Tənzilə Rüstəmxanlı: “Türkiyədə baş verən bu cür qətllər təsadüfdür”
Xarici ölkələrdə yaşayan azərbaycanlıların bir-birinə qənim kəsilmələri, bir-birini qətlə yetirmələri hər zaman müzakirə mövzusudur. Son zamanlar belə qətllərin sayı artıb.
Diqqətçəkən məqam odur ki, əvvəllər Rusiyada belə cinayət hadisələri tez-tez yaşanırdı. Amma son illərdə bu cür xoşagəlməyən cinayətlər qardaş Türkiyədə daha çox baş verməyə başlayıb. Bir ay öncə qardaş ölkədə iş adamı Etimad İsmayılovun başqa bir azərbaycanlı iş adamı Gözəl Dəmirov tərəfindən güllələnməsi və həyatını itirməsi dediklərimizin əyani sübutu oldu.
Belə versiyalar var ki, bu cür qətl hadisələrinin Türkiyədə tez-tez təkrarlanması Azərbaycanla olan münasibətlərə xələlə gətirmək üçün də edilə bilər.
Azəri Türk Qadınlar Birliyinin sədri Tənzilə Rüstəmxanlı bildirdi ki, hansı ölkədə bunların baş verməsindən asılı olmayaraq xoşagəlməyən haldır: “Türkiyədə baş verən bu cür qətllər təsadüfdür. Orada olmasaydı, Rusiya və ya başqa ölkələrdə olası idi. Hesab etmirəm ki, belə hadisələr həmin ölkələrin qayda, qanunlarının insan öldürməyə meylli olduğunu göstərir. Azərbaycanlılarda bu bir üzücü haldır ki, hansı ölkədə olurlarsa- olsunlar bir-biriləri ilə yola getmirlər. Bir-birinə qarşı çox aqressivdirlər. Hətta başqa xalqların bizə olan münasibətlərindən belə qəddardırlar. Bir-birini qısqanırlar, paxıllıqlarını çəkirlər. Bu diqqətəçarpacaq dərəcədə hiss olunur. Türkiyədə son zamanlar baş verən belə qətllər düşünmürəm ki, kütləvi hala çevriləcək. Bilirsiniz ki, qardaş ölkədə belə məsələlərə çox ciddi şəkildə yanaşılır. Etimad İsmayılovun qətlinə iki azərbaycanlının arasında olan alış-verişdən dolayı baş verən münaqişə kimi baxmaq lazımdır. Burada daha çox sualı o cür qoymaq olar ki, hansı ölkədə yaşamalarından asılı olmayaraq azərbaycanlılar bir-birinə qarşı münasibətdə niyə bu qədər qəddar, aqressivdirlər. Siyasi, ictimai fəaliyyətdə də ancaq bir-birinə qarşı mübarizə aparmaqla məşğuldurlar. Bu olduqca üzücü haldır. Azərbaycan daxilində də vəziyyət bu cürdür. Sanki bu bizə bir bəla kimi göndərilib ki, bir-birimizi məhv edək. Bu, ölkəmizin imici üçün də çox pis bir haldır. Belə bir təsəvvür yaranır ki, bu ölkədə kriminal hadisələr tez-tez baş verir, ölkənin vətəndaşları buna meyllidirlər.
Azərbaycan adına bu bir nöqsandır. Biz çox qəribə bir millətik. Olduqca maraqlı bir xalqıq. Böyük amallar, milli məsələlərlə bağlı mübarizə aparan xalqıq. Bu günlərdə 27 illiyini qeyd etdiyimiz müstəqilliyimizi necə qazanmağımız buna misaldır. O müstəqilliyə doğru gedən yolda millət olaraq hansı mübarizələrdən keçdiyimizi yaxşı bilirik. Azadlığımız uğrunda meydanı bir milyonla dolduran millətik. Amallarımız uğrunda qısa zamanda birləşə bilirik. Amma nə yazıq ki, son illərdə Qarabağ və digər milli məsələlərlə bağlı birləşib mübarizə aparmağı bir kənara qoymuşuq. Ancaq bir-birimizi öldürməklə məşğuluq. Bu millətimizdə xəstəlik halına çevrilib. Bunlar bildiyimiz hadisələrdir, bilmədiyimiz bu cür cinayətlər o qədər baş verir ki... Rövşən Lənkəranskinin Türkiyədəki qətli iki ölkə arasında münasibətlərə zərbə vurmaq üçün də planlaşdırıla bilərdi. Rəhmətlik Rövşənin qətlinə siyasi yöndən don geyindirmək cəhdləri də ola bilərdi. Unutmaq olmaz ki, belə qətllər Rusiyada da tez-tez baş verir. Siyasi motivdə belə hadisələr baş verirsə, bu ehtimalları vermək olar ki, Türkiyə-Azərbaycan münasibətlərinə zərbə vurmaq üçün də edilə bilər. Amma düşünmürəm ki, belə hadisələr iki qardaş ölkənin əlaqələrinə zərbə vursun. Buna çalışanların, cəhd edənlərin olduğu istisna deyil. Amma nə olursa-olsun belə hadisələr Azərbaycan-Türkiyə münasibətlərinə zərbə vurmamalıdır. Bizi bir-birimizə bağlayan tellər çox möhkəmdir”.
Cavanşir ABBASLI,
“Yeni Müsavat”
