Sabah Türkiyədə "İstanbul Başakşehir Fatih Terim" stadionunda Avropa Liqasının 5-ci turu çərçivəsində Ağdamın "Qarabağ" klubu Təl-əvivin "Makkabi" komandası ilə qarşılaşacaq.

Nyus.Az xatırladır ki, UEFA Qarabağ müharibəsi ilə bağlı Azərbaycanda beynəlxalq oyunların keçirilməsinə qadağanı hələ aradan qaldırılmadığı üçün "Qarabağ" bu oyunun nominal ev sahibi olacaq.

Azərbaycan çempionları bu gün səhər Türkiyəyə yola düşüblər. Komandamızın koronavirusla bağlı böyük itkiləri var. Belə ki, “Qarabağ" oyun öncəsi UEFA-nın tələblərinə uyğun koronavirus testindən keçib.

Klubun rəsmi saytının məlumatına görə, Mahir Emrelidən sonra bir müddətdir Türkiyədə reabilitasiya keçən müdafiəçi Abbas Hüseynovda koronavirus aşkarlanıb.

Daha öncə isə komandanın baş məşqçisi Qurban Qurbanov və tərcüməçisi Elvar Quliyevdə testin nəticəsi pozitiv çıxıb.

Milli komandanın düşərgəsində koronavirusa yoluxmuş Maksim Medvedev hələ də malicəsini Lüksemburqda davam etdirir. Xorvatiyada müalicə keçən müdafiəçi Rahil Məmmədovun dünənki testinin nəticəsi mənfi çıxıb və o, Türkiyəyə gələrək komandaya qoşulub.

Milli komandanın heyətindən gəldikdən sonra koronavirus aşkarlanmış Musa Qurbanlının isə son iki testi neqativ çıxıb. Lakin futbolçu məşqlərdən uzaq olduğu üçün "Makkabi" ilə oyunun heyətinə əlavə edilməyib.

Qurban Qurbanovun köməkçisi Elçin Rəhmanov bugünki mətbuat konfransında jurnalistlərə bildirib ki, hazırda onun sərəncamında 13-14 nəfər sağlam futbolçu var.

Xatırladaq ki, hazırkı Avropa Liqasında "Qarabağ"ın hələlik xalı yoxdur. Komanda dörd matçın dördündə də məğlum olub. O cümlədən "Makkabi"yə. İsraildə keçirilən ilk matçda Ağdam klubu 0:1 hesabı ilə uduzub.

Onu da qeyd edək ki, dekabrın 3-də İstandulda keçiriləcək “Qarabağ” – “Makkabi” matçı Bakı vaxtı ilə saat 21:55-də başlayacaq. (Virtualaz.org)

Nyus.Az