Hər kəsə bəllidir ki, son illər ölkə rəhbərliyi tərəfindən həyata keçirilən məqsədyönlü islahatlar nəticəsində, ölkəmizdə peşə təhsilinin rolu əhəmiyyətli dərəcədə artdı. Belə bir səbəb üzündən də, istər paytaxt Bakı şəhərində, istərsə də digər şəhər və rayonlarda fəaliyyət göstərən peşə məktəblərinə olan maraq getdikcə artmağa başladı. Belə təhsil ocaqlarından biri də, 1939-cu ildən fəaliyyət göstərdiyi bildirilən 1 №-li Gəncə Peşə Liseyi oldu. Son günlər Abbas Məmmədovun rəhbərlik etdiyi bu təhsil müəssisəsi haqda redaksiyamıza sensasiya doğuran məlumatlar daxil olmaqdadır. Belə ki, daxil olan məlumatlarda bildirilir ki, 1 №-li Gəncə Peşə Liseyinin direktoru Abbas Məmmədov bu təhsil müəssisəsinə dədə mülkü kimi baxır və düşündüyü addımlarını da atır. Bu şəxsin həyata keçirdiyi idarəçiliyin mahiyyəti haqda daxil olan məlumatlarda vurğulanır ki, məktəbdə üç nəfər gözətçi, bir nəfər anbardar işləsə də, Abbas müəllim məktəbə aid olan əmlakları Gəncə şəhərinin Balabağman adlanan ərazisində satdırır. Yəni, o, daşıdığı vəzifəsinin imkanlarından sui-istifadə edir və əmlakları məktəbdən çıxartdırarkən, kameraları söndürtdürür. Ən biabırçı halın varlığı isə, ölkəmizdə koronovirusla (COVİD-19) bağlı xüsusi karantin rejimi tətbiq olunsa da, Abbas Məmmədov karantin rejiminin tələblərinə məhəl qoymur və rəhbərlik etdiyi təhsil müəssisəsinə məxsus otaqlarda yemək-içmək məclisi düzüb-qoşdurur. Belə bir haln varlığı da, infeksiyanın yayılma riskini daha da artırır. Baş verənləri təhlil edib belə bir qənaətə gəlmək olar ki, 1 №-li Gəncə Peşə Liseyində direktor vəzifəsini daşıyan Abbas Məmmədovu, bu gün nə ölkə rəhbəri cənab İlham Əliyevin çağırışı, nə də ki, Nazirlər Kabineti yanında fəaliyyət göstərən Operativ Qərərgahın qəbul etdiyi qərarlar düşündürmür. Onu düşündürən yalnız və yalnız özünün qəbul etdiyi qərarlardır. Bu yöndə araşdırmamızı davam etdirəcəyik.
(deryaz.az)
Nyus.Az
