Əmək Məcəlləsinə görə, büdcədən maliyyələşən təşkilatlarda çalışan işçilərin 65 yaşından sonra (elmi müəssisə və təşkilatlar və ali təhsil müəssisələrindən başqa) əmək müqaviləsinin artırılması işəgötürənin səlahiyyətlərindədir. Yəni, işəgötürən istəsə, həmin işçini işdən çıxara da bilər, çıxarmaya da. Bundan əlavə, uzadılma bir il olmaqla, ümumi uzadılmaya 5 ildən artıq yol verilmir, yəni bu proses işçinin 70 yaşına kimi davam etdirilir. 70 yaşdan sonra xüsusi xidmətləri olmayan işçilər birmənalı şəkildə işdən azad olunurlar. Bir incəliyi də qeyd edək ki, xüsusi xidmətlər səbəbindən uzatmanı ilk növbədə işəgötürən istəməlidir və sonradan işçi ilə razılaşdırmalıdır.
Belə çıxır ki, Göygöl Rayon Sanitar Epidemologiya Mərkəzinin müdiri Mahir Abdurəhmanovun 75 yaşı olmasına baxmayaraq olaraq hələ də vəzifə başında qalması rəhbərliyin istəyi ilə baş tutur və bu müvafiq qanunvericiliyə ziddir. 30 ildir vəzifədə olan bu adam məhrəm məclislərdə “yuxarıda yekə adamı” olduğunu tez-tez xatyırlatmağı xoşlayır, Prezidentin ona “əməkdar həkim” fəxri adı verməsi ilə öyünür. Sadaladığı xidmətləri isə 30 il ərzində rotasiya qaydasında verilmiş təltiflərdir ki, bunlar da “xüsusilik” statusu daşımır.
Görəsən, gedib nəvələri ilə oynamalı olduğu bu ahıl yaşında M.Abdurəhmanovun kreslodan bərk-bərk yapışmasının və rəhbərliyin onunla müqaviləyə xitam verməməsinin gerçək səbəbi nədir?
Qeyd edək ki, respublikada həyata keçirilən səhiyyə islahatlarının tərkib hissəsi kimi gigiyena və epidemiologiya tədbirlərinə xüsusi diqqət yetirilir. Respublika Gigiyena və Epidemiologiya Mərkəzinin və onun rayon şöbələrinin fəaliyyəti təmin edilib, yeni binalar istifadəyə verilib, avadanlıqlar alınıb, müasir laboratoriyalar qurulub, ştat strukturu təsdiq olunub. Əhalinin sağlamlığının qorunması və sanitar-epidemioloji xidmətin səviyyəsinin yaxşılaşdırılması məqsədilə qəbul olunmuş Dövlət Proqramları sanitar-epidemioloji sabitliyin qorunub saxlanılması, gigiyena və epidemiologiya tədbirlərinin əhatə dairəsinin genişləndirilməsi, eləcə də yoluxucu və parazitar xəstəliklərin yayılmasının qarşısının alınmasına xidmət edir. Sanitariya nəzarətinin həyata keçirilməsi, sanitariya qaydalarına və gigiyena normativlərinə nəzarət olunması, koronavirus pandemiyası ilə mübarizə tədbirlərinin davam etdirilməsi, kadr hazırlığı ilə bağlı işlərin görülməsi, rayonların epidemioloji xəritəsinin, epidemioloji pasportunun hazırlanması, dezinfeksiya işlərinin genişləndirilməsi kimi vəzifələr müəyyənləşdirilib, Səhiyyə Nazirliyi, Gigiyena və Epidemilogiya Mərkəzi, eləcə də aidiyyəti qurumlar qarşısında mühüm tapşırıqlar qoyulub.
Ancaq Göyçay rayonunda idarəolunan yoluxucu xəstəliklərə qarşı peyvənd işinin təşkili, dezinfeksiya, dezinseksiya, derartizasiya, delarvasiya tədbirlərinin ardıcıl və keyfiyyətsiz aparılması insanların sağlam ətraf mühitdə yaşamasını təmin etmir. Uşaq və yeniyetmələrin profilaktik tibbi müayinələrinin yaxşılaşdırılması, uşaqların dərin tibbi müayinələrinin keyfiyyətli təşkili, ümumtəhsil müəssisələrinin sanitariya vəziyyətinə və onun saxlanmasına dair tələblər, düzgün və rasional qidalanmanın, təhlükəsiz, keyfiyyətli su təminatının təşkili işi qeyri-qənaətbəxşdir.
Rayon əhalisinin sağlamlığının qorunması, infeksion, parazitar xəstəliklərin və kütləvi qida zəhərlənmələrinin qarşısının alınması üçün profilaktik tədbirlər vaxtında və keyfiyyətlə həyata keçirilmir. “Qocafəndi” işləyən Mahir Abdurəhmanov işlədiyi sahə üzrə dünyada və ölkəmizdə yayılan qabaqcıl metodlardan xəbərsizdir, müasir bilgiləri mənimsəmnəkdə çətinlik çəkir. Adam ərazinin sanitariya-epidemioloji vəziyyətini, ətraf mühitin vəziyyətini, demoqrafik prosesləri, əhalinin fiziki inkişafı və sağlamlığının öyrənilməsini və bu əsasda sağlamlaşdırıcı və tibbi-sosial tədbirlərin keçirilməsi üçün hələ də bir əhəmiyyətli təklif sürməyib.
Mediatv.az-a verilən məlumata görə Mərkəzin işçiləri M.Abdurahmanovdan aldıqları göstərişə uyğun olaraq, yalnız rayondakı obyektlərdən, xüsusilə də ərzaq mağazaları və ət kəsimi məntəqələrindən vaxtaşırı “racon” toplamaqla məşğuldurlar. Çox vaxt onların Qida Təhlükəsizliyi Agentliyinin işçiləri ilə mübahisə etdikləri də diqqəti çəkib. Gigiyenik vasitələr, dezinfeksiya məlulları kağız üzərində sərf olunmuş kimi göstərilir, əslində isə onların pulu mənimsənilir.
Redaksiyamızı məlumatlandıran mənbə bildirir ki,Mərkəzin ştat cədvəlində işə gəlməyən, əmək funksiyalarını yerinə yetirməyən xeyli sayda işçilərin (“ölücanlar”ın) olduğu deyilir ki, onların maaş kartları direktorun əlindədir. Əgər ciddi yoxlamalar aparılsa, Göyçay GEM-dən Abdurahmanovun sövdələşdiyi firmalara köçürülmüş müxtəlif məbləğlərdə pul vəsaitlərinin heç də təyinatı üzrə və səmərəli istifadə olunmadığı, leqallaşdırılaraq mənimsənildiyi məlum olar.
M.Abdurəhmanovun rayonda və ölkənin başqa yerlərində daşınmaz əmlak formasında qəsdən başqa qohumlarının adına rəsmiləşdirilmiş nəhayətsiz kapitala malik olduğu bildirilir.
Mövzuya qayıdacağıq.
Ülvin //mediatv.az//
