Malayziyanın Baş naziri Mahathir Məhəmməd orta məktəb proqramının İslam dini dərslərinin azaldılması hesabına dəyişdirilməsi, əsas diqqətin ingilis dili və digər elmlərin tədrisinə yönəldilməsi barədə çağırış edib.

Nyus.Az AZƏRTAC-a istinadən bildirir ki, bu barədə "The Straits Times" qəzeti məlumat yayıb. Baş nazirin sözlərini sitat gətirən qəzet yazıb: "Hazırda məktəblilər əsasən İslam dinini öyrənməklə məşğuldurlar və başqa heç nə oxumurlar. Bunun nəticəsində orta məktəbi bitirən gənclər iş tapmaq üçün başqa biliklərə malik olmurlar. Onların məşğul olacağı yeganə peşə yalnız din xadimi olmaqdır".

Baş nazirin sözlərinə görə, hökumət İslam dini dərslərinin hər gün deyil, həftədə iki-üç dəfə tədrisini planlaşdırır. "Əgər bizim ölkəmiz inkişaf və tərəqqi etmək istəyirsə, vətəndaşlarımız yalnız Quranı deyil, eyni zamanda, digər elmələri də öyrənməlidirlər. Əcnəbi dilləri, xüsusən ingilis dilini öyrənmək lazımdır. İngilis dili beynəlxalq ünsiyyət vasitəsidir", - deyə Mahathir Məhəmməd bildirib. Bu ərəfədə Baş nazir hökumətin iclaslarının tədricən ingilis dilində keçirilməsi barədə də göstəriş verib.

Xatırladaq ki, Malayziya əhalisnin 76 faizini malaylar, 15 faizini etnik çinlilər, qalan hissəsini isə hindlilər təşkil edirlər. Hazırda əsas rəsmi dil bahasa dilidir. Lakin ötən əsrin 60-cı illərinin sonunadək ingilis dili ölkədə de-fakto hökumət dili kimi işlədilirdi.

Nyus.Az