Oktyabrın 14-də Daxili İşlər Nazirliyində cari ilin 9 ayının yekunlarına həsr olunmuş Kollegiya iclası keçirilib. Gündəlikdəki məsələlər barədə Nazirliyin aidiyyəti baş idarələrinin rəisləri məruzə edərək müzakirə olunan məsələlərlə bağlı görülmüş işlərdən, əldə edilmiş nəticələrdən, yol verilmiş nöqsanlardan və onların aradan qaldırılmasının gedişindən danışıblar. Məruzələr ətrafında bir sıra ərazi orqanlarının rəisləri çıxış edərək görülmüş və planlaşdırılan tədbirlər barədə məlumat veriblər.
İclasda yekun nitqi ilə çıxış edən daxili işlər naziri general-polkovnik Vilayət Eyvazov cari ilin 9 ayında asayişin və ictimai təhlükəsizliyin təmini ilə bağlı qarşıya qoyulmuş vəzifələrin bütövlükdə layiqincə yerinə yetirildiyini, cinayətkarlıqla mübarizədə, insan hüquq və azadlıqlarının qorunmasında əldə olunmuş müsbət nəticələrin hesabat dövründə də qorunub-saxlanıldığını vurğulayıb. Bütün bunlarla yanaşı, bəzi ərazi orqanlarının fəaliyyətində müəyyən nöqsan və çatışmazlıqlara da diqqət çəkərək onların aradan qaldırılması üçün lazımi tədbirlərin həyata keçirilməsini, qanunçuluğun möhkəmləndirilməsini, vətəndaşların problemlərinə, şikayətlərinə daha böyük həssaslıqla yanaşılmasını, bütövlükdə vətəndaş məmnunluğunun davamlı surətdə təmin olunmasını tələb edib. Cinayətkarlığa, onun transmilli növlərindən olan narkotiklərin qanunsuz dövriyyəsinə qarşı mübarizədə yüksək vətəndaşlıq mövqeyi nümayiş etdirən hər bir şəxsə, o cümlədən blogerlərə və digər ictimai fəallara, qeyri-hökumət təşkilatlarının nümayəndələrinə və media mənsublarına minnətdarlıq bildirib.
Yəqin ki, hörmətli nazirin məlum kollegiya iclasında elan etdiyi minnətdarlıqdan biz jurnalistlərə də pay düşür. Çünki internet informasiya resursları və kütləvi informasiya vasitələrinin gündəlik monitorinqi insan alveri, onun müxtəlif formaları və ictimai mənəviyyat əleyhinə olan hüquqazidd əməllərin aşkarlanmasında əhəmiyyətli rol oynayır. Bu, Azərbaycanın İnsan alverinə qarşı mübarizə üzrə Milli Koordinatorunun hər il açıqladığı məlumatlarda bildirilir. Məlumatda qeyd olunur ki, bunların hər biri üzrə qanunauyğun tədbirlərin görülməsi təmin edilib, faktlar müəyyən edilib, təqsirkarlar cinayət və inzibati məsuliyyətə cəlb olunub.
Ümid etməyimizə dəyər ki, bu yazıda barəsində məlumat verdiyimiz “priton” və onun sahibi haqda da lazımi ölçü götürüləcək. Söhbət paytaxtın “Neftçilər” metrostansiyasının yaxınlığında, Rüstəm Rüstəmov küçəsi 25/24 ünvanda fəaliyyət göstərən, Mirzə adlı şəxsə məxsus “Nur” kafesindən gedir. Nizami rayonunun inzibati ərazi hüdudlarında yerləşən bu obyekt sözün həqiqi mənasında əxlaqsızlıq yuvasına çevrilib. Kafe bir tərəfdən cəmiyyətin tör-töküntülərini özünə cəlb edir, digər tərəfdən yaxın ətrafda yaşayan vətəndaşların haqlı narazılığına səbəb olur. Bildirilir ki, burada yüngül əxlaqlı qadınlar cinsi istismara cəlb olunur. Təbii ki, onlarla əmək müqaviləsi bağlanılmır, zöhrəvi xəstəliklərin daşıyıcısı olub-olmadıqları haqda tibbi arayış tələb olunmur. Söz yox ki, kafe sahibinin sosial sığorta və vergi ilə hesablaşmada dürüst olmasından da söhbət gedə bilməz.
Ümumiyyətlə, müşahidə olunur ki, Ziya Əliyev Nizami Rayon Polis İdarəsinə rəis təyin olunandan sonrakı son bir ildən artıq müddət ərzində rayon ərazisində Mirzə kimi ictimai mənəviyyat əleyhinə fəaliyyət göstərən, “priton” tipli obyekt işlədənlər “yağışdan sonra peyda olan göbələklər kimi” çoxalıb. Belə mənfi tendensiyaya yumşaq formada nəzarətsizlik, öz adı ilə çağrılanda isə göz yumma, şərait yaratma deyilir. Nəzarətsizliyin səbəbi səriştəsizlik, göz yummanın səbəbi isə təmənna olur. Kifayət qədər təcrübəyə malik Cavid Muradovu isə əsla səriştəsiz polis zabiti hesab etmək olmaz.
Mövzuya qayıdacağıq.
Nyus.Az
