Xəbər verdiyimiz kimi, Azərbaycan Respublikasının Xarici İşlər naziri Ceyhun Bayramovun Cenevrədə ATƏT-in Minsk Qrupunun həmsədrləri və Ermənistan Xarici İşlər naziri ilə görüşü başa çatıb.
Xarici İşlər Nazirliyindən virtualaz.org-a verilən məlumata görə, görüşdə nazir Ceyhun Bayramov münaqişənin beynəlxalq hüququn norma və prinsipləri, eləcə də BMT Təhlükəsizlik Şurasının qətnamələri və beynəlxalq təşkilatların qərar və sənədləri əsasında həllinə dair Azərbaycanın mövqeyini təqdim edib.
Humanitar tədbirlərdən bəhs edən Ceyhun Bayramov Azərbaycanın sərgilədiyi konstruktiv yanaşmanı vurğulayıb. Bu xüsusda, Azərbaycan tərəfindən birtərəfli qaydada cəsədlərin, habelə ahıl erməni qadınının Ermənistan tərəfinə təhvil verildiyini qeyd edib. Nazir Azərbaycanın bu təklifi çox öncədən irəli sürdüyünü bildirib.
Ceyhun Bayramov həmçinin Ermənistanın beynəlxalq humanitar hüququ kobud şəkildə pozaraq mülki şəxsləri və yaşayış məntəqələrini məqsədli şəkildə atəşə tutmasının qəbuledilməz olduğunu vurğulayıb.
**00:34
Azərbaycan və Ermənistan XİN başçıları Ceyhun Bayramov və Zöhrab Mnatsakanyan arasında Qarabağ nizamlanması məsələsi ilə əlaqədar Cenevrədə keçirilən görüş başa çatıb.
Virtualaz.org bildirir ki, bu barədə “İnterfaks”a Ermənistan XİN-in mətbuat katibi Anna Naqdalyan məlumat veib.
“Görüş başa çatıb”, - deyə o, qısaca bildirib.
Nazirlərin görüşü altı saatdan artıq davam edib.
Naqdalyan görüşün təfərrüatları barədə məlumat verməyib.
**17:17 (30.10.2020)
Azərbaycan və Ermənistan Xarici İşlər nazirləri Ceyhun Bayramovla Zöhrab Mnatsakanyanın Cenevrədə görüşü başlayıb.
Görüş ATƏT-in Minsk Qrupunun həmsədrlərinin vasitəçiliyi keçirilir.
Görüşdə həmsədrlər və ATƏT-in fəaliyyətdə olan sədrinin şəxsi nümayəndəsi Anjey Kaspşik iştirak edir.(virtualaz.org)
Nyus.Az
