Sadiq oxucularımız yəqin ki, bir neçə gün əvvəl saytımızda dərc olunan
“Gədəbəydə balaca padşahlar koronovirusdan betər olub” başlıqlı məqaləmizi xatırlayırlar.
Həmin məqaləni “Youtobe” kanalında paylaşdığımız “Bir zibilyığanın manifesti” sərlövhəli
səs yazısı ilə birgə nəzərdən keçirənlər söhbətin kimlərdən və nələrdən getdiyini də bilirlər.
Lakin, izləyicilərimiz sırasına yeni qatılanlara məsələ ilə bağlı zəruri məlumatları verməyi
özümüzə borc bilirik.
Hər şey ondan başlayıb ki, Gədəbəy Rayon İcra Hakimiyyətinin başçısı, hörmətli cənab
İbrahim Mustafayev hazıki vəzifəsinin icrasına başlayanda özü ilə rayona gətirərək Gədəbəy
RİH-nin Kommunal Müəssisələri Kombinatına direktor təyin etdiyi Əkbər Kazımova birbaşa
vəzifəsi ilə əlaqəli olmayan başqa səlahiyyətlər verdi. Bu səlahiyyətlər özündə bir sıra
məsələləri, o cümlədən, kadr seçimində söz sahibi olmağı, təzə işə götürüləcək şəxsləri “saf-
çürük” etməyi ehtiva edirdi.
Lakin dövlət və hökumət strukturlarında rəhbər vəzifələrə namizədlərə, ələlxüsus da başçının
ərazi vahidləri üzrə nümayəndələrinə Əkbər Kazımovun verdiyi tələblərə əməl etmək heç də
hamının gücü, imkanı daxilində deyildi. Həmin tələblərə duruş gətirməyib ürəyi partlayıb
ölənlər də oldu, xəstəxanalıq olanlar da. Kifayət qədər rəhbərlik təcrübəsinə, yetərincə
müşahidə qabiliyyətinə malik İbrahim müəllim artan narazılıqları sezərək, Əkbər Kazımovu
əlavə səlahiyyətlərindən məhrum etdi və ona yalnız özünün birbaşa vəzifəsi ilə məşğul olmağı
tapşırdı.
Ə.Kazımov üçün bu, görünür, təkcə nüfuz baxımından deyil, həm də maddi baxımdan böyük
itki idi. O üzdən də “komxoz” rəhbəri öz işinin “dərinliyinə getməyə” başladı. Axı onun çoxu
kirayədə yaşayan “gəlmə kadrlardan” fərqli olaraq “Qızıl torpaq”da özü üçün tikdirməyə
başladığı möhtəşəm villası yarımçıq qala bilməzdi. Odur ki, Gədəbəyin ucqar kəndlərinə qaz
çəkilişlərinə nəzarət etməkdən tutmuş, “Regionların sosial-iqtisadi inkişafı Dövlət
Proqramı”nın Gədəbəy rayonunda icrasında “işıq gələn hər deşiyə barmaq basmağa” başladı.
Lakin, onun haram qazancı üçün ən əsas mənbə yerlərdə aztəminatlı əhalinin dolanışığının
təmini üçün ictimai iş yerlərinin yaradılması ilə bağlı Prezidentin verdiyi tapşırıq oldu. Belə
ki, həmin ictimai işlər dedikdə, əsasən “Komxozun” tabeliyində olan zibilyığanlar, xadimələr
nəzərdə tutulurdu. Bu məsələdə Ə.Kazımov kimisini söz sahibi etmək isə “qoyunu qurda
tapşırmaq” kimi bir şeydi. Ə.Kazımov bu müstəvidə ehtikarlıq etmək üçün yenə də icra
nüməyəndələrini özünə tərəf müqabili seçməli, onları öz maxinasiyalarına şərik etməliydi.
