Azərbaycan XİN-nin İranın Bakıdakı səfirinə nota verməsi deyəsən, rəsmi Tehrana dərs olmadı. İran yenə də qarabağlı ermənilərə hər formada dəstək verməyə davam edir.
İndi də İran Qarabağa "işləmək üçün" tikinti işçiləri yollamağa hazırlaşır. İranın Mazandaran vilayətindəki Tonekabon şəhərində yayılmış elanda deyilir: "Ermənistanın Qarabağ bölgəsində işləmək üçün metal karkaslarla (armaturlarla) çalışmağı bacaran təcrübəli mütəxəssislər gərəkdir. Sağlamlıq arayışının təqdimatından sonra firma iş yerinə çatdırılma və orada yaşama ilə bağlı bütün xərcləri öz üzərinə götürür. Yüksək əməkhaqqına təminat verilir".
Təbii, İranın Azərbaycandakı səfiri dərhal deyə bilər ki, "bu, fərdi elandər və rəsmi dövlət siysəti deyil".
Fəqət, İrana azacıq bələd olan hər kəs əla bilir ki, klerikal İranda özəl şirkətlərlə dövlət qurumları arasında nə kimi əlaqələr var.
Üstəlik, "Ermənistanın Qarabağ bölgəsi" ifadəsinin yer aldığı bu həyasız elan İranın dövlət maraqlarına zidd olsaydı, elan dərhal yox ediləcək, elanı verənlər isə cəzalanacaqdılar.
Cənub qonşumuz olan ölkədəki mövcud sistem əksər hallarda rəsmi qurumların və strukturların fəaliyyətini özəl şirkətlərlə pərdələyir.
Lakin Tehran unudur ki, Qarabağda əcnəbi vətəndaşların fəaliyyəti yalnız rəsmi Bakının icazəsindən sonra ola bilər.
Üstəlik, İran Qarabağdakı bərpa və infrastruktur layihələrində iştirak etmək istəyirsə, yenə də Bakıya müraciət edə bilərdi.
Zatən biz işğaldan azad edilmiş ərazilərdəki genişmiqyasıl layihələrə qatılmaq üçün xarici dövlətlərə və şirkətlərə çağırışlar edirik.
Fəqət, niyə təəccüblənirik ki.
Ərazilərimizin 20 faizinin erməni işğalında olduğu onillər ərzində İran daim işğalçı Ermənistanı dəstəkləyib.
İran Qarabağdakı terrorçu rejimə daim yanacaq, ərzaq, tikinti materialları və s. yollayıb, indi də yollayır.
Tehran çirkin oyunlarından əl çəkməyib.
Bu dəfə hansısa özəl şirkətin "fərdi təşəbbüsü" vasitəsilə Azərbaycan ərazisi Qarabağa qanunsuz olaraq vətəndaşlarını yollamağa hazırlaşan İran İslam Respublikasının müvafiq dövlət qurumlarının nümayəndələri anlayırlar ki, bu minvalla Azərbaycanla münasibətlərə sərinlik gələ bilər.
İran hadisələrin bütün mümkün inkişaf ssenarilərini bilir, amma Cənubi Qafqaz regionunda təsir rıçaqlarına malik olmaq üçün Ermənistandan alət kimi istifadə etməyə davam edir.
İranda verilən fətvadan az qala ekstaza düşən, imkan düşən kimi "İranın Azərbaycana himayəsi" kimi sərsəm ifadələr söyləyənlər görəsən, indi nə deyəcəklər?
Elçin Alıoğlu
Milli.Az
