Deyəsən Azərbaycan Respublikası Prezidentinin 4 mart 2016-cı il tarixli Sərəncamı ilə Salyan rayon İcra Hakimiyyətinə başçı təyin olunan Sevindik Hacıağa oğlu Hətəmov, iş fəaliyyəti ilə bağlı Gundemxeber.Az saytında tənqidi məqalələr yayımlanarkən olduqca təşvişə düşür və barəsində yayımlanmış tənqidi məqalələrə, sanki açıq-aşkar şəkildə dözümsüzlük də nümayiş etdirir.
Ola bilər ki, adı çəkilən vəzifə sahibinin belə bir yanaşma ortaya qoyması, məhz onun xarakterik xüsusiyyətindən asılı olan məsələ olsun. Amma, onu da unutmaq olmaz ki, bu gün Sevindik Hətəmov icra başçısı vəzifəsini daşıyan bir şəxsdir və rəhbərlik etdiyi Salyan rayonunun sayı-hesabı bilinməyən sayda sosial problemləri mövcuddur. Belə bir səbəblər üzündən də, bir çox media qurumları, hər zaman Salyan RİH-i başçısının iş fəaliyyətində yol verdiyi nöqsanlara, rayon ərazisində baş alıb gedən çoxsaylı sosial problemlərə xüsusi önəm verir və hər cür çatışmazlığın ictimailəşdirilməsinə də çalışır.
Onu da bildirək ki, Sevindik Hətəmov 2012-2016-cı illər ərzində Yardımlı RİH-nin başçısı vəzifəsini daşıyıb və ötən illər ərzində qol qoyduğu çoxsaylı qanunsuzluqlar səbəbindən, onun iş fəaliyyəti daim tənqid atəşinə tutulub. Salyanın icra başçısı olduqdan sonra da, əksər media qurumlarında Sevindik Hətəmovla bağlı yayımlanan tənqidi məqalələrin ardı-arası kəsilmədi. Məsələn, bir müddət bundan əvvəl bəzi media qurumlarında məlumat yayılmışdı ki, Sevindik Hətəmovla birinci müavin Etibar Hüseynov arasında əməlli-başlıca qarşıdurma yaranıb. Belə bir qarşıdurmanın kökündə isə, icra başçısının birinci müavini vəzifəsindən uzaqlaşdırmaq istəyinin durduğu iddia olunurdu.
Məsələnin maraqlı tərəfi odur ki, Salyan RİH-i başçısının iş fəaliyyətində qol qoyduğu çoxsaylı qanunsuzluqlarla bağlı, hələ bir neçə gün bundan öncə Anaxeber.info saytında “Turan” imzası ilə yayımlanmış “Salyanın icra başçısına həbs təhlükəsi- Növbədə Sevindik Hətəmovdur?” başlıqlı məqaləni istinad etmək şərtilə, 18 may 2020-ci il tarixdə Gundemxeber.Az saytında yayımladığımız zaman, yazının saytdan çıxarılması ilə bağlı icra hakimiyyətinə yaxın şəxslərdən müəyyən təkliflər aldıq. Amma bununla razılaşmadığımız halda, “hərtərəfli hücumlar”a məruz qaldıq. Söz yox ki, bu dəfə meydanda Sevindik Hətəmovun özü deyil, məhz onun “emisar”ları “baş rollar”da çıxış etdilər. Düzdür, onlar “ilk hücum”larının effekt verə bilməyəcəyini hiss etdiklərindən, son anda “hücum taktikaları”nı dəyişməyə məcbur oldular.
Onu da vurğulamaq yerinə düşər ki, yuxarıda qeyd etdiyimiz bu başlıq adı altında məqalə ilk dəfə Anaxeber.info saytında, sonra isə Gundemxeber.Az daxil olmaqla, bir neçə xəbər portallarında yayımlandı. Çox keçmədi ki, həmin məqalə ilk mənbə olan Anaxeber.info saytından hansısa razılaşma əsasında silindi, az sonra isə Sevindik Hətəmovun “emisar”ı “şirinlik çatdırmaq” təklifini bizə də bildirdi. Yəqin ki, etdiyi təklifdən “əliboş” geri dönən “emisar”ın icra başçısına çatdırdığı cavab, məhz Gündemxeber.Az-ın icra başçısının “nişangahına düşməsinə” səbəb oldu. Belə ki, sosial şəbəkə üzərindən əldə etdiyimiz məlumata görə, Salyan RİH-nin başçısı tənqidi məqalə dərc edən və ilk mənbə olan Anaxeber.info saytını deyil, birbaşa Gundemxeber.Az saytını “dar ağacından asmaq” üçün məhkəməyə müraciət edib. Belə bir halın varlığı da, məhz ortaya çoxsaylı sualların çıxmasına səbəb olmaqdadır. Nədən Gundemxeber.Az saytı!
https://anaxeber.info/41424-salyanin-icra-bascisina-hebs-tehlukesi-novbede-sevindik-hetemovdur.html
Bu da onu söyləməyə əsas verir ki, hazırda köhnə klanlardan qalan məmurlar heç də vərdiş etdiyi xislətlərindən əl çəkmək istəyində deyillər. Yəni, onlar qol qoyduqları çoxsaylı qanunsuzluq əməllərini, korrupsiya faktlarını, hətta bir çox cinayət əməllərini və s. “ört-basdır” etmək üçün, ayrı-ayrı redaksiyaları məhkəmələrə sürükləmək istəyinə düşüblər. Sevindik Hətəmov da köhnə klanlardan qalma məmurlardan biridir. Fakt budur ki, hal-hazırda bu cür əməl sahibi olan məmurların fırıldaq əməllərinin, qol qoyduqları qanunsuzluqların, cinayət əməllərinin qarşısını almaq mümkün deyil. Ona görə də bu kimi halların aradan qaldırılması üçün, DTX-nın bu cür əməl sahibi olan məmurlara qarşı da əməliyyat keçirmələrinə ehtiyac duyulur. Düşünürük ki, əgər Salyan RİH-də belə bir əməliyyyat keçirilərsə, o halda nəinki icra başçısının yaxın çevrəsində olan bəzi vəzifə sahibləri, hətta bu şəxsin media sahəsindəki “emisarları” da oturduqları yerdə oturmağa məcbur olacaqlar. O da hər kəsə məlumdur ki, bugünə kimi DTX Ağstafa, Neftçala, Biləsuvar və İmişli RİH-ində, Mədəniyyət Nazirliyində, Dövlət Sərhəd Xidmətində (DSX) həbslər həyata keçirib. Ümumi müşahidələr onu göstərir ki, rüşvət və korrupsiyaya, hər cür əyintilərə qarşı mübarizə tədbirləri bundan sonra da davam etdirilməlidir və növbəti hədəf, məhz Salyanın icra başçısı Sevindik Hətəmov ola bilər.
Bir anlığa diqqət yetirək ki, hal-hazırda Salyan RİH-nin başçısı hər cür əndazəni aşır və onun fırıldaq əməllərini ictimailəşdirən media qurumlarını susdurmağa çalışır. Bu da onu söyləməyə əsas verir ki, ölkə rəhbəri cənab İlham Əliyevin hər bir vəzifə sahibinə, ələlxüsus icra başçılarına etdiyi çağırışa Sevindik Hətəmov məhəl qoymur. Çünki bu şəxsin “forsmajor davranışı”, daha çox isə Gundemxeber.Az saytına qarşı bəslədiyi qisasçılıq hissi, məhz bizi bu gün belə bir qənaətə gəlməyə sövq edib.
Gundemxeber.Az
