Türkiyə siyasətində uzun illər CHP-nin əsas dayaqlarından biri hesab edilən İzmirdə diqqətçəkən siyasi proses yaşanır.
Nyus.Az xəbər verir ki, CHP-dən ayrılan İzmir Böyükşəhər Bələdiyyəsinin sədri Cəmil Tuqayın AK Partiyaya keçəcəyi barədə məlumatların ardından prosesin son mərhələyə çatdığı bildirilir.
Türkiyənin hakimiyyətə yaxın media qurumlarının məlumatına görə, Cəmil Tuqayın AK Partiyaya keçidinin oktyabrın 7-də rəsmiləşdirilməsi gözlənilir. Haber7 Tuqayın AK Partiyanın İzmir təşkilatı ilə təmaslarını tamamladığını və qərarını dəqiqləşdirdiyini yazıb.
Məlumata görə, oktyabrın 7-də keçiriləcək AK Partiya qrup toplantısında Cəmil Tuqaya partiya nişanını Türkiyə Prezidenti və AK Partiyanın sədri Rəcəb Tayyib Ərdoğan şəxsən taxacaq. Jurnalist Sinan Burhan da tv100-ün efirində apardığı görüşlərdən sonra eyni tarixi açıqlayıb və keçidin AK Partiyanın yeni qanunvericilik ilindəki ilk qrup toplantısında baş tutacağını bildirib.
Prosesdə diqqətçəkən əsas məqamlardan biri sentyabrın 30-da baş verib. Ərdoğan Cəmil Tuqayı Prezident Kompleksində qəbul edib. Mətbuata qapalı keçirilən görüşdə İzmirin problemləri və şəhərdə həyata keçirilməsi nəzərdə tutulan layihələr müzakirə olunub.
Tuqay iyunun 19-da CHP-dən istefa edib və İzmir Böyükşəhər Bələdiyyəsinin sədri kimi fəaliyyətini müstəqil davam etdirib. Onun AK Partiyaya keçəcəyi barədə xəbərlər daha əvvəl də gündəmə gəlsə də, Ərdoğanla son görüşdən sonra bu istiqamətdə məlumatlar intensivləşib.
Türkiyə mediasında yayılan məlumatlara görə, siyasi keçid yalnız Cəmil Tuqayla məhdudlaşmaya bilər. İzmirdən daha iki rayon bələdiyyəsinin də AK Partiyaya qoşulacağı bildirilir.
Keçid rəsmiləşərsə, bu, AK Partiyanın tarixində İzmir baxımından ilk olacaq. 2001-ci ildə yaradılan AK Partiya indiyədək İzmir Böyükşəhər Bələdiyyəsinə rəhbərlik etməyib. Cəmil Tuqayın partiyaya qoşulması ilə AK Partiya ilk dəfə İzmir Böyükşəhər Bələdiyyəsinin rəhbərliyini əldə etmiş olacaq. (Musavat.com)
Nyus.Az
