Finlandiyada sualtı kommunikasiya xətlərinin zədələnməsi ilə bağlı araşdırma yeni mərhələyə keçib.
Nyus.Az xəbər verir ki, Finlandiya prokurorluğu “Fitburg” gəmisinin rusiyalı kapitanı və azərbaycanlı bosmanına qarşı rəsmi ittiham irəli sürüb. İstintaqın versiyasına görə, gəmi lövbəri Finlandiya körfəzinin dibi ilə sürüyərək kommunikasiya xətlərinə ziyan vurub.
Məlumata əsasən, 2025-ci il dekabrın 31-də Sent-Vinsent və Qrenadin bayrağı altında üzən, Sankt-Peterburqdan İsrailin Hayfa limanına yollanan “Fitburg” gəmisi Finlandiya polisi tərəfindən saxlanılıb. İddia olunur ki, gəmi zədələnmiş lövbəri dənizin dibi ilə ən azı 130 kilometr məsafədə sürüyüb.
İstintaq hesab edir ki, nəticədə iki sualtı telekommunikasiya kabeli zədələnib, daha səkkiz kabelə isə zərər vurmağa cəhd edilib.
Kapitan və bosman ittihamları rədd edirlər. Onların mövqeyinə görə, hadisənin baş verdiyi ərazi Finlandiyanın ərazi sularından kənarda yerləşdiyi üçün ölkənin bu iş üzrə kifayət qədər yurisdiksiyası yoxdur.
Bildirilir ki, zədələnmiş kommunikasiya xətlərinin yerləşdiyi ərazi Estoniya sahillərindən təxminən 60 kilometr aralıda, Estoniyanın müstəsna iqtisadi zonasında və Finlandiyanın iqtisadi zonası ilə sərhədə yaxın hissədə yerləşir.(Musavat.com)
[b]Nyus.Az[/b]
