Oruc Əhmədov: "Məhkəmələr də bu qanunsuzluğa "hüquqi don" geyindirir
Qarabağ müharibəsinin veteranı Əhmədov Oruc Əhməd oğlunu və onun ailə üzvlərini işdən çıxartdıqdan sonra 10 ildən artıq yaşadıqları xidməti mənzilindən bayıra atıblar. Özü də qanunla nəzərdə tutulmuş qaydaya - yəni mənzillə təmin olunmaq hüququna məhəl belə qoymadan. Məhkəmə çəkişmələri müstəvisində "uduzdurulduğunu" söyləyən veteran son anda Azərbaycan Respublikasınınn Prezidenti İlham Əliyev cənablarına və digər icra strukturlarına, hüquq-mühafizə orqanlarının rəhbərlırinə müraciət etmək qərarına gəlib. Bir surəti də kütləvi informasiya vasitələrinə ünvanlanan müraciətdə Oruc Əhmədov bütün başına gələnləri və keçmiş iş yeri olan AMEA-nın N.Tusi adına Astrofizika Rəsədxanasında baş verənləri ictimailəşdirməyə məcbur olduğunu deyir.
Qarabaq veteranı Oruc Əhmədovun Azərbaycan Respublikasının Prezidenti İlham Əliyev cənablarına, Azərbaycan Respublikasının Birinci vitse-prezidenti Mehriban xanım Əliyevaya, Azərbaycan Respublikası Ali Məhkəməsinin sədri Ramiz Pzayevə, Azərbaycan Respublikası Milli Elmlər Akademiyasının prezidenti Akif Əlizadəyə ünvanladığı müraciətdə onun, həyat yoldaşı Əhmədova Gülnarə Sərxan qızının əvvəlcə AMEA-nın N.Tusi adına Astrofizika Rəsədxanasındakı işlərindən, ardınca ikisi azyaşlı olmaqla 3 uşağı ilə birlikdə onlara 10 ildən artıq müddətdə verilmiş xidməti mənzildən çıxarılması ilə bağlı iddialardan və məhkəmə instansiyalarının da bu iddialara müvafiq qərarlarından şikayət edib. Rəsədxananın yeni rəhbərliyinin onlarla hansısa "səbəbdən" işləmək istəmədiyini söyləyən O.Əhmədov xidməti mənzillərdən çıxmalarının qanunamüvafiq şəkildə baş verməsini istəyir. Belə ki, onun və hüquqlarını müdafiə edən vəkil Akif Əliyevin bildirdiyinə görə, Qarabağ veteranı olan O.Əhmədovun və onun ailəsinin xidməti mənzildən küçəyə atılması üçün hüquqi əsas yoxdur. Çünki Azərbaycan Respublikasının Mənzil Məcəlləsinin tələblərinə, konkret olaraq 105-ci maddəsinə əsasən bir sıra şəxslərə, o cümlədən xidməti yaşayış sahəsi vermiş müəssisədə, idarədə, təşkilatda azı on il işləmiş şəxslərə digər yaşayış sahəsi verilmədən onlar xidməti yaşayış sahəsindən çıxarıla bilməzlər.
Lakin Şamaxı Rayon Məhkəməsinin 25 iyul 2017-ci il tarixli qətnaməsi ilə iddiaçı AMEA-nın N.Tusi adına Astrofizika Rəsədxanasının, Əhmədov Oruc Əhməd oğluna, Əhmədova Gülnarə Sərxan qızına və Əhmədli Əli Oruc oğluna qarşı “xidməti yaşayış sahəsindən çıxarılma və mənzilin boşaldılması” tələbinə dair iddia ərizəsi təmin edilmişdir.. Nəhayət, işə Azərbaycan Respublikası Ali Məhkəməsində baxılmış, bu instansiyada da 06 mart 2018-ci il tarixli Qərarla Oruc Əhmədovun iddiası təmin olunmamış, Sumqayıt Apellyasiya Məhkəməsinin Mülki Kollegiyasının qətnaməsi dəyişdirilmədən saxlanılmışdır.
Oruc Əhmədov bildirir ki, məhkəmələr hansısa "gizli bir əlin" təsiri altında bu iddiaları təmin edib, Mənzil Məcəlləsinin yuxarıda qeyd etdiyimiz konkret tələbini isə bir kənara atıblar. Əks təqdirdə ən azı onun və iki azyaşlı uşaqlı ailəsinin digər mənzillə təminatı məhkəmə qərarlarında öz əksini tapmış olardı. Lakin göründüyü kimi, məhkəmələr AMEA-nın N.Tusi adına Astrofizika Rəsədxanası rəhbərliyinin bu qanunsuz əməllərinə "hüquqi don" geyindirməklə məşğul olmuşlar.
Vəkil Akif Əliyevin bildirdiyinə görə burada həmçinin Azərbaycan Respublikası Konstitusiyasının 43-cü maddəsinin müddəaları da kobud şəkildə pozulmuşdur. Belə ki, Normativ Hüquqi Aktlar haqqında Azərbaycan Respublikasının Konstitusiya Qanununun 87.1-ci maddəsinə əsasən Normativ hüquqi aktın geriyə qüvvəsi Azərbaycan Konstitusiyasının 149-cu maddəsinin VII hissəsi ilə tənzimlənir.
Həmin Qanunun 87.2-ci maddəsinə əsasən fiziki və hüquqi şəxslərin hüquqi vəziyyətini yaxşılaşdıran, hüquqi məsuliyyətini aradan qaldıran və ya yüngülləşdirən normativ hüquqi aktın qüvvəsi həmin normativ hüquqi aktda və ya onun qüvvəyə minməsi haqqında aktda birbaşa göstərilib-göstərilməməsindən asılı olmayaraq onun qüvvəyə minməsindən əvvəl əmələ gələn münasibətlərə şamil edilir.
Azərbaycan Respublikası Konstitusiyanın 149-cu maddəsinin Vll hissəsi və Normativ Hüquqi Aktlar haqqında Azərbaycan Respublikası Konstitusiyasının 87.1-ci maddəsi Oruc Əhmədovun vəziyyətini yüngülləşdirdiyinə görə, hazırkı mülki işə baxılarkən 01.09.2009-cu ilədək qüvvədə olmuş Azərbaycan Respublikasının Mənzil Məcəlləsinin 105-ci maddəsi tətbiq olunmalı idi ki, aşağı instansiya məhkəmələri buna məhəl qoymamışlar. Həmçinin Azərbaycan Respublikası Konstitusiyasının 43-cü maddəsinə əsasən hər kəs yaşadığı mənzildən qanunsuz məhrum edilə bilməz.
Qarabağ döyüşçüsü Oruc Əhmədov indi ailəsinin, azyaşlı övladlarının küçəyə atılmasının qorxusu altında öz mübarizəsini davam etdirir. Onun hələlik sonuncu ümid yeri başda Azərbaycan Respublikasının Prezidenti İlham Əliyev cənabları olmaqla üz tutduğu bütün icra strukturları və hüquq-mühafizə orqanlarının rəhbərləridir. O, ən azından Qarabağ döyüşçüsünə olan bu münasibətin Avropa məhkəmələrində deyil, ölkəmizin hüdudları çərçivəsində çözülməsini istəyir. Bəs iddiaçılar necə, bunun fərqində olacaqlarmı?!..
