Lənkəranda 1972-ci il təvəllüdlü Sahil qardaşı qızı, yetkinlik yaşına çatmayan İlhaməyə (adlar şərti verilib - red.) qarşı əxlaqsız hərəkətlər edib.
Nyus.Az teleqraf.com-a istinadla xəbər verir ki, Sahil 4 sentyabr 2022-ci ildə saat 15.00-da Lənkəran rayonuun kəndində onunla eyni evdə yaşayan qardaşı qızı İlhaməyə zor tətbiq etmədən əxlaqsız hərəkətlər edib.
İlhaməni öz yataq otağına çağırıb və orada özünün cinsi ehtirasını təmin etmək, İlhaməyə cinsi ehtiras hissləri yaratmaq məqsədi ilə onun boyun və bel nahiyyələrindən öpüb, digər seksual xarakterli hərəkətlər edib.
Daha sonra Sahil təkrarən eyni məqsədlə 2022-ci il sentyabrın sonlarında özünün yataq otağında İlhaməyə zor tətbiq etmədən mobil telefonunda pornoqrafik məzmunlu film izlədib.
Sonuncu dəfə isə həmin ilin oktyabrın sonlarında yaşadıqları evin mətbəxində Sahil qardaşı qızına iyrənc hərəkətlər edib.
Qeyd edək ki, Sahil əvvəllər dəfələrlə məhkumluq həyatı yaşayıb. O, 2018-ci ildə Cinayət Məcəlləsinin 177.2.3-cü (yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla oğurluq törətmək) maddəsi ilə təqsirli bilinib və 2 il 6 ay müddətinə azadlıqdan məhrum edilib.
Sahil 2021-ci il tarixdə cəzası başa çatdığı üçün azad edilib. Daha sonra Lənkəran rayon Məhkəməsinin 2021-ci il tarixli hökmünə əsasən Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə, saxlama, hazırlama, emal etmə, daşıma) maddəsi ilə təqsirli bilinib və 1 il 8 ay müddətə azadlıqdan məhrumetmə cəzasına məhkum olunub. Nizami rayon Məhkəməsinin 2022-ci il tarixli qərarı ilə barəsində Milli Məclisinin 5 noyabr 2021-ci il tarixli amnistiya qərarının 4-cü hissəsinə əsasən təyin edilmiş cəzası 6 ay azaldılıb. Onun məhkumluğu ödənilməyib və götürülməyib.
Sahilin barəsində hazırkı cinayət əməlinə görə, Cinayət Məcəlləsinin 153.1-ci (on altı yaşına çatmayan şəxsə qarşı zor tətbiq etmədən əxlaqsız hərəkətlər törətmə, habelə həmin şəxsi cinsi zorakılıq hərəkətləri və ya seksual fəaliyyəti müşahidə etməyə cəlb etmə) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Sahil ona elan olunmuş ittiham üzrə özünü təqsirli bilməyib. O bildirib ki, həbs olunana kimi Lənkəran rayonunun kəndlərindən birində yaşayıb: "Qardaşım Rusiyada olarkən öz qızını və oğlunu Lənkəran rayonuna göndərdi. Amma qardaşım orada həbs olundu. Hazırda qeydiyyatda olduğum kənddə yaşamağa başladılar. Anam qardaşım qızı İlhamə və qardaşım oğlu Vəli ilə birlikdə yaşamağa başladılar. Narkotik vasitə istifadəçisi olduğum üçün evdə tez-tez dava dalaş yaratmışam. Anam ilə mübahisə edib, narkotik vasitə almaq üçün anamdan pul istəmişəm. Anam mənə pul verməyəndə qardaşım qızı və qardaşım oğlunu öyrədərək anamdan pul almağa göndərdim. Ara-sıra əsəbləşən zaman İlhaməni və Vəlini döymüşəm. Lakin heç vaxt İlhaməyə qarşı qeyri-əxlaqi hərəkətlərə yol verməmişəm. Bunun hamısını qardaşım və qardaşımın arvadı evdən getməyim üçün ediblər. Mən heç vaxt qardaşım qızına qarşı mənə verilmiş ittihamda göstərilən hərəkətləri etməmişəm".
İlhamənin qeydə aldığı səs yazısına münasibətdə isə təqsirləndirilən şəxs bildirib ki, İlhaməyə bir dəfə şillə vurduğu üçün ona bir də belə edəcəyi təqdirdə atasına məlumat verəcəyini bildirib.
İş üzrə zərərçəkmiş şəxs qismində ifadə verən İlhamənin sözlərinə görə, Rusiya Federasiyası, Sankt-Peterburq şəhərində anadan olub: "2013-cü ildə qardaşım ilə birlikdə Azərbaycana gəldim. Lənkəran rayonunun kəndində atam, analığım, qardaşım və əmim ilə birlikdə yaşadıq. Lənkəranda orta məktəbin 8-ci sinfində rus sektoru üzrə təhsil alıram. Ailədə atam, analığım və qardaşım ilə münasibətim yaxşıdır. Rusiyadan Azərbaycana gəldikdən sonra atam orada həbs olundu. Mən və qardaşım bibim Məlahətlə birlikdə Rusiyadan Lənkəran rayonuna gəlmişik və bir müddət bibim ilə yaşamağa başlamışıq. Daha sonra ata evimiz olan Lənkəran rayonunun kəndində yerləşən fərdi yaşayış evinə getdim. Orada nənəm, qardaşım və əmim ilə birlikdə yaşamağa başladıq. İlk gəldiyim vaxtlarda əmim həmişə evdə dava-dalaş yaradır, mənimlə qardaşımı döyüb".