Məhz onun verdiyi göstəriş əsasında icra nümayəndələri ictimai işlərə cəlb etdikləri şəxslərin
qarşısında müqavilə ilə işə düzəlmələri üçün əvvəlcə 500 manat nağd pul, sonra isə ilk 3 ayın
maaşını bağışlamaq tələbi qoydular. Müqavilə müddəti bitəndə isə müqaviləni təzələmək
üçün ilin başında daha 200 manat tələb olunur.
Bütün bu və başqa məsələlərlə bağlı Ə.Kazımovun mövqeyini öyrənmək istədikdə, bir şivən
qopardı ki, gəl görəsən.
Bunun ardından mayın 9-da Ə.Kazımov bütün icra nümayəndələrini bir araya yığıb “hal-qəziyyəni” danışıb. “Dəryaz”da gedən məlumatların həqiqətə uyğun olmaması barədə akt tərtib edərək onların hamısına qol çəkdirib. Elan edib ki, bu əsasla “Dəryaz”ı məhkəməyə verəcək. Kazımov məhkəmə fikrindən daşınmalı olub, bir az daha artıq qabaqlayıcı tədbirlər görməyə qərara gəlib.
Bir müddət bundan əvvəl Gədəbəy rayon Qaravəlilər kənd sakini Quliyev Vahid Xanbuta oğlu redaksiyamıza müraciət edərək başına gətirilən müsibətlərdən danışmışdı V.Qulievin torpaq məsələsini özünə həqiqətən də ciddi problem saymağa haqqı var. Belə ki, eyni və daha məşəqqətli hadisə keçən il onun başına gəlib. Belə ki, ona pay torpaqlarının bölgüsü zamanı payına düşən Başkənd kəndində 11 il əkib-becərdiyi 30 sot torpaq sahəsini əlindən alıblar ki, guya bu torpaq sahəsi başqasına məxsusdur. Halbuki, həmin torpaq da pay bölgüsündə Vahidə düşübmüş Vahid orada da əkin salıb. Lakin çox keçmədən Qasımov Mayıl Məhəmmədəli oğlu adlı şəxs ortaya çıxıb ki, bəs torpaq sahəsi onundur. Aralarında sözlü mübahisə düşəndə M.Qasımov “102”
xidmətinə zəng vurub. V.Quliyevin sözlərinə görə, Gədəbəy rayon Polis Şöbəsinin Novosaratovka kənd Polis Bölməsinin rəisi Yaşar İsmayılov həmin vaxt onu döyüb və 250 manat pulunu alıb. Adını da qoyub ki, bəs M.Qasımova maddi ziyan vurduğuna görə həminpul ziyanın qarşılığında kompensasiya olaraq notarial qaydada M.Qasımova ödənilib. Ancaqsonradan məlum olub ki, həmin pulu bölmə rəisi özünə götürüb.Vahid Quliyev həmin məsələ ilə bağlı, 86 yaşlı yataq xəstəsi olan anasını, yoldaşını və 2 azyaşlı uşağını da götürüb Gədəbəy Rayon İcra Hakimiyyətinin Başçısı cənab İbrahim Mustafayevin qəbulunda gedib.
Başçı da onu dinləyəndən sonra aidiyyatı şəxslərə tapşırıb ki,ona məhsuldar torpaqdan bir
hektar torpaq sahəsi ayırılsın. O,da sevincək olaraq toxumluq taxıl alıb ki, torpaq veriləcək və
əkin əkəcək. Təəssüf ki, onun aldığı toxum və arzuzu yerindəcə qalıb. Vahid bildirir
ki,yenidən dəfələrlə başçının qəbuluna getsə də, başçı ilə görüşməyə şərait yaratmayıblar.
