İyunun 20-də Sankt-Peterburqda keçirilən iqtisadi forumda Rusiya rəsmiləri Ermənistanın Aİ-yə inteqrasiya planlarına sərt reaksiya veriblər.
Rusiya Baş nazirinin müavini Aleksey Overçuk bildirib ki, ilin sonuna qədər Ermənistanla Rusiya arasında iqtisadi münasibətlərdə 6 milyard dollarlıq itki yaşana bilər.
O, qeyd edib ki, Ermənistanın Avropa İttifaqına yaxınlaşması ticarət əlaqələrinə ciddi zərbə vura, hətta Ermənistan hava məkanının Rusiya üçün bağlanmasına səbəb ola bilər.
Rusiya XİN-in sözçüsü Mariya Zaxarova isə Ermənistanın Avrasiya İqtisadi Birliyindən çıxacağı təqdirdə bir sıra iqtisadi imtiyazları itirəcəyini vurğulayıb.
Bu xəbərdarlıqlar təsadüfi deyil. Baş nazir Nikol Paşinyan bir neçə gün öncə Ermənistanın AİB və Aİ arasında seçim etməli ola biləcəyinə eyham vurmuşdu. Rusiya isə artıq İrəvana həm siyasi, həm də iqtisadi təzyiqlərini artıraraq xəbərdarlıq edir: Ermənistanın Avropaya yönəlməsi ciddi nəticələrə yol aça bilər.//Milli.az//
Nyus.Az
