Hazırda sosial şəbəkələr və orada iştirakçılıq Azərbaycan cəmiyyətinin zəruri tələbatına çevrilməklə virtual ictimai münasibətlər formaşaldırır. Bu yeni xarakterik keyfiyyət bütün informasiya cəmiyyətlərində mövcuddur.
Bu barədə Milli.Az-a açıqlamasında Milli Məclisin, eləcə də YAP Siyasi Şurasının üzvü, "Yeni Azərbaycan" qəzetinin baş redaktoru Hikmət Babaoğlu bildirib.
Onun sözlərinə görə, Azərbaycanda bu gün internet istifadəçilərinin sayı 75 fazidən çoxdur: "Belə olan halda heç şübhəsiz ki, sosial şəbəkələrdəki münasibətlərin hüquqi baxımdan tənzimlənməsinə ehtiyac var. İstənilən sahədə ictimai münasibətlərin tənzimlənməsinə ehtiyac yaranan kimi mütləq hüquq tənzimləmə prosedurası işə düşür. Bu gün sosial şəbəkələrdə Azərbaycanın ictimai fəal fərdlərinin təmsilçiliyi o qədər kütləvidir ki, burada mütləq müəyyən cavabdehlik və məsuliyyət mərhələsinin təmin edilməsi lazımdır. Hazırda qloballaşan dünyada informasiya müxtəlif vasitələr üçün istifadə olunur. Bu vasitələrdən biri də informasiyanın "yumşaq güc" kimi istifadə edilməsidir. Bu gücdən effektiv istifadə edən mərkəzlər onun gətirdiyi mənfəətləri öz milli maraqlarının lehinə çevirməyi bacarırlar. İnformasiya gücündən istifadə edə bilməyən və onu öz milli maraqlarını həyata keçirmək üçün bir vasitəyə çevirə bilməyən cəmiyyətlərdə isə informasiya daha çox dağıdıcı vasitəyə çevrilir".
Millət vəkilinin qənaətincə, beləliklə, imperialist mərkəzlər informasiyanı manipulyasiya vasitəsinə çevirməklə həmin cəmiyyətləri öz maraqlarına uyğun olaraq idarə etməyə çalışırlar: "Ona görə də milli informasiya məkanının qlobal informasiya məkanının bu təhdidlərindən qorunması üçün mütləq bu sahəsinin hüquqi kontekstdə tənzimlənməsi lazımdır. Mən belə düşünürəm ki, artıq Azərbaycanda bununla bağlı qanunun qəbul edilməsinə ehtiyac var. Facebook və tvitter istifadəçilərinin, ümumiyyətlə sosial şəbəkə istifadəçilərinin məsuliyyətini artırmaq üçün onların ilk növbədə, öz adları və şəxsiyyət vəsiqələrinin nömrəsi ilə həmin şəbəkələrə daxil olması doğru olardı. Biz bilirik ki, sosial şəbəkələrdə fərqli və yalançı profillərlə təmsil olunan çoxsaylı şəbəkə iştirakçıları var. Onlar bu və ya digər şəkildə sosial şəbəkələrdə insanları yönləndirməyə, onlarda yanlış təsəvvür formalaşdırmağa yaxud onları müxtəlif məqsədlər üçün provokasiya etməyə çalışırlar. Bəzən cəbhə xəttində insidentlər baş verən zaman bəzən isə ölkəmizdə mühüm əhəmiyyətli ictmai siyasi hadisələr olan zaman biz belə provokativ halları bariz şəkildə müşahidə edirik. Əlbəttə, belə hallar Azərbaycanın informasiya təhlükəsizliyini təhdid edir. Ona görə də müəyyən şəkildə bu münasibətlərin hüquqi tənzimlənməsi həyata keçirilməli daha sonra isə qanunvericilik bazası hadisələrin dinamikasına uyğun olaraq daima təkmilləşdirilməlidir. Məsələ ondadır ki, hazırda bu sferada bütün dünyada axtarışlar aparılır. İnkişaf etmiş Qərb cəmiyyətlərinin özləri belə sosial şəbəkədə ictimai münasibətləri qanunla tənzimləmək üçün müxtəlif cəhdlər edirlər. Elə hazır bir model yoxdur ki, onu əsas almaqla, milli informasiya məkanımızın tələblərinə uyğunlaşdırmaqla Azərbaycan tətbiq etsin. Hazırda Azərbaycan fikir, söz, məlumat azadlığının, plüralizmin bərqərar olduğu bir dövlətdir. Ona görə də istənilən ictimai fəal fərd yaxud millət vəkili qanunvericilik təşəbbüsü ilə çıxış edə bilər. Sosial şəbəkələrdədə baş verən müxtəlif fəsadlardan əziyyət çəkən və oradakı xaosun milli təhlükəsizliymiz üçün nə qədər təhdidedici olduğunu dərk edən çoxsalı insanlarımız var. Bu sahədə verilə biləcək təklifləri ümumiləşdirib Milli Məclisin gündəliyinə gətirməklə biz qanunlar qəbul edə bilərik.
Sosial şəbəkələrdə dövlət nəzarətinin gücləndirilməsi məsələsinə gəldikdə isə, mənim fikrimcə, burada dövlətin nəzarətindən yox,dövlətin konkret sahədə hüquqi münasibətlər yaratmaqla həmin sahədəki davranışları tənzimləməsindən söhbət gedir. Əgər sosial mediada belə bir hüquqi münasibətlər yaranarsa istifadəçilər davranışlarına görə məsuliyyət daşıyar, rəqabət mühitində sosial şəbəkə iştirakçılarının intelektual səviyyəsi artar, informasiyanın mübadiləsi prosesi milli maraqlarımız kontekstində baş tutar. Əgər kimsə Azərbaycanın ictimai maraqlarını təhdid edən manipulyativ informasiyaları qəsdən yayacaqsa, o zaman hüquqi məsuliyyət daşıyacaq. Bu isə ictimai münasibətlərin hüquq müstəvisində tənzimlənməsi olmaqla yanaşı həm də milli informasiya məkanımızın qlobal təhdidlərdən qorunması olar".
İlkin İzzət
Milli.Az
