Qabil Hüseynli: “Yeni parlament formalaşdıra bilməsə, hakimiyyəti uzun sürməyəcək”
Bu gün Ermənistanda Nikol Paşinyanın baş nazir seçilməsindən 5 ay keçir. Bir aya yaxın küçə və meydanlarda davam edən mitinqlər nəticəsində Serj Sərkisyanın istefasına nail olan Nikol Paşinyan artıq beş aydır işğalçı ölkənin rəhbəridir. Bəs bu beş ayda əsas nəticə nə oldu? Bölgəyə, Ermənistana nə gətirdi? Ermənistanda inqilabın başa çatdığını söyləmək olarmı?
Politoloq Qabil Hüseynli “Yeni Müsavat”a bildirdi ki, hakimiyyət dəyişikliyi Ermənistana heç də rahat həyat, sabitlik gətirməyib: “Keçən aylar göstərdi ki, bu ölkədə hadisələr heç də sabitlik istiqamətində inkişaf etmir. Küçə təzyiqləri ilə hakimiyyətə gəlmiş Nikol Paşinyan kütlələrə bir sıra vədlər versə də onları yerinə yetirmək istiqamətində işləri qura bilmədi. Bu gün Ermənistan ciddi siyasi böhranla üzləşib. Bunu hətta Paşinyan özü də etiraf edir. O, hakimiyyətə kütlənin çiynində gəlib, gücünün azlıqda olduğu parlamenti özünün hökumət başçısı təyin edilməyinə səs verməyə vadar edib. İkihakimiyyətlilik belə formalaşıb: meydanda qeyri-formal hakimiyyət mərkəzi və çoxluğun respublikaçılarda olduğu parlament. Bununla da siyasi böhranın növbəti mərhələsi aşkarlanıb. Aydın idi ki, yeni hakimiyyət modeli müvəqqəti xarakterə malikdir, amma durumun tam iflasına yol verməmək üçün bütün siyasi proseslər Ermənistanın qüvvədə olan Konstitusiyası çərçivəsində hərəkətlənib və davam etməkdədir. Ölkədə idarəçilik sistemində ciddi bir vakuum var. Elə bir vəziyyət yaranıb ki, Paşinyan baş nazir vəzifəsindən istefa verməlidir. Bu zaman isə mövcud parlamentdə ona qarşı müxalifətdə olan Sej Sərkisyanın Respublika Partiyası, ”Çiçəklənən Ermənistan" partiyası, Daşnaksütyun Partiyası səs çoxluğundan istifadə edərək öz namizədlərini baş nazir seçə bilərlər. Belə bir addım atılsa çox ciddi qarşıdurma, hətta vətəndaş müharibəsi səviyyəsində qarşıdurma meydana çıxa bilər. Ordunun daxilində də iki yerə bölünmə baş verə bilər. Tərəflərdən biri siyasi prosesə müdaxilə etdiyi zaman digər tərəf də buna qarşı çıxacaq ki, bu vəziyyət silahların işə düşməsi demək olacaq. Ermənistanda mayın 8-də baş vermiş hakimiyyət dəyişikliyinin bu beş ayda ortaya çıxardığı nəticə bax, belə bir mənzərənin hər an yaranması ehtimalının reallığa çevrilmək üzrə olmasıdır".
Q.Hüseynli dedi ki, İrəvan meri seçkiləri Paşinyanın xalq arasında dəstəyinin hələ ki böyük olduğunu ortaya çıxarıb: “82 faiz məhz Paşinyanın namizədinə səs verməklə baş nazirə etimadını göstərmişdi. Lakin son bir neçə həftədir bu səslərin azalması prosesinin getdiyi bildirilir. Çünki Paşinyan beş ay müddətində hər hansı ciddi, xalqın rifahına ciddi təsir göstərən işin başlanğıcını qoymayıb. Doğrudur, bəzi oliqarxlardan, korrupsiyalaşmış elementlərdən dövlətdən oğurladıqları vəsaitlərin bir qismi alınıb qaytarılıb dövlət büdcəsinə, amma bütövlükdə onun vəd etdiyi yeni iş yerləri açmaq, struktur islahatları həyata keçirmək, xaricdən böyük investisiyalar cəlb etmək kimi məsələlərdə heç bir dönüşə nail ola bilməyib. Üstəlik, beş ayda Paşinyanın hakimiyyət idarəetməsində diletantlığı ortaya çıxdı. Xüsusilə, o bəyanatları ilə Azərbaycanla münasibətlərdə çox böyük gərginliyə səbəb olan vəziyyət yaratdı. Gərginlik az qala geniş miqyaslı hərbi əməliyyatların başlanması həddinə çatmaq üzrə idi”.
Politoloq qeyd etdi ki, Ermənistanda proseslərin gedişi inqilabın hələ bu ölkədə baş çatmadığını açıq nümayiş etdirir: “Paşinyanın hakimiyyətə gəlişinin beş ayında ona qarşı düşmən mövqeyində olan qüvvələrin xeyli aktivləşdiyi, revanş götürməyə hazır olduqları da ortadakı nəticələrdən biridir. Beş ay öncə müxalifətdə olduğu dövrdə küçə və meydanlarda mübarizə aparan Paşinyan, beş aydır hakimiyyətdədir, lakin yenə də küçə və meydanlardadır. O, rəqiblərinə qarşı yenə də küçə təzyiqindən istifadə edir. Rəqibləri çox böyük kapitala malik keçmiş komanda, oliqarxlardır. Onlar get-gedə birləşirlər və yeni baş nazirə qarşı vahid cəbhə formalaşdırmaqdadırlar. Bir sözlə, Paşinyanı baş nazir edən inqilab hələ k, öz hədəflərinə doğru gedə bilmir. O, çox böyük maneələrlə üz-üzə qalıb. Problemləri həll etmək əvəzinə yeni problemlər yaranıb və hər gün yeni problemlər yaranır”.
Q.Hüseynli onu da vurğuladı ki, Paşinyan yeni parlament formalaşdırmağa nail ola bilməsə, onun hakimiyyətinin ayaq üstə uzun müddət qala bilməsi çətin ki, mümkün olsun.
Etibar SEYİDAĞA,
“Yeni Müsavat”