Onu hüqüqşünasın yanına göndəriblər. O da RİH-nin hüquqşünası Zülfüqar müəllimin
qəbulunda olub. Hüquqşünas ona deyib ki, sənə verilən torpaq sənədsiz olduğu üçün RİH
həmin torpaq sahəsi ilə bağlı münasibətlərin tənzimlənməsinə müdaxilə edə bilməz. Bu cavab
təbii ki, V.Quliyevi qane etməyib. Başa düşə bilməyib ki, əgər rayon rəhbərliyi gələcəkdə
yarana biləcək mübahisəli vəziyyətə müdaxilə etmək iqtidarında olmayacaqdısa, niyə onu
aldadırdı, xərcə, əziyyətə salırdı, camaatla üz-göz edirdi.
Hərçənd, Vahid Quliyevin dərdi daha böyükdür. Bütün həmkəndlilərindən fərqli olaraq hələ
də pay torpağı ala bilməməsindən, amma hakimiyyət və yerli özünüidarəetmə nümayəndələri
tərəfindən dəfələrlə aldadılaraq xərcə, artıq zəhmətə salındığından gileylənirdi.
Xatırladaq ki, V.Quliyevin bildirdiyinə görə, az əvvəl onun pay torpağı almaq istəyinə cavab
olaraq kənd icra nümayəndəsi və bələdiyyə sədri ona Baş kənddən 44 sot sahə göstəriblər.
Sevincək olub Novruz bayramı günündə, qarlı-yağışlı havada həmin sahəni əkdirib. Amma 3
gün sonra elə həmin səlahiyyətli şəxslər ona bildiriblər ki, səhv ediblər, göstərdikləri torpaq
sahəsi əslində başqa kənddə yaşayan və qoyun sürüsü olan İmran adlı adama məxsus imiş.
Bələdiyə sədri ona çəkdiyi xərci geri qaytarıb ki, torpaqdan əlini üzsün. Əli həm yerdən, həm
də göydən üzülən Vahid Qaravəlilər kənd İƏD üzrə icra nümayəndəsi Kamran Əliyevə giley
edib. Deyib ki, Vətən torpağından ona bir pay düşmürsə, vətəndaşlıq da cazibədar görünmür.
Xəbərdarlıq edib ki, bu ölkə yiyəsiz deyil, problemini, düşdüyü oyunu Prezidentə yazacaq.
Cavabında nə eşitsə yaxşıdır?: “Şikayət etməyən əskik oğlu əskikdir! Edərsən, işdən
qovularsan!”
İndi isə gəlin görək, V.Quliyev nə işin, hansı vəzifənin sahibidir ki, əlindən çıxmaması üçün
K.Əliyevin “silkələdiyi barmaqdan” qorxmalıdır - Gədəbəy rayon Kommunal Müəssisələri
Kombinatında zibilyığan. Dediyinə görə kənd ərazisində fəaliyyət göstərdiyinə görə icra
nümayəndəliyindən inzibati asılılığı var. Keçən il işə düzələndən bəri qazancının çoxunu da
məhz nümayəndəliyin sədri özünə götürüb: “Məni işə götürdəndə ilk əvvəl 500 manat rüşvət
aldı. Sonra 125 manatlıq maaş kartımı da ilk 3 ayda özündə saxlayıb pulu götürdü. Daha 2 ay
keçəndən sonra müqavilə müddətim bitdi. Müqavilənin müddətini artırmaq üçün əlavə 200
manat aldı. İndi də ilin başından müqaviləni yeniləməkdən ötrü əvvəl 100 manat aldı, əlavə
olaraq daha 100 manat da istəyir. Tələblərini başçının adından və komxozun müdiri Əkbər
müəllimin adından edir”.
“Elə bil, rayonun kəndlərinə aqronom təyin ediblər məni, özü də müftə işləyən aqronom, bir
torpaq göstərib əkdirirlər, sonra qovub başqa yerə göndərirlər...” – acı zarafatla deyirdi Vahid
kişi: “Kənddə məndən başqa hamının əkənəyi-biçənəyi var. İndi karantindir, qalmışam
çıxılmaz vəziyyətdə, rəsmi iş vaxtının açılmasını gözləyirəm, görək nə olur, yenidən icra
başçısının qəbuluna düşməyə çalışacağam”.
