Ümumdünya Səhiyyə Təşkilatının (ÜST) COVID-19 infeksiyasının mənşəyinin tapılması istiqamətində araşdırmalar aparmaq üçün Çinə ezam etdiyi ekspertlər qrupunun 2 üzvünün virusa yoluxduğu məlum olub.

Nyus.Az AZƏRTAC-a istinadən bildirir ki, bu barədə "South China Morning Post" qəzeti ÜST-yə istinadla xəbər yayıb. Bildirilir ki, Çinin epidemiya əleyhinə qaydalarına uyğun olaraq, xaricdən Çinə gələnlər uçuş məntəqəsində yola düşməzdən 2 gün əvvəl burun-boğaz yaxma testi ilə yanaşı, qanda anticisimlərin olmasını müəyyən edən (IgM) analiz verməlidirlər. ÜST heyətinin Sinqapurda verdiyi yaxma testinin cavabı neqativ olsa da, qan analizi nəticəsində qrupun iki üzvünün daha əvvəldən virusa yoluxduğu məlum olub. Beləcə, həmin iki nəfər ÜST missiyasının tərkibində Çinə uça bilməyib. Hazırda onlar Sinqapurda gözləyirlər.

Qeyd edək ki, yanvarın 14-də səhər saatlarında 11 nəfərdən ibarət beynəlxalq heyət Çinin Uxan şəhərinə gəlib. Onların tərkibində Ümumdünya Səhiyyə Təşkilatının və Dünya Heyvanların Sağlamlığı Təşkilatının ekspertləri var. BMT-nin Ərzaq və Kənd Təsərrüfatı Təşkilatının 2 alimi isə distant formada araşdırmalarda iştirak edəcək.

Çinin Səhiyyə Məsələləri üzrə Dövlət Komitəsinin məlumatına əsasən, beynəlxalq ekspertlər araşdırmalara başlamazdan əvvəl epidemiya əleyhinə qaydalara uyğun olaraq xüsusi karantin yerlərində 14 günlük məcburi özünütəcrid dövrünü keçməlidirlər. Ekspertlər rəylərini öz müşahidələrinə, eləcə də Çin mütəxəssisləri tərəfindən heyvan və insanlardan toplanmış nümunələrə əsasən verəcəklər. ÜST-nin Baş direktoru Tedros Qebreyesus bir neçə gün əvvəlki onlayn mətbuat konfransında təşkilatın ekspertlərinin çinli həmkarları ilə birgə xəstəliyin zoonoz (heyvanlardan insanlara və ya insanlardan heyvanlara keçən yoluxucu xəstəlik) mənbəyinin aşkar edilməsi ilə bağlı elmi planlar hazırlayacaqlarını bəyan edib.

Nyus.Az