Neftçalada tördəilən qətlin təfərrüatları məlum olub.

virtualaz.org-un Şirvan bürosunun məlumatına görə, rayonun Bankə qəsəbəsinin sakinləri-qətlə yetirilən 49 yaşlı Mahir Abbas oğlu Əliyev və onu qətlə yetirməkdə şübhəli bilinərək saxlanılan 42 yaşlı Saleh Hüseynağa oğlu Ələkbərov qonşudurlar. Onlar toyda sərxoş olana kimi yeyib-içdikdən sonra şadlıq evini birgə tərk ediblər. Lakin Saleh Ələkbərov tam sərxoş vəziyyətdə olan qonşusunu evə gətirmək üçün taksi saxlasa da, Mahir Əliyev minməkdən imtina etdiyindən aralarında mübahisə yaranıb. Onlar mübahisəni davam etdirmək üçün şadlıq evinin arxasına keçiblər. Orada mübahisə edərkən Mahir Əliyev qonşusuna daxili qanaxmaya səbəb olan xəsarət yetirib və hadisə yerindən qaçaraq yaşadığı evə gəlib.

Hüquq-mühafizə orqanları əməkdaşlarının cinayətin izinə şadlıq evində quraşdırılmış kamera görüntülərinə əsasən düşdükləri deyilir.

* * *11:29

Xəbər verdiyimiz kimi, Neftçala şəhəri ərazisində Bankə qəsəbə sakini Mahir Əliyevin üzərində zorakılıq əlamətləri olan meyiti tapılıb.

Daxili İşlər Nazirliyinin (DİN) Mətbuat xidmətindən virtualaz.org-a verilən məlumata görə, polis və prokurorluq orqanları əməkdaşları tərəfindən aparılmış təxirəsalınmaz tədbirlərlə həmin gün şəhər ərazisində M.Əliyevlə həmyerlisi Saleh Ələkbərov arasında münaqişə baş verməsi və sonuncunun onu döyərək qətlə yetirməsi aydınlaşıb.

Əməliyyat-axtarış tədbirləri ilə qəsdən adam öldürməkdə şübhəli bilinən S.Ələkbərov tutulub.

Faktla bağlı Cinayət Məcəlləsinin 120-ci (qəsdən adam öldürmə) maddəsi ilə cinayət işi başlanılıb.

* * *10:30

Ötən gecə saat 1 radələrində Neftçala şəhərində yerləşən “Xatimə” şadlıq sarayının arxasında üzərində xəsarət izi olan kişi meyiti tapılıb.

Virtualaz.org-un Şirvan bürosunun məlumatına görə, araşdırma zamanı onun, Bankə qəsəbəsinin həmin şadlıq sarayında keçirilən toyda iştirak edən 49 yaşlı sakini Mahir Abbas oğlu Əliyev olduğu məlum olub.

Neftçala Rayon Polis Şöbəsi əməkdaşları tərəfindən “isti izlərlə” həyata keçirilən istintaq-əməliyyat tədbirləri nəticəsində onun qətlə yetirildiyi müəyyən edilib və qatil saxlanılıb.

Faktla bağlı Neftçala Rayon Prokurorluğunda cinayət işi qaldırılıb.

Nyus.Az