“Kanal 13” internet televiziyasının həbsdəki rəhbəri Əziz Orucovun səhhətində ciddi problemlər yaranıb. Hazırda 14 saylı cəzaçəkmə müəssisəsində məhbus həyatı yaşayan jurnalist böyrək ağrılarından əziyyət çəkir. Onunla bağlı aidiyyəti qurumlara edilən müraciətlər hələ də cavabsız qalır.

Ə.Orucovun həyat yoldaşı Lamiyə Orucova “Yeni Müsavat”a açıqlamasında onun son durumundan danışdı: “Sonuncu dəfə martın 26-da Əzizlə görüşdüm. Əhval-ruhiyyəsi yaxşı olsa da, ağrılarının olduğunu dedi. Sonuncu telefon danışığımızda da ağrılarının artdığını, hətta döş qəfəsində küt ağrılarını olduğunu, bəzən qolunun uyuşduğunu dedi. Əziz bəydə xroniki böyrək çatışmamazlığı var və onun müalicəsi təbii bitkilərlə aparılır, daima nəzarətdə saxlanılır. İndi həbsxanada olduğu və nəzarətdən kənarda qaldığı üçün böyrəyinin ağrıları artıb və təzyiqinin qalxmasına səbəb olub. Həbsxana həkimi uzaqbaşı təzyiqi aşağı salmaq üçün dərmanlar verə bilər, bu da vəziyyəti daha da pisləşdirər. Çünki böyrəyində problem olduğu üçün dərmanları normal süzmür. Bununla yanaşı ürəyində də problemlər yaranıb. Hələ ki heç bir tədbir görülməyib ki, məndən dərman almağımı xahiş etdi. Durumla bağlı Qırmızı Xaç Cəmiyyətinə və Ombudsmana e-mail göndərmişəm. Ümid edirəm ki, Əziz bəyin ziyarətinə gedib səhhəti ilə bağlı problemlərin həll olunmasına yardımçı olarlar”.

Xatırladaq ki, Ə.Orucov 2017-ci il mayın 2-də polisə müqavimətdə təqsirli bilinərək 30 sutka inzibati həbs cəzası alıb. İnzibati həbsin sona çatmasına az qalmış Baş Prokurorluğun Ağır Cinayətlərə Dair İşlər üzrə İstintaq İdarəsində ona qarşı cinayət işi başlanıb, haqqında həbs qətimkan tədbiri seçilib. Ötən il dekabrın 15-də isə Bakı Ağır Cinayətlər Məhkəməsi jurnalisti dövlət qeydiyyatına alınmamış qrant vəsaitlərindən külli miqdarda qanunsuz gəlir əldə etməkdə təqsirli bilərək 6 il müddətinə azadlıqdan məhrum edib.

Cavanşir ABBASLI,
“Yeni Müsavat”