Zərərçəkmiş qeyd edib ki, əmisi Sahil çox vaxt nənəsi ilə mübahisə edib, ondan pul istəyib: "Nənəm də Sahilə pul vermədikdə evdəki əşyaları qırırdı. Həmçinin mənimlə qardaşımı da nənəmin yanına göndərərək pul almağımızı istəyib. Kiçik yaşlarımda olarkən Sahil ilə evdə tək olduqda mənə yaxınlaşıb, məni öpüb qucaqlayıb. Bu hallar dəfələrlə təkrarlanıb. Mən uşaq olduğum üçün əmimin bu hərəkətlərini nə niyyətlə etdiyini başa düşməmişəm. Əmim bu cür hərəkətlərini dəfələrlə təkrar edib".
İlhamənin sözlərinə görə, dəqiq tarixini bilmədiyi vaxtlarda əmisi Sahil həbs olunub: "Sonuncu dəfə 2022-ci ilin avqustunda əmim həbsdən çıxdı. Həbsdən çıxdıqdan sonra yenə öz hərəkətlərinə davam etməyə başladı. Evdə tək olan zaman əmim sinə nahiyəmi əli ilə sıxıb, boyun nahiyəmdən öpüb. Mən də həmişə ağlayaraq əmimin yanından qaçmışam. Əmimin bu cür hərəkətləri məni çox narahat edib. Bu barədə analığıma da məlumat verdim. Analığım da əmimin yenə bu cür hərəkətləri edəcəyi təqdirdə onun səs yazısını sübut kimi yazmağımı məsləhət gördü. Mən də analığım ilə razılaşaraq əmimin bu cür hərəkətlərini sübut etmək üçün bir də belə edəcəyi halda onun səsini telefonuna yazacağımı bildirdim".
Zərərçəkmiş qeyd edib ki, sonuncu dəfə sentyabrın 4-də günorta saat 15 radələrində evdə o, qardaşı və əmisi Sahil ilə olub: "Atam və analığım işdə olub. Qardaşımın digər otaqda qulağında qulaqlıq olub. Bu zaman əmim məni öz otağına çağırdı. Əmimin mənə qarşı əxlaqsız hərəkətlər edəcəyini düşündüm və telefonumun səs qeydedici funksiyasını işə saldım. Əmim aramızda olanlardan kiminsə xəbərinin olub-olmadığını soruşdu. Mən də bu barədə heç kimin bilmədiyini dedim. Yenə belə hərəkətləri təkrar edəcəyim təqdirdə kiməsə bu haqda deyəcəyimi bildirdim. Sahil sinə nahiyəmdən sıxmağa başladı. Mən də "eləmə" deyə 2 dəfə qışqırdım. Daha sonra boyun və bel nahiyələrimi öpdü. Mən aşağı əyildim. Əmim də aşağı əyildi. Bu zaman onu itələdim, əlindən qaçdım və ağlamağa başladım. Telefonuma qeyd etdiyim səsi analığıma göstərdim. Daha sonra analığım da bibimə həmin səsi göndərdi. Bibim əmimlə bu haqda danışdı və məni rahat buraxmasını bildirdi".
Zərərçəkmiş deyib ki, bibisi ertəsi günü ona zəng edib, əmisi Sahil ilə bir evdə qalmamağını, qardaşı Vəli hara getdisə, onunla birlikdə getməyini tapşırıb: "Əmim mənə qarşı bu hərəkətlərini davam etdirdi, yenə də mənə qarşı əxlaqsız hərəkətlər etməyə başladı. Dəqiq tarixini xatırlamasam da, sentyabrın axırlarında əmim ilə evdə tək olduq. Əmim məni öz otağına yenidən çağırdı. Qorxduğum üçün getmək istəmədim. Daha sonra əmim qışqıraraq məni çağırdı. Mən də qorxaraq getdim. Əmim öz telefonunu mənə göstərdi, ekranı böyütməyimi istədi. Telefonda porno video gördüm. Mən də otaqdan qaçdım. Əmim bu hərəkətləri ilə məndə cinsi ehtiras yaratmaq istəmişdi".
İlhamə bildirib ki, sonuncu dəfə oktyabrın ortalarında mətbəxdə olarkən əmisi Sahil yenidən ona tərəf gəldiyini görüb: "Əmim arxadan məni qucaqladı, sinə nahiyəmi əlləri ilə sıxdı, mənə qarşı əxlaqsız hərəkətlər etdi. Sonra mənim səssizcə ağladığımı görərək getdi. Əmimin bu hərəkətlərinə görə dəfələrlə özümü öldürmək istəmişəm. Bundan əlavə əmim də məni öldürmək istəyib. Ona dəfələrlə bu haqda kiməsə deyəcəyim təqdirdə, məni öldürəcəyini bildirib. Əmim mənə qarşı əxlaqsız hərəkətlər edərkən fiziki zor tətbiq etməyib".
Bu cinayət işinə Lənkəran şəhər Məhkəməsində baxılıb.
Məhkəmənin hökmü ilə ilə Sahil 2 il müddətinə azadlıqdan məhrum edilib.
Nyus.Az
