Rusiya müdafiə sənayesi nəhəngi olan “Rosoboronexport” bu ilin birinci yarısında 13 milyard dollardan çox dəyərində silah və hərbi texnika ixracı müqavilələri imzalayıb.
Nyus.Az xəbər verir ki, məlumatı şirkətin baş direktoru Aleksandr Mixeyev Misirdə keçirilən “El Alamein 2026” Beynəlxalq Hava Sərgisindən əvvəl jurnalistlərə açıqlayıb: “2026-cı ilin birinci yarısında “Rosoboronexport” 13 milyard dollardan çox dəyərində ixrac müqavilələri imzalayıb. Bu məbləğ bütün 2025-ci ilin göstəricisinə bərabərdir. 2026-cı ildə imzalanmış müqavilələrdə ən böyük pay Hərbi Hava Qüvvələri məhsullarınındır. Hava hücumundan müdafiə avadanlıqları ikinci yerdədir”.
Mixeyev vurğulayıb ki, bu müqavilələrin icrası dövlət müdafiə sifarişləri çərçivəsində müdafiə sənayesi müəssisələrinin işinə təsir göstərməyəcək.
Onun sözlərinə görə, sifarişlər Qərb silah və texnikalarına qarşı bilavasitə döyüş meydanında sınaqdan çıxmış məhsullaradır: “Real şəraitdə nümayiş etdirilən performans müştərilərin müqavilələrin bağlanması ilə bağlı son qərarlarına əhəmiyyətli dərəcədə təsir göstərib”.
Baş direktor həmçinin bildirib ki, "Rosoboronexport"un sifariş büdcəsi 60 milyard dolları keçib: "Sifarişlərə beşinci nəsil Su-57E qırıcı təyyarələri, İl-78MK-90A tankerləri, Yak-130M döyüş təlim təyyarələri, hava hücumundan müdafiə sistemləri və kiçik silahlar da daxil olmaqla, Rusiya müdafiə sənayesi şirkətlərinin ən son məhsulları üçün müqavilələr daxildir".(Musavat.com)
Nyus.Az