Vahid Quliyev həmçinin bildirib ki, təxminən br neçə il bundan Qızılxaç komitsinin
xətti ilə ona əkin üçün texnika veriblərmiş. Bir il kənd camaatına pulsuz işləsə də
(Cəmiyyətin bir ildə verdiyi 300 manatdan başqa), texnika onun adına sənədləşdirilsə də, bir
ildən sonra balaca padişahlar ( İcra nümayəndəsi və bələdiyyə sədri) həmin texnikanı onun
əlindən alıb başqasına veriblər.
Bu mövzuda qələmə aldığımız məqaləni Gədəbəy RİH-nin imel poçtuna göndərdik. Etiraf edək
ki, RiH başçısı bu məsələyə həssas yanaşdı və müavini - sosial-iqtisadi inkişafın təhlili və
proqnozlaşdırılması şöbəsinin müdüri Musayev Vüsal Kərim oğluna məsələni araşdırmağı
tapşırdı. Qaravəlli kəndinə yollanan Vüsal müəllim isə şikayətçi kənd sakinini icra
nümayəndəsinin otağına çağıraraq, “qaş düzəltmək əvəzinə vurub göz çıxarıb”. Başçının
müavini şikaətçinin probleminin həllinə dair əməli tədbir görməkdənsə, onu hədələyib,
amiranə tərzdə icra nümayəndəsinə deyib ki, “dediklərimizə razı olmasa, bunu işdən çıxar,
əvəzinə başqasını götür”. Kişiyə elə “xox” gəliblər ki, istədikləri izahata qol çəkməyə razı
olub. Təsdiqləyib ki, daha şikayətçi deyil, ancaq pulunu qaytarsınlar, torpaq sahəsi ilə təmin
etsinlər. Vüsal müəllim də həmin izahatı gətirib başçıya göstərib.
Vahid Quliyev bu hadisədən sonra redaksiyamıza zəng vuraraq başına gələnləri danışıb. Biz
də öz növbəmizdə başçının birinci müavini Natiq Nağıyevlə əlaqə saxlayıb xahiş etdik ki, baş
verənlər barədə hörmətli İbrahim Mustafayevə məruzə etsin. Sağ olsun, Natiq müəllim
xahişimizi yerinə yetirib. Nəticədə rayon rəhbəri Vahid Quliyevi və Qaravəlilər kənd ərazi
vahidi üzrə nümayənəndəliyinin sədri Kamran Əliyevi kabinetinə çağıraraq üzləşmələrini
təmin edib və aralarında baş vermiş insidentin təfərrüatını özlərindən öyrənmək istəyib.
Bundan sonra icra nümayəndəsi əlahiddə olaraq Vahid kişinin evinə gəlib, yenə də vədlər
verib, yalvar-yaxar edərək xahiş edib ki, onu güdaza verməsin.
Qəbul zamanı
icra nümayəndəsi yalan məlumat verib ki, Vahid Quliyevin maaş kartını guya qardaşı alıb,
pulu da o çıxarıb. “Abırına bükülən” Vahid kişi görüb ki, icra nümayəndəsi həqiqətən
qorxudan çox cılızlaşıb və bu üzdən çox üstünə getməyib, yenə də öz qanuni tələbləri yerinə
yetiriləcəyi təqdirdə qane olacağını bildirib.
Arif adam olan RİH başçısı işin qurama olduğunu çox gözəl başa düşdüyündən, icra
nümaəndəsini və yerli bələdiyyənin sədrinə Vahidin məsələsini mütləq qaydada “yoluna qoymaq”
üçün konkret vaxt verib. .
