Azərbaycan Prezidenti İlham Əliyevin Belarus Prezidenti Aleksandr Lukaşenko ilə Bakıda keçirilən qeyri-rəsmi görüşü 5 saat davam edib.
Virtualaz.org bildirir ki, məlumatı Belarusun rəsmi agentliyi olan “BelTA” yayıb.
“Aleksandr Lukaşenko Bakıya gəldikdən dərhal sonra azərbaycanlı həmkarı ilə görüşə gedib. Prezidentlər təxminən Bakı vaxtı ilə 19:00-da görüşüb, qeyri-rəsmi danışıqlar gecə yarısına qədər davam edib”, - deyə məlumatda bildirilib.
Liderlər arasında hansı məsələlərin müzakirə olunduğu açıqlanmayıb.
Amma bir müddət öncə Belarus Prezidentinin Mətbuat xidməti məlumat yaymışdı ki, dövlət başçıları Belarus-Azərbaycan münasibətlərinin əsas istiqamətləri və ikitərəfli əməkdaşlığın strateji məsələlərini müzakirə edəcəklər.
Lukaşenkonun Mətbuat xidmətinə yaxınlığı ilə tanınan “Pul Pervoqo” Teleqram kanalı isə bildirib ki, qeyri-rəsmi görüşdə əsasən beynəlxalq məsələlər müzakirə olunub və danışıqların keçirildiyi otaqda prezidentlərə çoxlu sənədlər təqdim olunub.
“BelTA” onu da bildirib ki, bu gün (aprelin 14-də) dövlət başçıları Azərbaycan Prezidentinin iqamətgahında rəsmi danışıqlar aparacaqlar. Gözlənilir ki, bu danışıqlar zamanı əsas diqqət ticarət-iqtisadi əlaqələrin genişləndirilməsinə və əməkdaşlığın yeni məzmunla zənginləşdirilməsinə yönəldiləcək.
**20:14 (13.04.2021)
Azərbaycan və Belarus prezidentlərinin ilk görüşü qeyri-formal şam yeməyi formatında təşkil olunub.
Virtualaz.org bildirir ki, məlumatı Belarus dövləti başçısının Mətbuat xidmətinə istinadən BelTA yayıb.
Agentliyin qənaətinə görə, təcrübə göstərir ki, bəzən bu cür danışıqlar vaxtı rəsmi iclaslarda olduğundan daha çox məsələni həll etmək olur.
"Qeyri-formal şəraitdə dövlət başçıları Belarus - Azərbaycan münasibətlərinin əsas istiqamətlərini və ikitərəfli əməkdaşlığın strateji məsələlərini müzakirə edəcəklər",-deyə dövlət başçısının Mətbuat xidmətindən daha əvvəl verilən məlumatda bildirilib.
Məlumata görə, danışıqların rəsmi hissəsi çərşənbə gününə nəzərdə tutulub.
