Abşeron rayonunun Mehdiabad qəsəbəsində dava zamanı 1 nəfər xəsarət alıb.

Nyus.Az "Report"a istinadən bildirir ki, 1991-ci il təvəllüdlü Xanbabayev Coşqun Nazir oğlu Digah qəsəbəsinə gedən yolda tanışı ilə hələlik bilinməyən səbəblərdən mübahisə edib.

Adı və soyadı açıqlanmayan şəxs C.Xanbabayevin döş qəfəsinə bir bıçaq zərbəsi vurub. C.Xanbabayev ağır xəsarət aldığından çoxlu qan itirib.

Təcili Təxirəsalınmaz Tibbi Yardım Xidmətinin (TTTYX) həkimləri yaralını 1 saylı Kliniki Tibbi Mərkəzə yerləşdiriblər. Yaralı cərrahi əməliyyat olunub.

Həkimlərin verdiyi məlumata görə, onun vəziyyəti orta-ağır kimi qiymətləndirilir.

Abşeron Rayon Polis İdarəsi əməkdaşları hadisəni törətməkdə şübhəli bilinən şəxsin cinayət əməlindən sonra ərazini tərk etdiyini bildiriblər.

Faktla bağlı cinayət işi başlanılıb.

Nyus.Az