Digər tərəfdən, icra nümayəndəsi öz çirkin
niyyətlərini həyata keçirmək üçün başqa təsir üsullarına əl atıb. Bakıda hüquqşünas işləyən
qardaşını işə qatıb. Qardaşı da redaksiyamıza zəng vuraraq bizi hədələdi və məqaləni saytdan çıxarmağı tələb etdi.
Amma əlbəttə ki, biz də öz növbəmizdə haqlı mövqeyimizdə
möhkəm dayandığımızı bildirdik ki, başa düşsün, “bu həna o hənadan deyil”. İcra
nümayəndəsinin Saratovka kənd Polis Bölməsində Cinayət Axtarış şöbəsinin rəisi işləyən digər qardaşı isə Vahid kişini
döyüb pulunu əlindən alan Novosaratovka polis bölməsi rəisinə qahmar çıxıb, Vahidi
hədələyərək deyib ki, polisin icraatında hələ bağlanmamış xeyli cinayət işləri var, onu
şərləyib tutdura, həmin cinaətləri üstünə yıxa bilərlər.
Polisin işdəcələri ilə bağlı artıq Gədəbəy Rayon Polis İdarəsinin rəisi Mehman Həşimova
deyil, Daxili İşlər naziri cənab Vilayət Eyvazova və baş prokurur Zakir Qaralova rəsmi
müraciət etməyə qərar vermişik. Çünki birincinin məlumatlı olduğu bu məsələyə laqeyd
yanaşdığını, özü ilə birgə gətirib Novosaratovkaya bölmə rəisi təyin etdiyi Yaşar İsmayılovun
“ayağını tapdalamayacağından” əminik.
Mövzu ilə bağlı bir vacib məlumatı da verməyi özümüzə borc bilirik ki, kənd təsərrüfatı
məhsulları istehsalçılarına subsudiya veriləndə ermənilərdən zəbt edilmiş ərazi kimi
Başkənddə məskunlaşıb torpağı becərən Gədəbəy sakinləri bu layihədən kənarda qalmışdı.
Məhz İbrahim Mustafaev rayona rəhbər təyin olunandan sonra əhalinin xahişlərini nəzərə alıb
Başkənddəki əsasən taxıl və kartof istehsalı ilə məşğul olan kəndlilərin də subsidiya ilə təmin
edilməsinə nail oldu. Amma tezliklə məlum oldu ki, “kiçik padşahlar” -
və RİH başçısının onlara qahmar çıxan
müavinləri Başkənd torpaqlarını hektarı 600 manatdan satırlar və aralarında əldə olunan
gəlirin pay bölgüsü vardır. Novosaratovka kənd bələdiyyəsinin sədri, “Kürd Fəridə” ləqəbli
Əliyeva Fəridə Çərkəz qızı da bu “çete”nin üzvüdür. Onun Saratovkadan Şınıx istiqamtinə
gedən yol boyu əkinə yararlı torpaqları sotunu 1-1,5 min manatdan obyektaltı istifadə üçün iş
adamlarına satması barədə əlimizdə kifaət qədər məlumatlar vardır. Hərçənd, bu, ayrı
söhbətin mövzusudur.
Sözardı: Biz ondan qorxuruq ki, vaxtilə babalarımızın erməniyə “icarəyə verdiyi”, sonra isə
itirdiyimiz 20 faizin qarşılığında çox cüzi təsəlli olan bu torpağı indi özümüzünkülərə satan bu
“kiçik padşahlar” bir balaca ara qarışan kimi yenə də erməniyə sata bilərlər. Amma
ümidlərimizi itirmirik. Çünki, Gədəbəydə haqqın İbrahim Mustafayev kimi bir tərəfdarı var
və inanırıq ki, RİH başçısı aidiyyati orqanlar qarşısında məsələ qaldırıb korrupsioner “kiçik
padşahlar” barədə lazımi ölçü götürülməsinə nail olacaq.
Mövzuya qayıdacağıq.
Heqiqet carçısı
