ABŞ hökuməti Ermənistanın cənubundan keçəcək TRIPP marşrutunun inkişafı üçün yaradılmış TRIPP+ fondunun maliyyəsini iki dəfə artıraraq 402 milyon dollara çatdırıb.
Musavat.com erməni mediasına istinadən xəbər verir ki, bu barədə yerli Hetq.am yazıb.
Saytın məlumatına görə, fond bu il yanvarın 26-da – Ermənistanın xarici işlər naziri Ararat Mirzoyanla ABŞ dövlət katibi Marko Rubionun Vaşinqton görüşündən iki həftə sonra təsis edilib.
Həmin görüşdən sonra tərəflər Ermənistanın cənubundan keçən TRIPP infrastruktur marşrutunun inkişafı və idarə olunması üçün TRIPP Development Company adlı şirkətin yaradılacağını açıqlamışdılar.
Məlumata əsasən, şirkətin səhmlərinin 26 faizi Ermənistana, 74 faizi isə ABŞ tərəfinə, daha dəqiq desək, Delaver ştatında yaradılacaq TRIPP Development Company US şirkətinə məxsus olacaq.
Eyni tarixdə Delaver ştatında TRIPP+ Enterprise Fund fondu da yaradılıb. Fondun rəhbəri ABŞ-da Respublikaçılar Partiyasına və xüsusilə Donald Trampa yaxınlığı ilə tanınan iş adamı Konstantin Sokolov təyin edilib.
Hetq.am xatırladır ki, Sokolov rəsmi olaraq Ermənistanın ən böyük mobil rabitə operatoru olan "Viva Armenia" QSC-nin səhmlərinin 20 faizinə sahib hesab olunur.
Nəşrin highergov.com portalına istinadən verdiyi məlumata görə, ABŞ Dövlət Departamentinin Avropa və Avrasiya məsələləri üzrə Bürosu yanvarın 30-da TRIPP+ fonduna 201 milyon dollar həcmində qrant ayırıb. Bu vəsaitin 2036-cı il dekabrın 31-dək istifadə olunması planlaşdırılırdı.
Lakin həmin mənbənin məlumatına əsasən, iyulun 16-da qrantın həcmi artırılıb və ABŞ hökuməti fonda ümumilikdə 402 milyon dollar ayırmağı öhdəsinə götürüb. Vəsaitdən istifadə müddəti dəyişməyərək 2036-cı ilin sonunadək saxlanılıb.
Nəşrin yazdığına görə, bu vəsaitlərin əsas hissəsinin Ermənistanda müxtəlif layihələrin həyata keçirilməsinə yönəldilməsi nəzərdə tutulur.
Nyus.Az
