Çin prezidenti Si Cinpin ABŞ-yə nadir torpaq elementlərinin tədarükünü bərpa etməyə razılıq verib.
Musavat.com xarici agentliklərə istinadən xəbər verir ki, bunu ABŞ lideri Donald Tramp jurnalistlərə deyib.
O, Si Cinpinin ABŞ-yə nadir torpaq metallarının tədarükünü bərpa etməyə razı olub-olmaması ilə bağlı suala müsbət cavab verib. ABŞ və Çin nümayəndələrinin Londonda gözlənilən görüşü barədə danışan prezident, "Çin ilə razılaşmada böyük irəliləyiş əldə etdik. Biz aydınlıq istəyirdik" dedi.
Tramp Çin lideri ilə yaxşı söhbət etdiyini vurğulayıb. O, Pekinlə razılaşmalardan danışarkən əlavə edib: "Bu, çətin bir sövdələşmədir, lakin bu, bizə çoxlu pul və bir çox başqa şeylər qazandıracaq bir razılaşmadır".
Daha əvvəl Tramp bildirib ki, ABŞ və Çin arasında ikitərəfli ticarət məsələlərinə dair yeni nazirlər görüşü iyunun 9-da Londonda keçiriləcək. Amerika tərəfdən tədbirdə maliyyə naziri Skott Bessent, ticarət naziri Hovard Lutnik və ABŞ-nin ticarət nümayəndəsi Cemison Qri iştirak edəcək. Yeni görüşlə bağlı razılıq cümə axşamı Tramp və Si Cinpin arasında telefon danışığı zamanı əldə edilib.
Nyus.Az
