Tələbələr Ramazan iftarında dini lideri sual “yağışına” tutub, dini lider isə gənclərə güvəndiyini deyib


İranlı tələbələr ölkənin ali dini lideri Ayətullah Xameneyi ilə görüşəndə ölkə hakimiyyətini sərt tənqid ediblər. İran mediasının məlumatına görə, Ramazan ayı münasibətilə ənənəvi olaraq tələblərlə iftar yeməyində bir araya gələn ali dini lider onların çıxışlarını dinləyib. Çıxış edən iki tələbə nüvə anlaşması, sosial-iqtisadi vəziyyət və hökumətin fəaliyyəti ilə bağlı sərt tənqidi fikrilər səsləndiriblər. Hətta bəzi tənqidlər dini liderin özünə yönəlib.



Diqqət çəkən detal isə Elm Nazirliyinin əməkdaşı, Səhər Mehrabi adlı tələbənin birbaşa dini liderə ünvanlandığı suallar olub. Mehrabi dini liderdən sosial qruplar arasındakı qeyri-bərabərliyin sistematik şəkildə artdığı, ekoloji böhran, gecəqondu məhəllələrin sayının artması, ictimai inancın aşağı düşməsi, işsizlik səviyyəsinin yüksəlməsi, azlıqların üzləşdiyi çətinliklər, məhkəmə və hüquq-mühafizə sistemində mühafizəkarların siyasi fəalları hədəfə almaq üçün “xəyali təhlükəsizlik qüvvələri” yaratması, söz və mətbuat azadlığının sərt təzyiq altında olduğu kimi ittihamlar olub.



Dini lider isə bütün çıxışları səbirlə dinləyib və daha sonra münasibət bildirib. Ayətullah Xameneyi deyib ki, hökumətin fəaliyyətində çatışmazlıqlar var. Eyni zamanda o, sual şəklində irəli sürülən problemlərin aradan qaldırılmasının asan olmadığını qeyd edib. Və əlavə edib ki, bu problemləri aradan qaldırmaq üçün özünü inqilaba həsr etmiş gənclərin hökumət orqanlarında işə cəlb olunması lazımdır. Ali dini lider deyib ki, ölkədə vəziyyətin çox pis olduğunu deyən tələbənin sözlərini deyil, duyğularını qəbul edir. Xameneyi əlavə edib ki, cəmiyyətdə və ölkədəki vəziyyətdən xəbərdardır. Eyni zamanda əlavə edib ki. ölkənin inkişafı üçün ifadə azadlığı lazımdır. Qeyd edək ki, son günlər İranda yenidən etiraz aksiyaları baş verir. Kənd təsərrüfatı işçiləri, sürücülər hökuməti tənqid edən aksiyalar keçiriblər. Son aylarda İranda sürətli inflyasiya baş verib, İran rialı dollar qarşısında ciddi şəkildə ucuzlaşıb. Nəticədə ölkə iqtisadi böhranın sərhədinə gəlib. Bundan sonra Mərkəzi Bank dollar satışını nəzarətə götürüb. Ancaq bu addım rəsmi məzənnədə sabitlik yaratsa da, qara bazarda dollar sürətlə bahalaşıb. Üstəlik mayın 8-də ABŞ prezidenti Donald Trampın İranla nüvə anlaşmasından çəkilməsi və Tehrana qarşı sanksiyalara yol açması Tehran üçün ciddi siqnal olub. Noyabrın əvvəlinə qədər isə İrana qarşı köhnə sanksiyaların yenidən bərpa olunacağı və yeni sanksiyaların qəbul ediləcəyi gözlənilir. ötən il dekabrının sonlarında İranda bir neçə şəhərdə insanlar küçələrə çıxaraq ölkədəki iqtisadi, sosial problemlərə etiraz edib. Daha sonra aksiyalar genişlənərək hökumətə qarşı etirazlara çevrilib.



Tələbənin suallarından birinin məhz mühafizəkarları hədəfə alması İranda iqtisadi və sosial problemlərin kökündə həm də ölkədəki mühafizəkar və islahatçı qanad arasında mübarizənin təsirinin olduğu görünür. Dini lider isə təmkinlidir, tərəflərdən heç birinə üstünlük vermir. Eyni zamanda dini lider dinc etiraz aksiyalarını dəstəklədiyini deməklə, müəyyən mənada etirazlara haqq qazandırıb. Ancaq hazırkı Ruhani hökumətinin Qərblə münasibətləri yumşaltmaqla ölkədəki iqtisadi vəziyyəti inkişaf etdirmək siyasəti nəticə vermir. Sanksiyalar yenidən bərpa olarsa. Ruhani hökumətinin. Eləcə də İranın bütövlükdə vəziyyəti daha da pisləşəcək. Tələbələrin dini liderə sualları İrandakı söz azadlığının vəziyyətini göstərməklə yanaşı, iqtisadi və sosial vəziyyətin çətin olduğunu göstərir.



Kənan Rövşənoğlu,
“Yeni Müsavat”