İmişli RPŞ-nin rəisi Vilyam Hacıyevin həbsindən sonra 5 polis nəfərini çıxılmaz vəziyyətə salıb...
İmişli rayon İH-nin sabiq başçısı Vilyam Hacıyevin səs-küylü həbsindən sonra illərdir ki, yerinə oturulmuş daşlar bu əyalətdə tərpənməyə başlayıb. DTX-nin əməliyyat çəkilişində Regional Enerji idarəsinin rəisi Canəhməd Əhmədovun Vilyam Hacıyevə 5 ay müddətində 10 min manat vəsait ödəyərək əlil və şəhid ailələri üçün inşa edilmiş sosial evlərdən birinə sahibləndiyini etiraf edəndən sonra bəzi şəxslər də hərəkətə keçib. Bununla bağlı cumhuriyyet.az-a daxil olan məlumata görə, hələ ki, bu hərəkətlilik qapalı formada davam etsə də, lakin narazılıqların miqyasının böyüməsi ehtimal olunur.
Belə ki, İmişlidəki mənbədən cumhuriyyet.az-a daxil olan məlumatda qeyd edilir ki, rayon Polis Şöbəsinin rəisi Fizuli Şıxəliyev də müəyyən kateqoriyayaya aid olan şəxslər üçün inşa edilmiş sosial evlərdən birini sürücüsünün adına rəsmiləşdirməklə Vilyam Hacıyevə müəyyən edilmiş məbləğdə ödəmə edərək alıb. Lakin bu məsələnin yekunu deyil. Fizuli Şıxəliyev daha 5 nəfər polis əməkdaşından 5 mənzil müqabilində aldığı vəsaiti Vilyam Hacıyevə versə də, həmin mənzillər sahiblərinə təhvil verilməyib. Rayondakı mənbənin cumhuriyyet.az-a verdiyi məlumata görə polislər V.Hacıyevin həbsindən sonra rəislə görüşsələrdə onları qane edəcək hər hansı cavab almayıblar. Mənbə əlavə olaraq bildirdi ki, çıxılmaz vəziyyətdə olan 5 polis nəfəri artıq nə edəcəklərini bilmirlər.
Oxucuların nəzərinə onu da çatdıraq ki, təqaüd yaşına çatmış İmişli RPŞ-nin rəisi F.Şıxəliyev son təyinatını müqavilə əsasında icra edir. Yəni artıq təqaüd yaşında olan rəis yəqin ki, sonrakı fəaliyyətini İmişli – Kürdəmir yolunun kənarında yerləşən fermasında davam etdirməyi düşünür. Əslində cənab rəisin hal-hazırkı vəziyyətdə də işləri pis getmir. Maraqlı məqam odur ki, rəis günün müəyyən bir hissəsini RPŞ-nin arxasındakı çayxanada polisə “aidiyyatı” olmayan şəxslərlə keçirir. Mənbənin bildirdiynə görə həmin şəxsləri rayon sakinləri hər sahədə “məlumatlı” şəxslər kimi tanıyırlar.
Qarşı tərəfi dinləməyə və mövqeyini dərc etməyə hazırıq. (pia.az)
