Türkiyə və Böyük Britaniya bir çox vacib məsələlərlə bağlı fikirlərini bölüşür və birgə fəaliyyət bu ümumi maraqları təşviq edəcək.
Virtualaz.org “Anadolu”ya istinadən bildirir ki, Türkiyə Müdafiə Nazirliyinin, qurum rəhbərinin Böyük Britaniyaya səfərinin yekunlarına dair bəyanatında belə deyilir.
Bəyanata əsasən, səfər zamanı Türkiyənin Milli müdafiə naziri Hulusi Akar və onun britaniyalı həmkarı Ben Uolles Qara dəniz, Şərqi Aralıq dənizi, Əfqanıstan hadisələri və NATO çərçivəsində proseslər də daxil olmaqla ikitərəfli və regional məsələlər ətrafında fikir mübadiləsi aparıblar.
Müdafiə nazirləri təsdiq ediblər ki, Türkiyə və Böyük Britaniya bir çox məsələlərdə ümumi və oxşar baxışları bölüşürlər. Müdafiə nazirliklərinin rəhbərləri belə bir fikirdədirlər ki, birgə səylər ikitərəfli hüquq və maraqları, həmçinin NATO alyansının hüquq və mənafelərini qorumağa kömək edəcək.
"Müdafiə sənayesində əməkdaşlığın genişləndirilməsi istiqamətində mümkün səylər qiymətləndirilib", - deyə məlumatda bildirilib.
Danışıqlar zamanı Hulusi Akar qeyd edib ki, Böyük Britaniya PKK terror təşkilatının fəaliyyətinin qarşısını almaq üçün bəzi addımlar atsa da, Ankara Londondan bu istiqamətdə daha fəal olmasını gözləyir.
Qurumdan bildiriblər ki, Böyük Britaniya Fətullah Gülənin (FETÖ) terror təşkilatının hələ də fəal fəaliyyət göstərdiyi ölkələrdən biridir.
Hulusi Akar səfər çərçivəsində, FETÖ ilə mübarizədə Türkiyəyə kömək etmək lazım olduğunu vurğulayaraq, Londonu bu mövzuda konkret addımlar atmağa çağırıb.
Nyus.Az
