Qərb növbəti dəfə kürdləri yarı yolda qoymağa hazırlaşır
Suriyanın Afrin bölgəsini silahlı terror dəstələrindən təmizləmək üçün yanvarın 20-dən başlayan Afrin əməliyyatı həlledici mərhələyə qədəm qoyub. Türkiyənin "Anadolu" Agentliyinin Türkiyə ordusu Baş Qərargahına istinadən verdiyi məlumata görə, “Zeytun budağı” əməliyyatı çərçivəsində zərərsizləşdirilən terrorçuların sayı 3347 nəfərə çatıb. Son ana qədər 1100 kvadratkilometr ərazi azad edilib.
Bazar günü davam edən əməliyyatlar zamanı 18 əməliyyat nöqtəsi terrorçulardan alınıb. Hazırda Türkiyə ordusunun Afrin şəhər mərkəzinə 1,5 kilometr məsafədə olduğu bildirilir. O da məlum olub ki, Afrin rayon mərkəzinə doğru şərq və cənub xəttində şərqdən cənub-şərqə doğru 1,5 kilometr irəlilədikdən sonra Afrin mühasirəyə düşəcək. Afrinin cənubdan mühasirəyə alınması üçün 3,5 kilometr məsafə qalıb. Hələlik Afrinin sonuncu - 6-cı rayonu olan Mabatlının təmizlənməsi əməliyyatı başlamayıb. Davam edən əməliyyatlar nəticəsində daha 8 kənd azad edilib.
Qeyd edək ki, yanvarın 20-dən başlayan əməliyyat nəticəsində bu günə qədər 197 ərazi vahidi, o cümlədən 159 kənd və 33 post azad edilib. Bu arada bölgədə fəaliyyət göstərən media orqanları Afrini tərk edən mülki əhali və maşın karvanlarının şəkillərini yayıb. Ehtimal olunur ki, mülki əhali artıq Afrin mərkəzini tərk edərək gedir. Afrindən qaçanların bir qisminin Suriya hökumətinin nəzarətində olan bölgələrə yerləşdiyi, bir qisminin isə kürd bölgələrinə, o cümlədən Menbicə doğru getdiyi ehtimal olunur. Ancaq qəribədir ki, daha əvvəl mülki əhalinin Afrindən çıxmasına imkan verməyən silahlılar artıq bunu etmirlər və ya edə bilmirlər. Mümkündür ki, bu, Afrində planlaşdırılan müdafiə tədbirlərinin bir qismidir.
Bu arada Türkiyənin baş qərargah rəisi ordu generalı Hulusi Akar bəyan edib ki, Afrində əməliyyat eyni zamanda İŞİD terrorçularına qarşı həyata keçirilir. Onun sözlərinə görə, İŞİD terrorçuları kürdlərə qatılaraq Türkiyə ordusuna müqavimət göstərir. Baş qərargah rəisi həmçinin əməliyyat zamanı tarixi abidələrin xüsusi şəkildə qorunduğunu, ətraf mühitə zərər vurulmaması üçün diqqət göstərildiyini bildirirb. H.Akar “Zeytun budağı” əməliyyatı zamanı 60-a yaxın terrorçunun əsir alındığını və onların yaralı olanlarının müalicə aldıqlarını bildirib.
Qeyd edək ki, bir neçə gün əvvəl Türkiyə mediasında ABŞ və Türkiyə hakimiyyətləri arasında Suriya mövzusu, xüsusən də Afrin və Menbic əməliyyatları barədə razılaşma olduğu haqda xəbərlər yayıldı. Hələlik bu xəbərləri təsdiqlətmək mümkün deyil. Ancaq hazırda Afrinin yalnız mərkəzinin qaldığını və sürətlə mühasirəyə düşdüyünü nəzərə alsaq, o zaman ABŞ-ın Afrinin getməsi ilə barışdığını deyə bilərik. Əslində kürdlərin də nəzəri baxımdan Afrini itirmələri ilə barışdığını demək olar. Sadəcə, görünür ki, Afrində müdafiə qurmaqla Menbici itirmənin qarışısını almaq istəyirlər. Çünki Ankara artıq bəyan edib ki, Afrindən sonra Menbicə yönələcəklər.
Hələlik qəti demək çətin olsa da, belə anlaşılır ki, kürdlər növbəti dəfə xəyal qırıqlığı yaşayacaqlar. Amerika İŞİD-ə qarşı mübarizədə olduğu kimi, kürdlərin yanında dayanmağa maraqlı olmayacaq.
Kənan RÖVŞƏNOĞLU,
“Yeni Müsavat”
