Görkəmli şair, tərcüməçi, uzun müddət "Ədəbiyyat qəzeti"nin baş redaktoru olmuş Ayaz Vəfalı vəfat edib.
“Yeni Sabah” bildirir ki, bu haqda kulturoloq Aydın Xan məlumat yayıb.
Ayaz Rza oğlu Cəfərov 1937-ci ildə anadan olub. O, 1967-ci ildən Azərbaycan Yazıçılar Birliyinin üzvü, filologiya elmləri namizədi, Azərbaycanın Əməkdar mədəniyyət işçisi, Azərbaycanın Əməkdar incəsənət xadimi olub.
O, müxtəlif illərdə işıq üzü görən "İllər və nəsillər", "Ürək və od", "Turacın mahnısı", "Bəlkə onda öyrənmişik", "Özü oda yana-yana" şeirlər kitabının, "Füzuli öyrədir", "Sənətkar və xalq", "Füzuli xəlqiliyi" elmi-tədqiqat əsərlərinin müəllifidir. Ayaz Vəfalı həmçinin böyük özbək şairi Əlişir Nəvainin "Leyli və Məcnun", Ukrayna ədəbiyyatının klassiki T. Q. Şevçenkonun "Kor qadın" poemalarını, rus yazıçısı A. Çakovskinin "Qələbə" siyasi romanını (I cild), dünya xalqlarının atalar sözü və məsəllərindən ibarət "Atalar sözü-ağlın gözü" kitabını və daha bir çox xalqların poeziyasından ayrı-ayrı nümunələri Azərbaycan dilinə tərcümə edib.
"Məhəmməd Füzuli" Beynəlxalq Ədəbi Əlaqələr Fondunun sədri, Azərbaycan Yazıçılar Birliyi İdarə Heyətinin və məclisinin üzvü olub.
Nyus.Az
