Mayın 23-də Elm və Təhsil Mərkəzi “Təfəkkür” universitetində Azərbaycan Xalq Cümhuriyyətinin yaranmasının 100 illik yubileyinə həsr olunmuş elmi-praktik konfrans keçirildi. Konfransı giriş sözü ilə açan universitetin rektoru, professor Rahim Hüseynov qonaqları və iştirakçıları salamladı. Salonda dövlət himni səsləndi.
Professor Rahim Hüseynov – dinlədiyiniz bu himn məhz 100 il bundan əvvəl Azərbaycan Xalq Cümhuriyyətinin qəbul etdiyi himndir, salonda dalğalanan bu bayraq məhz həmin illərdə ölkəmizin rəmzi kimi qəbul olunan bayraqdır – dedi.
Professor Rahim Hüseynov göstərdi ki, Qədim və zəngin dövlətçilik ənənələrinə malik olan Azərbaycan xalqı müəyyən dövrlərində böyük imperiyaların tərkibinə qatılmaq məcburiyyətində olmuşdur. Azərbaycan Xalq Cümhuriyyəti XIX əsrin axırları və XX əsrin əvvəllərində Azərbaycanın yaşadığı parlaq mədəni yüksəliş mərhələsinin məntiqi yekunu kimi meydana çıxmışdır. Azərbaycanın bu gün dünya birliyində müstəqil dövlət kimi bərqərar olmasının, demokratik ənənələrin, insan hüquq və azadlıqlarının qorunmasının, söz və mətbuat azadlığına geniş meydan verilməsinin əsası Azərbaycan Xalq Cümhuriyyəti dövründə qoyulmuşdur. Azərbaycan Prezidentinin “Azərbaycan Xalq Cümhuriyyətinin 100 illik yubileyi haqqında” kı sərəncamında müasir müstəqil Azərbaycan Respublikası Azərbaycan Xalq Cümhuriyyətinin varisi adlandırdığını vurğuladı.
“Ədəbiyyat” qəzetinin baş redaktoru Azər Turan, Dövlət İdarəçilik Akademiyasının professoru Fuad Məmmədov, “Təfəkkür” universitetinin professoru Cümşüd Nuriyev, N.Gəncəvi adına Ədəbiyyat institutunun baş elmi işçisi Elnarə Akimova və başqaları öz çıxışlarında Şərqin ilk demokratik müsəlman dövləti olan xalq Cümhuriyyətinin cəmi 23 aylıq fəaliyyəti müddətində öz üzərinə götürdüyü bir çox çətin tarixi vəzifələri şərəflə yerinə yetirdiyini dedilər. Azərbaycanın ilk universiteti təsis olundu, təhsil milliləşdirildi, xalqın sonrakı illərdə mədəni yüksəlişi üçün zəmin hazırlayan, ictimai fikir tarixi baxımından müstəsna əhəmiyyətli işlər görüldü.
Konfransda xalqımızın və milli dövlətçiliyimizin tarixində özünəməxsus yer tutan Azərbaycan Xalq Cümhuriyyətinin mürəkkəb bir dövrdə meydana gəldiyi və çox çətin şəraitdə fəaliyyət göstərdiyi qeyd olundu.
Xalqın təkidi ilə Ulu öndər Heydər Əliyev ikinci dəfə hakimiyyətə qayıtdıqdan sonra müstəqilliyimizin davamlı və əbədi olması yolunda qətiyyətli addımlar atıldı və bu sahədə qarşıya çıxan çətinliklər cəsarətlə aradan qaldırıldı.
Konfransda çıxış edənlər Heydər Əliyev siyasi kursunun layiqli davamçısı, Prezident İlham Əliyevin düşünülmüş strategiyası müstəqil Azərbaycanı dünyanın inkişaf etmiş demokratik dövlətlərindən birinə, beynəlxalq aləmdə söz sahibinə çevirildiyini dedilər.
Plenar iclasın sonunda çıxış edən beynəlxaql Mahmud Kaşqari fondunun sədri Elxan Zal Qaraxanlı fondun yaranma tarixi və məqsədindən danışdı. Fondumuz beynəlxalq əhəmiyyətlidir. Məqsədimiz Azərbaycan və ümumtürk elmini, mədəniyyətini, bu millətin layiqli nümayəndələrini dünyada tanıtmaqdır. 2006-cı ildə təsis edilən bu mükafata Türkiyənin 9-cu prezidenti Süleyman Dəmirəl, görkəmli Qazax şairi Oljas Süleymanov, Azərbaycandan akademik Abel Məhərrəmov, akademik İsa Həbibbəyli, professor İlham Rəhimli, xalq yazıçısı Çingiz Abdullayev və digər görkəmli şəxslər layiq görülmüşlər. Bu dəfəki mükafat Mahmud Kaşqarinin 1000 illik və Azərbaycan Xaql Cümhuriyyətinin 100 illik yubileyi ilə bağlı təsis edilmişdir, bu mükafatın və medalın layiq görüldüyü görkəmli elm adamlarından biridə Elm və Təhsil Mərkəzi “Təfəkkür” universitetinin rektoru, Azərbaycan elminin inkişafında xüsusi xidmətləri olan professor Rahim Hüseynovdur.
Elxan Zal Qaraxanlı dedi: Yüksək insani keyfiyyətləri, paklığı, sadəliyi və bir həkim qayğıkeşliyi ilə xalq arasında böyük hörmət qazanmış professor Rahim Hüseynovun əməyi yüksək qiymətləndirilmişdir. Beynəlxalq informatizasiya Akademiyasının həqiqi üzvüdür. “Dünya informasioloqları elitası” ünvanlı beynəlxalq müsabiqələr, akademik S. Vavilov və akademik Y. Məmmədəliyev adına mükafatların laureatıdır. Bu gün bu mükafatlar sırasına daha bir mükafat Beynəlxalq Mahmud Kaşqari Mükafatı əlavə olunur. Medalı Fondun sədri Elxan Zal Qaraxanlı Rahim Hüseynova təqdim etdi.
Sonra isə Yeni Azərbaycan Partiyası Nərimanov rayon təşkilatının sədri Təmraz Tağıyev 11 aprel 2018-ci il Prezident seçkilərində Nərimanov rayon Seçki Qərargahının qərarı ilə Elm və Təhsil Mərkəzi “Təfəkkür” Universitetinə seçkilərdə fəal iştirakına görə verilmiş Fəxri fərmanı universitetə təqdim etdi.
Universitetin rektoru verilən mükafatlara görə kollektiv adından öz təşəkkürünü bildirdi.
