə əhəmiyyətli dəstək verirlər.
Vahid Əhmədoğlu
