İbrahimov Mirzalı Rafiq oğlu 28 noyabr 1999-cu ildə Biləsuvar rayonunun 3 saylı Çadır şəhərciyində anadan olub. Əsli Füzuli rayonundandır.
1993-cü il avqust ayının 23-də Füzuli rayonu erməni quldurları tərəfindən işğal olunduqdan sonra Mirzalının valideynləri köçkün düşərək Biləsuvarda Çadır şəhərciyində məskunlaşmışlar.
Qayıdış qəsəbəsində iş olmadığı üçün Rafiq İbrahimov Bakıda Qaraçuxur qəsəbəsində məskunlaşaraq kirayədə qalaraq övladlarını vətənpərvər ruhda böyüdərək boya-başa çatdırmışdır. Böyük qızı institut tələbəsidir. Ortancıl oğlu Mirzalı 19 yaşında, sonbeşik qızı isə 11-ci sinif şagirdidir.
2018-ci il yanvar ayının 10-da Rafiq İbrahimovun oğlu Mirzalı İbrahimov hərbi xidmətə çağırılmış və Gədəbəy rayonunun Saratovka kəndindəki 171 saylı hərbi hissədə vətənə xidmət etmişdir. Xidmətinin 7-ci ayında meşədən qış üçün odun tədarükü görərkən 4 əsgər və iki müddətdən artıq həqiqi hərbi qulluqçu ilə odun yığarkən H-502-QQ nömrəli “Ural” yük avtomobili işə düşmədiyi üçün sürücü Məhərrəmov Azər əsgər Mirzalı İbrahimovu köməyə çağırıb demişdir:
- Mühərrikdəki stateri silkələ, enerji bərpa olunsun və maşın işə düşsün. Mirzalı “Ural”ın altına girərkən sürücünü xəbərdar edir ki, maşını xodlamasın.
Lakin ehtiyatsızlıqdan sürücü Məhərrəmov Azər maşını işə saldı. Bu zaman pərin küləyi Mirzalının barmaqlarını remenin arasına saldı və iki barmağı ucdan üzüldü. Maxer Məhərrəmov Azər əsəbiləşdi ki, məni zibilə saldın - deyə Mirzalıya qışqırdı. Huşunu itirmiş Mirzalını Şəmkirdə 195 saylı Hərbi hospitala gətirdilər. On gün Şəmkirdə müalicə olunsa da, 1-ci barmağını uc hissəsindən kəsdilər, 2-ci barmaq qanqrena verdiyi üçün təcili Gəncə hərbi hospitalına gətirdilər. Gəncədə həkimlər yaralı əsgəri təcili Bakıya hərbi hospitala aparmaqlarını məsləhət bildilər.
Bakıda Hərbi hospitalda Mirzalı İbrahimov bir ay müalicə olundu. Sonra 19 avqust 2018-ci ildə əsgər Mirzalı İbrahimovu yenidən hərbi hissəyə göndəriblər. Hərbi hissə komandiri 15 günlük məzuniyyət verərək Mirzalını evə buraxmışdır.
Bakı Hərbi hospitalında 2-ci dəfə komissiya heyəti əsgər Mirzalı İbrahimovu müayinə etdikdən sonra hərbiyə yararlı yazaraq onu yenidən cəbhə bölgəsinə xidmətini davam etdirməyə göndəriblər.
9 ay xidmət etmiş Mirzalı Rafiq oğlu İbrahimov üç barmağı (tətik barmağı da daxil olmaqla) yararsız vəziyyətə düşsə də, Bakı Hərbi Hospitalının komissiya üzvləri əsgər İbrahimovu hərbiyə yararlı yazaraq yenidən döyüş bölgəsinə göndərmişlər.
Hansı ki, çağ-salamat könüllü olaraq hərbi xidmətə getmiş Mirzalı İbrahimov bu barmaqlarla nə silah işlədə bilir, nə də ayaqqabısının bağını bağlaya bilir.
Məşhur Papani hospitalı indi Silahlı Qüvvələrin Hərbi baş klinikası adlanır.
Çox təəssüflər olsun ki, hərbi həkim komissiyanın üzvlərindən biri əsgər Mirzalı İbrahimovun əmisi demişdir:
- Əgər vaxtında gəlsəydin, biz qardaş oğlunun yaralı barmaqlarını bir az dərindən kəsərdik. Ona həm kompensasiya düşərdi, həm də pensiya. Çox təəssüflər olsun ki, hərb sahəsində belə həkimlərimiz də var.
Silahlı Qüvvələrin Hərbi Klinikasının Travmatologiya şöbəsinin rəisi polkovnik-leytenant Eldəniz Hacıyev əsgər Mirzalı İbrahimovun atası Rafiq İbrahimova demişdir:
- Mən sizə heç bir arayış verə bilmərəm. Gedin Gədəbəydən alın. Camaatın bir şaqqaçı gedir, heç belə danışmır.
Həkim isə valideynin üzünə dirənir ki, oğlunuz sağlamdır, nə olsun ki, iki barmağını kəsmişəm?!
Travmatologiyanın rəisinin belə kobud danışığı Mirzalı İbrahimovun valideynlərini çox əsəbiləşdirmişdir. Qaçqın, köçkün həyatı yaşayan bu ailəyə maddi və mənəvi zərər vurmuşdur.
Dil zərbəsi isə daha acı olur.
Valideyn Rafiq İbrahimov Müdafiə Nazirliyinə ərizə göndərsə də, hələ ərizəsinə cavab verilməyib. Çox təəssüflər olsun ki, valideyn övladını sağ-salamat hərbi xidmətə göndərir, əsgər xəsarət alırsa, ona dövlətimiz həm kompensasiya ayırır, həm də əlillik məsələsi həll olunur. Həkimlər isə bu əsgəri cəbhə bölgəsində xidmətini davam etdirməyi məsləhət bilirlər. Axı Mirzalının barmaqları tətiyi necə tutub silah ata bilər?

Rauf İlyasoğlu